EYOKUQALA EKAJOHANE
1 Silibhalela ngalowo owayekhona kusukela ekuqaleni, esamuzwayo ekhuluma, sambona ngawethu, samkhangelisisa futhi samthinta ngezandla zethu. Silibhalela mayelana lelizwi lokuphila.+ 2 (Phela ukuphila kwabonakaliswa. Sikubonile lokhu futhi siyafakaza+ silibikela ukuthi ukuphila okungapheliyo+ okwakukuBaba kwabonakaliswa kithi.) 3 Sesilibikela ngalokho esakubonayo lesakuzwayo+ ukuze lani libe lobudlelwano* lathi. Ebudlelwaneni lobo kuloBaba leNdodana yakhe uJesu Khristu.+ 4 Sibhala izinto lezi ukuze injabulo yethu iphelele.
5 Nanti ilizwi esilibika kini esalizwa ngaye, lithi: UNkulunkulu uyikukhanya+ futhi akula ngitsho ubumnyama kuye. 6 Nxa sisithi, “Silobudlelwano* laye” kodwa thina siqhubeka sihamba emnyameni, siyabe siqamba amanga futhi singenzi okutshiwo liqiniso.+ 7 Kodwa nxa sihamba ekukhanyeni njengoba yena esekukhanyeni, silobudlelwano laye njalo igazi leNdodana yakhe uJesu liyasihlambulula kuzo zonke izono.+
8 Nxa sisithi, “Asilasono,” siyaziyenga+ futhi iqiniso alikho kithi. 9 Kodwa nxa sivuma izono zethu, uyasithethelela njalo asihlambulule kukho konke okungalunganga njengoba yena ethembekile futhi elungile.+ 10 Nxa sisithi, “Kasonanga,” simenza umqambi wamanga njalo ilizwi lakhe alikho kithi.
2 Bantwanyana bami, ngilibhalela izinto lezi ukuze lingasenzi isono. Kodwa nxa loba ngubani angenza isono, silomsizi* kuBaba. Umsizi lo nguJesu Khristu+ olungileyo+ 2 njalo ungumhlatshelo+ wezono zethu+ owenza sibuyisane loNkulunkulu, hatshi owezethu kuphela kodwa lowezomhlaba wonke.+ 3 Nxa siqhubeka silalela imilayo yakhe kuzakhanya ukuthi sesimazi. 4 Lowo othi, “Sengimazi,” kodwa engayilaleli imilayo yakhe, uqamba amanga futhi iqiniso alikho kuye. 5 Kodwa loba ngubani olalela ilizwi lakhe, uthando lukaNkulunkulu seluphelelisiwe sibili+ kuye. Lokho kwenza sikwazi ukuthi simanyene laye.+ 6 Lowo othi uhlala emanyene laye ulomlandu wokuqhubeka ehamba ngendlela yena ayehamba ngayo.+
7 Bathandekayo, angilibhaleli umlayo omutsha kodwa ngilibhalela umlayo omdala ebelilokhu lilawo kusukela ekuqaleni.+ Umlayo lo omdala ulilizwi elalizwayo. 8 Ngilibhalela lomlayo omutsha, lowo yena ayewulandela futhi eliwulandelayo lani ngoba ubumnyama buyadlula njalo ukukhanya kweqiniso sekukhanya.+
9 Lowo othi usekukhanyeni kodwa ezonda+ umfowabo, ulokhu esemnyameni.+ 10 Lowo othanda umfowabo uqhubeka esekukhanyeni+ futhi akulanto engamkhuba. 11 Kodwa ozonda umfowabo usemnyameni njalo uhamba emnyameni.+ Kakwazi lapho aya khona+ ngoba ubumnyama sebumenze waba yisiphofu.
12 Bantwanyana, ngiyalibhalela ngoba izono zenu sezithethelelwe ngenxa yebizo lakhe.+ 13 Bobaba, ngiyalibhalela ngoba selimazi lowo owayekhona kusukela ekuqaleni. Majaha, lani ngiyalibhalela ngoba selimnqobile omubi.+ Ngibhalela lani bantwana abancane ngoba selimazi uBaba.+ 14 Ngiyalibhalela bobaba ngoba selimazi lowo owayekhona kusukela ekuqaleni. Majaha, lani ngiyalibhalela ngoba lilamandla+ futhi ilizwi likaNkulunkulu liqhubeka likini+ njalo selimnqobile omubi.+
15 Lingawuthandi umhlaba kumbe izinto ezisemhlabeni.+ Loba ngubani othanda umhlaba, uthando lukaBaba alukho kuye+ 16 ngoba konke okusemhlabeni—isifiso senyama+ lesifiso samehlo+ kanye lokuzigqaja ngalokho umuntu aziphilisa ngakho*—akuveli kuBaba kodwa kuvela emhlabeni. 17 Phezu kwalokho, umhlaba uyadlula lesifiso sawo+ kodwa lowo owenza intando kaNkulunkulu uzahlala ekhona kuze kube nini lanini.+
18 Bantwanyana sekulihora lokucina. Njengoba lezwa ukuthi umphikukhristu uyeza,+ lakanye sebebanengi abaphikukhristu+ futhi lokhu yikho okwenza sikwazi ukuthi sekulihora lokucina. 19 Lanxa baphuma phakathi kwethu, babengayisibo bethu+ ngoba aluba babengabethu babezaqhubeka belathi. Kodwa bona baphuma ukuze kukhanye ukuthi ayisibo bonke abangabethu.+ 20 Lina lagcotshwa ngulowo ongcwele+ njalo lonke lilolwazi. 21 Okwenza ngilibhalele ayisikho ukuthi kalilazi iqiniso,+ kodwa yikuthi liyalazi lokuthi akulamanga avela eqinisweni.+
22 Oqamba amanga akusilowo ophika ukuthi uJesu unguKhristu yini?+ Umuntu lo nguye umphikukhristu+ ophika uBaba leNdodana. 23 Wonke umuntu ophika iNdodana kalaye uBaba.+ Kodwa loba ngubani oyivumayo iNdodana+ ulaye uBaba.+ 24 Lokho elakuzwayo kusukela ekuqaleni kufanele kuqhubeke kukini.+ Nxa elakuzwa kusukela ekuqaleni kuqhubeka kukini, lani lizaqhubeka limanyene leNdodana futhi limanyene loBaba. 25 Kanti njalo usithembisa ukuphila okungapheliyo.+
26 Ngilibhalela izinto lezi ngikhuluma ngalabo abazama ukulidukisa. 27 Kodwa lina waligcoba+ futhi ukugcotshwa kwenu kuqhubeka kukini njalo alidingi muntu ukuthi alifundise. Ukugcotshwa nguye yikho okulifundisa zonke izinto+ futhi kuliqiniso, akusiwo manga. Njengoba nje kulifundisile, qhubekani limanyene laye.+ 28 Yikho-ke bantwanyana, qhubekani limanyene laye ukwenzela ukuthi nxa esebonakaliswa sibe lenkululeko yokukhuluma+ njalo singabuyeli emuva sesiyangekile ngesikhathi sokuba khona kwakhe. 29 Nxa likwazi ukuthi yena ulungile, liyakwazi lokuthi wonke umuntu owenza okulungileyo uzelwe nguye.+
3 Khangelani ukuthi uBaba wasithanda njani+ saze sabizwa ngokuthi singabantwana bakaNkulunkulu!+ Singabantwabakhe sibili. Yikho umhlaba ungasazi+ thina ngoba awukamazi yena.+ 2 Bathandekayo, khathesi sesingabantwana bakaNkulunkulu+ kodwa akukavezwa ukuthi sizabe sinjani.+ Esikwaziyo yikuthi nxa esebonakaliswa sizakuba njengaye ngoba sizambona enjengoba enjalo. 3 Bonke ababeke ithemba leli kuye bayazihlambulula+ njengoba laye ehlambulukile.
4 Wonke umuntu owenza isono uyabe esephula umthetho, ngakho isono siyikwephula umthetho. 5 Liyakwazi lokuthi wabonakaliswa ukuze asuse izono zethu+ njalo yena kalasono. 6 Wonke umuntu ohlala emanyene laye kaqhubeki esenza isono,+ loba ngubani oqhubeka esenza isono kakamboni futhi kakamazi. 7 Bantwanyana, akungabi lomuntu olidukisayo. Lowo oqhubeka esenza okulungileyo ulungile njengaye olungileyo. 8 Kodwa oqhubeka esona uvela kuDeveli ngoba uDeveli ubesona kusukela ekuqaleni.*+ Yikho iNdodana kaNkulunkulu yabonakaliswa ukuze ibhidlize imisebenzi kaDeveli.+
9 Wonke umuntu ozelwe nguNkulunkulu kaqhubeki esenza isono+ ngoba inhlanyelo* kaNkulunkulu ihlala emuntwini onjalo. Ngeke aqhubeke esenza isono ngoba usezelwe nguye.+ 10 Abantwana bakaNkulunkulu labantwana bakaDeveli bakhanya ngalokhu: Loba ngubani ongaqhubeki esenza okulungileyo longamthandiyo umfowabo kaveli kuNkulunkulu+ 11 ngoba ilizwi ebelilizwa kusukela ekuqaleni ngelokuthi kumele sithandane,+ 12 singenzi njengoKhayini owavela komubi wabulala umfowabo.+ Wambulalelani? Wambulalela ukuthi eyakhe imisebenzi yayimibi+ kodwa eyomfowabo ilungile.+
13 Bafowethu, akungalimangalisi ukuthi umhlaba uyalizonda.+ 14 Siyakwazi ukuthi sesisukile ekufeni saya ekuphileni+ ngoba siyabathanda abafowethu.+ Lowo ongelathando ulokhu efile.+ 15 Wonke umuntu ozonda umfowabo ungumbulali+ njalo liyakwazi ukuthi ukuphila okungapheliyo akuqhubeki kusemuntwini ongumbulali.+ 16 Yikho-ke sesilwazi uthando ngoba yena wanikela ngokuphila kwakhe* ngenxa yethu.+ Lathi silomlandu wokunikela ngokuphila kwethu* ngenxa yabafowethu.+ 17 Loba ngubani olezinto zokuziphilisa zomhlaba lo obona umfowabo eswela kodwa angamzweli, uyabe emthanda yini uNkulunkulu?+ 18 Bantwanyana, akumelanga sithande ngelizwi kumbe ngomlomo*+ kuphela, kodwa kumele sithande ngezenzo+ langeqiniso.+
19 Lokhu kuzakwenza sikwazi ukuthi sivela eqinisweni njalo sizaqinisekisa inhliziyo zethu phambi kwakhe 20 kuloba yikuphi inhliziyo zethu ezingasisola ngakho, ngoba uNkulunkulu mkhulu kulezinhliziyo zethu njalo wazi izinto zonke.+ 21 Bathandekayo, nxa inhliziyo zethu zingasisoli siba lenkululeko yokukhuluma loNkulunkulu,+ 22 futhi loba yini esiyicela kuye siyayithola+ ngoba siyayilalela imilayo yakhe njalo senza okumthokozisayo. 23 Umlayo wakhe ngowokuthi sibe lokholo ebizweni leNdodana yakhe uJesu Khristu+ futhi sithandane+ njengoba nje wasitshela ukuthi senze njalo. 24 Phezu kwalokho, lowo olalela imilayo yakhe uhlala emanyene laye futhi laye uhlala emanyene lalowomuntu.+ Ngenxa yomoya asinika wona, siyakwazi ukuthi uhlala emanyene lathi.+
4 Bathandekayo, lingaze lakholwa wonke amazwi aphefumulelweyo+ kodwa wahloleni ukuze libone ukuthi avela kuNkulunkulu yini+ ngoba sebebanengi abaphrofethi bamanga emhlabeni.+
2 Nansi indlela elizakwazi ngayo ukuthi ilizwi eliphefumulelweyo livela kuNkulunkulu: Loba yiliphi ilizwi eliphefumulelweyo elivuma ukuthi uJesu Khristu weza emhlabeni engumuntu* livela kuNkulunkulu.+ 3 Kodwa wonke amazwi aphefumulelweyo angamvumiyo uJesu kawaveli kuNkulunkulu.+ Phezu kwalokho, leli yilo ilizwi eliphefumulelweyo elikhulunywa ngumphikukhristu elezwa ukuthi liyeza+ futhi eselikhona khathesi emhlabeni.+
4 Bantwanyana, lina livela kuNkulunkulu njalo selibanqobile+ ngoba lowo omanyene lani+ mkhulu kulalowo omanyene lomhlaba.+ 5 Bona bavela emhlabeni,+ yikho bekhuluma okuvela emhlabeni futhi umhlaba uyabalalela.+ 6 Thina sivela kuNkulunkulu. Loba ngubani omaziyo uNkulunkulu uyasilalela+ kodwa loba ngubani ongaveli kuNkulunkulu kasilaleli.+ Le yiyo indlela esehlukanisa ngayo ilizwi eliphefumulelweyo eliliqiniso lelizwi eliphefumulelweyo elingamanga.+
7 Bathandekayo, kasiqhubekeni sithandana+ ngoba uthando luvela kuNkulunkulu futhi wonke umuntu olothando uzelwe nguNkulunkulu njalo uyamazi uNkulunkulu.+ 8 Loba ngubani ongelathando kakamazi uNkulunkulu ngoba uNkulunkulu uluthando.+ 9 Nansi indlela okwakhanya ngayo ukuthi uNkulunkulu uyasithanda: UNkulunkulu wathuma iNdodana yakhe ezelwe yodwa+ ukuthi ize emhlabeni ukuze sithole ukuphila ngayo.+ 10 Nanku okutshiwo luthando lolu: Ayisikho ukuthi thina yithi esamthandayo uNkulunkulu kodwa yena nguye owasithandayo wathuma iNdodana yakhe ukuthi izokuba ngumhlatshelo+ wezono zethu+ owenza sibuyisane laye.
11 Bathandekayo, nxa uNkulunkulu wasithanda ngalindlela, lathi silomlandu wokuthi sithandane.+ 12 Kakho owake wabona uNkulunkulu loba nini.+ Nxa singaqhubeka sithandana, uNkulunkulu uzahlala ekithi lothando lwakhe luzakwenziwa luphelele kithi. + 13 Okwenza sikwazi ukuthi sihlala simanyene laye lokuthi laye uhlala emanyene lathi yikuthi usinike umoya wakhe. 14 Phezu kwalokho, thina sizibonele futhi siyafakaza ukuthi uBaba uyithumile iNdodana yakhe ukuthi ibe ngumsindisi womhlaba.+ 15 Loba ngubani ovumayo ukuthi uJesu uyiNdodana kaNkulunkulu,+ uNkulunkulu uhlala emanyene lalowomuntu futhi laye uhlala emanyene loNkulunkulu.+ 16 Sesikwazi njalo sesikholwa ukuthi uNkulunkulu uyasithanda.+
UNkulunkulu uluthando+ futhi lowo ohlala elothando uhlala emanyene loNkulunkulu njalo uNkulunkulu uhlala emanyene laye.+ 17 Ngalindlela uthando selwenziwe lwaphelela kithi, ukuze ngosuku lokwahlulela sibe lenkululeko yokukhuluma*+ ngoba njengoba lowo enjalo, lathi sinjalo emhlabeni lo. 18 Ethandweni akulakwesaba.+ Uthando olupheleleyo luxotsha ukwesaba ngoba ukwesaba kuyasivimbela. Nxa umuntu esesaba, uthando lwakhe alukapheleliswa.+ 19 Siyathanda ngoba yena wasithanda kuqala.+
20 Nxa umuntu esithi, “Ngiyamthanda uNkulunkulu,” kodwa ezonda umfowabo, uqamba amanga+ ngoba lowo ongamthandiyo umfowabo+ ambonayo ngeke amthande uNkulunkulu angakaze ambone.+ 21 Silomlayo lo ovela kuye, othi loba ngubani othanda uNkulunkulu kufanele athande lomfowabo.+
5 Wonke umuntu okholwa ukuthi uJesu unguKhristu uzelwe nguNkulunkulu,+ njalo wonke umuntu othanda umzali uyamthanda lalowo ozelwe nguye. 2 Okwenza sikwazi ukuthi siyabathanda abantwana bakaNkulunkulu+ yikuthi siyamthanda uNkulunkulu futhi silandela imilayo yakhe. 3 Ukuthanda uNkulunkulu kutsho ukulalela imilayo yakhe+ njalo imilayo yakhe kayinzima+ 4 ngoba wonke umuntu ozelwe* nguNkulunkulu uyawunqoba umhlaba.+ Ukholo lwethu selusenze sanqoba umhlaba.+
5 Ngubani onganqoba umhlaba?+ Akusilowo okholwa ukuthi uJesu uyiNdodana kaNkulunkulu yini?+ 6 Lo nguye oweza ngamanzi langegazi, uJesu Khristu. Kezanga ngamanzi kuphela+ kodwa weza ngamanzi langegazi+ futhi umoya uyakufakazela+ lokho ngoba umoya uliqiniso. 7 Kulabofakazi abathathu: 8 umoya+ lamanzi+ legazi,+ futhi lokhu kokuthathu kuyavumelana.
9 Siyabamukela ubufakazi obuvela ebantwini, kodwa ubufakazi obuvela kuNkulunkulu bona bukhulu kulalobo ngoba ubufakazi bakhe buyilokho akufakazayo mayelana leNdodana yakhe. 10 Umuntu okholwa eNdodaneni kaNkulunkulu ulobufakazi ngaphakathi kwakhe. Umuntu ongakholwayo kuNkulunkulu usemenze oqamba amanga+ ngoba kazange abukholwe ubufakazi obuvela kuNkulunkulu obumayelana leNdodana yakhe. 11 Ubufakazi bakhona yilobu: UNkulunkulu wasinika ukuphila okungapheliyo+ njalo ukuphila lokho kuseNdodaneni yakhe.+ 12 OleNdodana ulakho ukuphila lokhu, kodwa ongelayo iNdodana kaNkulunkulu kalakho.+
13 Ngilibhalela izinto lezi ukuze likwazi ukuthi lilakho ukuphila okungapheliyo+ lina elikholwa ebizweni leNdodana kaNkulunkulu.+ 14 Nanku esimthemba ngakho:*+ Nxa sicela loba yini evumelana lentando yakhe uyasizwa.+ 15 Nxa sikwazi ukuthi uyasizwa kuloba yini esiyicela kuye, siyakwazi ukuthi sizazithola izinto esizicelayo njengoba siyabe sizicele kuye.+
16 Nxa umuntu engabona umfowabo esenza isono esingalethi ukufa kumele amthandazele, uNkulunkulu abesemnika ukuphila.+ Lokho ngokwabangenzanga isono esiletha ukufa. Kodwa kulesono esiletha ukufa+ futhi angitsho ukuthi umuntu owenza isono esinjalo kumele athandazelwe. 17 Konke okungalunganga kuyisono,+ kodwa sikhona isono esingalethi ukufa.
18 Siyakwazi ukuthi wonke umuntu ozelwe nguNkulunkulu kaqhubeki esenza isono kodwa ulindwa ngulowo* ozelwe nguNkulunkulu, futhi uSathane* ngeke ambambe.*+ 19 Siyakwazi ukuthi thina singabakaNkulunkulu kodwa umhlaba wonke ungaphansi kwamandla kaSathane.*+ 20 Lanxa kunjalo, siyakwazi ukuthi iNdodana kaNkulunkulu seyabuya.+ Isinike ukuqedisisa ukuze simazi oqinisileyo njalo simanyene lalowo oqinisileyo+ ngenxa yeNdodana yakhe uJesu Khristu. UnguNkulunkulu weqiniso futhi uyikuphila okungapheliyo.+ 21 Bantwanyana, xwayani izithombe.+
Kumbe, “lihlanganyele.”
Kumbe, “Sihlanganyela.”
Kumbe, “silommeli.”
Kumbe, “ngempahla umuntu alayo.”
Kumbe, “kusukela eqalisa.”
Lapha kutshiwo inhlanyelo eveza abantwana kumbe ethelayo.
Kumbe, “ngomphefumulo wakhe.”
Kumbe, “ngemiphefumulo yethu.”
NgesiGrikhi, “ngolimi.”
NgesiGrikhi, “eyinyama.”
Kumbe, “sibe lesibindi.”
Kumbe, “konke okuzelwe.”
Kumbe, “Nansi inkululeko yokukhuluma laye esilayo.”
Lapha kutshiwo uJesu Khristu, iNdodana kaNkulunkulu.
NgesiGrikhi, “omubi.”
Kumbe, “amthinte.”
NgesiGrikhi, “omubi.”