ISAMBULO KUJOHANE

1 Isambulo* esethulwa nguJesu Khristu, asiphiwa nguNkulunkulu+ ukuze atshengise izinceku zakhe+ izinto okufanele zenzakale masinyane. Wathuma ingilosi yakhe, wethula ngayo isambulo leso encekwini yakhe uJohane+ esebenzisa izibonakaliso. 2 Inceku le yafakaza ilizwi likaNkulunkulu kanye lobufakazi bukaJesu Khristu, ifakaza zonke izinto eyazibonayo. 3 Uyathokoza obalela phezulu amazwi alesisiphrofetho lalabo abawezwayo kanye labenza izinto ezibhalwe kuso+ ngoba isikhathi esibekiweyo sesiseduze.

4 Mina Johane ngibhalela amabandla ayisikhombisa+ asesabelweni sase-Asiya:

Kawube kini umusa omkhulu lokuthula okuvela “kulowo okhona lowayekhona lozayo,”+ kanye lasemimoyeni eyisikhombisa+ ephambi kwesihlalo sakhe sobukhosi, 5 lakuJesu Khristu, “uFakazi Othembekileyo,”+ “izibulo ekuvusweni kwabafileyo”+ futhi “onguMbusi wamakhosi omhlaba.”+

Kulowo osithandayo+ njalo owasikhulula ezonweni zethu ngegazi lakhe+ 6 wasenza saba ngumbuso+ labaphristi+ kuNkulunkulu wakhe loYise, kayibe kuye inkazimulo lamandla kuze kube nini lanini. Ameni.

7 Khangelani! Uyeza ngamayezi+ njalo amehlo abo bonke abantu azambona. Lalabo abamgwazayo bazambona futhi izizwana zonke ezisemhlabeni zizazitshaya ezifubeni zilila ngenxa yakhe.+ Lokhu kuzakwenzakala sibili. Ameni.

8 “Ngingu-Alfa lo-Omega,”*+ kutsho uJehova* uNkulunkulu, “Lowo okhona lowayekhona lozayo, uSomandla.”+

9 Mina Johane umfowenu olani ekuhluphekeni+ lasembusweni+ lasekuqiniseleni+ simanyene loJesu,+ ngangisesihlengeni esithiwa yiPhathimosi ngenxa yokukhuluma ngoNkulunkulu lokufakaza ngoJesu. 10 Ngaphefumulelwa ngaba sosukwini lweNkosi njalo ngezwa ilizwi ngemva kwami elalilamandla njengecilongo, 11 lisithi: “Okubonayo kubhale encwadinimgoqwa uyithumele emabandleni la ayisikhombisa: i-Efesu,+ leSimina,+ lePhegamu,+ leThiyathira,+ leSadisi,+ leFiladelifiya+ kanye leLawodikheya.”+

12 Ngatshibilika ngakhangela ukuthi ngubani owayekhuluma lami. Ngathi ngitshibilika ngabona izinti zezibane zegolide eziyisikhombisa+ 13 futhi phakathi laphakathi kwezinti lezo kwakulomuntu onjengendodana yomuntu+ egqoke isembatho esasiside sitshaya enyaweni, ebophe lebhanti legolide esifubeni sakhe. 14 Kanti njalo ikhanda lenwele zakhe kwakumhlophe angathi yiwulu emhlophe, kumhlophe nke njengongqwaqwane futhi amehlo akhe ayengathi lilangabi lomlilo ovuthayo.+ 15 Inyawo zakhe zazingathi yikhopha elohlonzi+ ecazimulayo ephakathi kwesithando somlilo njalo ilizwi lakhe lalingathi yikuhuba kwamanzi amanengi. 16 Esandleni sakhe sokudla wayephethe inkanyezi eziyisikhombisa+ njalo emlonyeni wakhe kwakuphuma inkemba ende, ebukhali esika inxa zombili.+ Ubuso bakhe babungathi lilanga likhanya ngenkazimulo yalo yonke.+ 17 Ngathi ngimbona ngawela phansi phambi kwenyawo zakhe, ngaba njengomuntu ofileyo.

Wasebeka isandla sakhe sokudla phezu kwami wathi: “Ungesabi. NgingowokuQala+ lowokuCina+ 18 njalo ngingophilayo.+ Ngangifile+ kodwa khangela, khathesi sengiphila kuze kube nini lanini+ futhi ngilamakhiye okufa lawengcwaba.+ 19 Ngakho bhala phansi izinto ozibonileyo lezinto ezenzakala khathesi lezinto ezizakwenzakala ngemva kwalezi. 20 Nansi imfihlo engcwele yezinkanyezi eziyisikhombisa ozibone esandleni sami sokudla, leyezinti zezibane zegolide eziyisikhombisa: Izinkanyezi eziyisikhombisa zimela izingilosi zamabandla ayisikhombisa futhi izinti zezibane eziyisikhombisa zimela amabandla ayisikhombisa.+

2 “Ingilosi+ yebandla lase-Efesu+ yibhalele uthi: Nanku okutshiwo ngulowo ophethe inkanyezi eziyisikhombisa esandleni sakhe sokudla njalo ohamba phakathi kwezinti zezibane zegolide eziyisikhombisa:+ 2 ‘Ngiyazazi izenzo zakho lemisebenzi yakho, lokuqinisela kwakho lokuthi awubabekezeleli ababi njalo wabahlola labo abazithi bangabaphostoli+ bona bengayisibo, wasuthola ukuthi bangosomangase. 3 Utshengisa lokuthi uyaqinisela futhi ubulokhu uphikelela ngenxa yebizo lami+ njalo kawuzange uphele amandla.+ 4 Kodwa engikusola ngakho yikuthi usuludelile uthando owawulalo kuqala.

5 “‘Ngakho khumbula ukuthi uwe usuka ngaphi, ubusuphenduka+ wenze izinto owawuzenza kuqala. Ungayekela ukwenza njalo ngizabuya kuwe ngikhiphe uluthi lwakho lwesibane+ endaweni yalo, ngaphandle nxa ungaphenduka.+ 6 Kodwa okuhle ngawe yikuthi uyazizonda izenzo zeqembu likaNikholayi,+ engizizondayo lami. 7 Olendlebe kezwe ukuthi umoya uthini emabandleni:+ Onqobayo+ ngizamvumela ukuthi adle esihlahleni sokuphila+ esisepharadayisi likaNkulunkulu.’

8 “Ingilosi yebandla leSimina yona yibhalele uthi: Nanzi izinto azitshoyo, ‘owokuQala lowokuCina,’+ lowo owafayo waphinda wavuka:+ 9 ‘Ngiyakwazi ukuhlupheka kwakho lobuyanga bakho, kodwa unothile.+ Ngiyakwazi lokuthuka kwalabo abazibiza ngokuthi bangamaJuda bona bengayisiwo, belisinagogi likaSathane.+ 10 Ungazesabi inhlupho esezizakwehlela.+ Lalela! UDeveli uzaqhubeka ephosela abanye benu ejele ukuze lihlolwe ngokugcweleyo futhi lizahlupheka okwamalanga alitshumi. Wena tshengisa ukuthi uthembekile kuze kube sekufeni. Ungenza njalo, ngizakupha umqhele wokuphila.+ 11 Olendlebe kezwe+ ukuthi umoya uthini emabandleni: Onqobayo+ kasoze afe ukufa kwesibili loba sekutheni.’+

12 “Ingilosi yebandla lasePhegamu yibhalele uthi: Nanku okutshiwo ngulowo olenkemba ende, ebukhali esika inxa zombili:+ 13 ‘Ngiyakwazi lapho ohlala khona. Uhlala lapho okulesihlalo sobukhosi sikaSathane kodwa uqhubeka ubambelele ebizweni lami+ njalo awuzange uphike ukuthi ulokholo kimi,+ ngitsho lasensukwini zika-Antiphasi ufakazi wami owayethembekile+ owabulawa+ phakathi kwenu, lapho okuhlala khona uSathane.

14 “‘Lanxa kunjalo, kulokulutshwana engikusolayo kuwe, ukuthi ulabantu abanamathele emfundisweni kaBhalamu+ owafundisa uBhalakhi+ ukuthi abeke isikhubekiso phambi kwabantu bako-Israyeli, esokuthi badle izinto ezihlatshelwe izithombe futhi bafebe.*+ 15 Lawe ulabo abanamathele emfundisweni yeqembu likaNikholayi.+ 16 Ngakho phenduka. Ungayekela ukuphenduka ngizabuya kuwe masinyane njalo ngizakulwa labo ngenkemba yomlomo wami ende.+

17 “‘Olendlebe kezwe ukuthi umoya uthini emabandleni:+ Onqobayo+ ngizamcuphela imana efihliweyo,+ ngimuphe lelitshe elimhlophe. Ilitshe lelo libhalwe ibizo elitsha elaziwa ngulowo olamukelayo kuphela.’

18 “Ingilosi yebandla laseThiyathira+ yibhalele uthi: Nanku okutshiwo yiNdodana kaNkulunkulu, leyo elamehlo anjengelangabi lomlilo ovuthayo+ kanye lenyawo ezingathi yikhopha elohlonzi:+ 19 ‘Ngiyazazi izenzo zakho, lothando lwakho, lokholo lwakho, lenkonzo yakho, lokuqinisela kwakho kanye lokuthi khathesi izenzo zakho sezisedlula ezokuqala.

20 “‘Kodwa engikusola ngakho yikuthi uyambekezelela owesifazana lo okuthiwa nguJezebheli+ ozibiza ngokuthi ngumphrofethikazi, ofundisa izinceku zami eziyenga ukuthi zifebe*+ lokuthi zidle izinto ezihlatshelwe izithombe. 21 Ngamnika isikhathi sokuphenduka kodwa yena kafuni ukuphenduka, ulokhu efeba.* 22 Lalela! Sengizamphosela embhedeni wokugula njalo abafeba laye ngizabaphosela ekuhluphekeni okukhulu ngaphandle nxa bangatshiya izenzo zakhe baphenduke. 23 Kanti njalo ngizabulala abantwabakhe ngomkhuhlane obulalayo ukuze wonke amabandla akwazi ukuthi yimi engihlola imicabango ejulileyo* kanye lezinhliziyo futhi ngamunye wenu ngizamupha lokho okuhambelana lezenzo zakhe.+

24 “‘Kodwa kwabanye bonke abaseThiyathira, bonke nje abangayilandeliyo imfundiso le futhi abangazange bakwazi lokho okubizwa ngokuthi “yizinto zikaSathane ezijulileyo” ngithi:+ Kangilethesi omunye umthwalo. 25 Loba kunjalo, bambelelani kulokho elilakho ngize ngibuye.+ 26 Lowo onqobayo alandele izenzo zami kuze kube sekucineni ngizamupha amandla phezu kwezizwe.+ 27 Uzakwelusa abantu ngentonga yensimbi+ njalo bazaphahlazwa babe yizicucu njengesitsha sebumba njengoba nje ngamukela amandla kuBaba. 28 Kanti njalo ngizamupha indonsakusa.+ 29 Olendlebe kezwe ukuthi umoya uthini emabandleni.’

3 “Ingilosi yebandla leSadisi yibhalele uthi: Nanku okutshiwo ngulowo olemimoya kaNkulunkulu eyisikhombisa+ kanye lenkanyezi eziyisikhombisa:+ ‘Ngiyazazi izenzo zakho, ukuthi waziwa ngokuthi uyaphila kodwa ufile.+ 2 Phaphama+ uqinise izinto eziseleyo ebesezizakufa ngoba imisebenzi yakho kangizange ngiyithole yenziwe ngokupheleleyo* phambi kukaNkulunkulu wami. 3 Ngakho qhubeka ukhumbula owakwamukelayo lowakuzwayo, uqhubeke ukugcinile futhi uphenduke.+ Ngiqinisile sibili ngithi nxa ungayekela ukuphaphama ngizafika njengesela+ njalo ihora engizafika ngalo kuwe awusoze ulazi ngitsho.+

4 “‘Lanxa kunjalo, ulabo abalutshwana* eSadisi abangazange bangcolise izembatho zabo.+ Bazahamba lami begqoke ezimhlophe+ ngoba lokho kubafanele. 5 Yikho onqobayo+ uzagqokiswa izembatho ezimhlophe+ lebizo lakhe kangisoze ngilicitshe* ebhukwini lokuphila+ loba sekutheni kodwa ngizalivuma ibizo lakhe phambi kukaBaba laphambi kwezingilosi zakhe.+ 6 Olendlebe kezwe ukuthi umoya uthini emabandleni.’

7 “Ingilosi yebandla laseFiladelifiya yibhalele uthi: Nanku okutshiwo ngulowo ongcwele+ loleqiniso,+ olekhiye kaDavida,+ ovula kungabi lomuntu ongavala, avale kungabi lomuntu ongavula: 8 ‘Ngiyazazi izenzo zakho. Khangela! Sengifake phambi kwakho umnyango ovulekileyo+ njalo kakho ongawuvala. Ngiyakwazi ukuthi ulamandla amancane lokuthi uligcinile ilizwi lami njalo awuzange uliphike ibizo lami. 9 Lalela! Abesinagogi likaSathane abazithi bangamaJuda bona bengayisiwo+ beqamba amanga, ngizabenza babuye bazokhothama phambi kwenyawo zakho futhi ngizakwenza bakwazi ukuthi ngikuthandile. 10 Ngenxa yokuthi uligcinile ilizwi elimayelana lokuqinisela kwami,*+ lami ngizakugcina ngehora lokuhlolwa+ elizafikela umhlaba wonke ukuze kuhlolwe abahlala emhlabeni. 11 Ngiyeza masinyane.+ Qhubeka ubambelele kulokho olakho ukuze angabi khona othatha umqhele wakho.+

12 “‘Onqobayo ngizamenza abe yinsika ethempelini likaNkulunkulu wami futhi kasoze aphinde aphume kulo loba sekutheni. Ngizabhala phezu kwakhe ibizo likaNkulunkulu wami lebizo ledolobho likaNkulunkulu wami,+ iJerusalema Elitsha+ elehla livela ezulwini kuNkulunkulu wami, ngibhale lebizo lami elitsha.+ 13 Olendlebe kezwe ukuthi umoya uthini emabandleni.’

14 “Ingilosi yebandla laseLawodikheya+ yibhalele uthi: Nanku okutshiwo ngu-Ameni,+ ufakazi+ othembekileyo loleqiniso,+ oyisiqalo sezinto zonke ezadalwa nguNkulunkulu:+ 15 ‘Ngiyazazi izenzo zakho, ukuthi kawuqandi njalo kawutshisi. Ngifisa ukuthi ngabe uyaqanda kumbe uyatshisa. 16 Ngakho njengoba uzikhudumalela nje ungatshisi+ futhi ungaqandi,+ ngizakukhafula uphume emlonyeni wami. 17 Wena uthi, “Nginothile,+ sengazitholela inotho njalo kangisweli lutho ngitsho” kodwa kawukwazi ukuthi uyazihawulela futhi uzwisa usizi, ungumyanga, uyisiphofu njalo unqunu, yikho 18 ngikucebisa ukuthi uthenge kimi igolide elicengwe ngomlilo ukuze unothe. Uthenge lezembatho ezimhlophe ugqoke ukuze ihlazo lobunqunu bakho lingavezwa egcekeni+ njalo uthenge lomuthi wamehlo uwuhlikihlele emehlweni akho+ ukuze ubone.+

19 “‘Bonke engibathandayo ngiyabakhuza ngibalaye.+ Ngakho tshiseka uphenduke.+ 20 Khangela! Ngimi emnyango ngiyaqoqoda. Loba ngubani ozwa ilizwi lami abesevula umnyango ngizangena endlini yakhe ngidle laye ukudla kwantambama, laye adle lami. 21 Onqobayo+ ngizamvumela ukuthi ahlale lami esihlalweni sami sobukhosi,+ njengoba lami nganqoba ngasengihlala+ loBaba esihlalweni sakhe sobukhosi. 22 Olendlebe kezwe ukuthi umoya uthini emabandleni.’”

4 Ngemva kwalokho ngakhangela ngabona umnyango owawuvulekile ezulwini njalo ilizwi lokuqala engalizwa likhuluma lami lalizwakala njengecilongo, lisithi: “Woza ngapha phezulu ngizakutshengisa izinto okumele zenzakale.” 2 Ngemva kwalokho umoya kaNkulunkulu waqalisa ukusebenza kimi, ngasengibona isihlalo sobukhosi sisendaweni yaso ezulwini futhi kwakulomuntu owayehlezi kuso.+ 3 Lowo owayehlezi kuso wayekhazimula angathi lilitshe lejaspa+ lelitshe lesadiyasi* futhi isihlalo sobukhosi sasigonjolozelwe ngumchilowamakhosikazi owawufanana le-emeraldi.+

4 Isihlalo sobukhosi lesi sasigonjolozelwe yizihlalo zobukhosi ezingu-24 njalo ngabona abadala abangu-24+ behlezi kulezozihlalo zobukhosi begqoke izembatho ezimhlophe, belemiqhele yegolide emakhanda abo. 5 Esihlalweni sobukhosi kwakuphuma umbane+ lamazwi kanye lemidumo yezulu+ njalo kwakulezibane zomlilo eziyisikhombisa ezazibhebha phambi kwesihlalo sobukhosi. Izibane lezi zimela imimoya kaNkulunkulu eyisikhombisa.+ 6 Phambi kwesihlalo sobukhosi kwakulento enjengolwandle lwengilazi+ njalo yayinjengelitshe lekhristali.

Phakathi kwesihlalo sobukhosi* lasemaceleni aso wonke kwakulezidalwa ezine eziphilayo+ ezazigcwele amehlo phambili langemuva. 7 Isidalwa esiphilayo sokuqala sasinjengesilwane,+ isidalwa esiphilayo sesibili sasinjengenkunzi,+ isidalwa esiphilayo sesithathu+ sona sasilobuso obunjengobomuntu njalo isidalwa esiphilayo sesine+ sasinjengokhozi+ oluphaphayo. 8 Ngasinye sezidalwa ezine eziphilayo sasilempiko eziyisithupha futhi zazigcwele amehlo yonke indawo langaphansi.+ Ubusuku lemini ziqhubeka zisithi: “Ungcwele, ungcwele, ungcwele uJehova*+ uNkulunkulu uSomandla, lowo owayekhona lokhona lozayo.”+

9 Zikhathi zonke nxa izidalwa eziphilayo zikhazimulisa lowo ohlezi esihlalweni sobukhosi, zimdumisa futhi zimbonga lowo ophila kuze kube nini lanini,+ 10 abadala abangu-24+ bayazilahla phansi phambi kwalowo ohlezi esihlalweni sobukhosi, bamkhonze lowo ophila kuze kube nini lanini njalo babeka imiqhele yabo phambi kwesihlalo sobukhosi bathi: 11 “Ufanele Jehova* Nkulunkulu wethu ukwamukela inkazimulo+ lodumo+ lamandla+ ngoba wadala zonke izinto+ njalo ngenxa yentando yakho zaba khona, zadalwa.”

5 Esandleni sokudla salowo owayehlezi esihlalweni sobukhosi+ ngabona kulencwadimgoqwa eyayibhalwe emaceleni womabili* njalo ivalwe yananyekwa ngezimpawu eziyisikhombisa. 2 Ngabona lengilosi elamandla imemeza ngelizwi elikhulu isithi: “Ngubani ofaneleyo ukuvula incwadimgoqwa lokuthukulula izimpawu zayo?” 3 Kodwa kakho loyedwa ezulwini lasemhlabeni langaphansi komhlaba owenelisa ukuvula incwadimgoqwa loba ukukhangela phakathi kwayo. 4 Ngakhala kabuhlungu ngoba akutholakalanga loyedwa okwakumfanele ukuvula incwadimgoqwa loba ukukhangela phakathi kwayo. 5 Kodwa omunye wabadala wathi kimi: “Thula ungakhali. Khangela! Isilwane sakoJuda,+ impande+ kaDavida+ isinqobile,+ yikho isingavula incwadimgoqwa kanye lezimpawu zayo eziyisikhombisa.”

6 Ngabona imvana+ imi phakathi* kwesihlalo sobukhosi laphakathi kwezidalwa ezine eziphilayo, laphakathi kwabadala.+ Yayikhanya angathi ibulewe+ futhi yayilempondo eziyisikhombisa lamehlo ayisikhombisa+ njalo amehlo la amela imimoya kaNkulunkulu eyisikhombisa ethunywe emhlabeni wonke. 7 Imvana yahle yeza phambili yathatha incwadimgoqwa esandleni sokudla salowo owayehlezi esihlalweni sobukhosi.+ 8 Ithe isithethe incwadimgoqwa, izidalwa ezine eziphilayo kanye labadala abangu-24+ bazilahla phansi phambi kweMvana njalo ngamunye wabo wayephethe ihabhu* kanye lemiganu yegolide eyayigcwele impepha. (Impepha imela imithandazo yabangcwele.)+ 9 Bahlabela ingoma entsha+ besithi: “Kukufanele ukuthatha incwadimgoqwa uvule izimpawu zayo ngoba wahlatshwa futhi ngegazi lakho wathengela uNkulunkulu abantu+ abavela kuzo zonke izizwana, lezindimi, lemihlobo yabantu kanye lezizwe+ 10 njalo wabenza baba ngumbuso+ labaphristi kuNkulunkulu wethu+ futhi bazakuba ngamakhosi+ babuse umhlaba.”

11 Ngaphinda ngabona izingilosi ezinengi zigombolozele isihlalo sobukhosi, lezidalwa eziphilayo kanye labadala futhi ngezwa amazwi azo. Inani lazo lalingamatshumi ezinkulungwane aphindwe ngamatshumi ezinkulungwane kanye lezinkulungwane zezinkulungwane.+ 12 Zazimemeza ngelizwi eliphezulu zisithi: “IMvana eyahlatshwayo+ ifanele ukwamukela amandla, lenotho, lokuhlakanipha, lokuqina, lodumo, lenkazimulo kanye lesibusiso.”+

13 Ngasengisizwa zonke izidalwa ezisezulwini lasemhlabeni langaphansi komhlaba+ laselwandle kanye lazo zonke izinto ezikhona kukho zisithi: “Isibusiso, lodumo,+ lenkazimulo, lamandla+ akube kulowo ohlezi esihlalweni sobukhosi+ lakuyo iMvana+ kuze kube nini lanini.” 14 Izidalwa ezine eziphilayo zazisithi: “Ameni!” Abadala bona basebezilahla phansi bakhonza.

6 Ngasengibona iMvana+ ivula olunye lwezimpawu eziyisikhombisa+ njalo ngezwa esinye sezidalwa ezine eziphilayo+ sikhuluma ngelizwi elinjengomdumo wezulu sisithi: “Woza!” 2 Ngabona lebhiza elimhlophe!+ Owayeligadile wayeledandili* futhi waphiwa umqhele,+ waphuma ehamba enqoba njalo esiyaqedisa ukunqoba kwakhe.+

3 Yathi ivula uphawu lwesibili ngezwa isidalwa esiphilayo sesibili+ sisithi: “Woza!” 4 Kwaphuma elinye ibhiza elalibomvu gebhu futhi owayeligadile wavunyelwa ukuthi asuse ukuthula emhlabeni ukuze abantu babulalane ngesihluku. Waphiwa lenkemba enkulu.+

5 Yathi ivula uphawu lwesithathu+ ngezwa isidalwa esiphilayo sesithathu+ sisithi: “Woza!” Ngasengibona nanto ibhiza elimnyama! Owayeligadile wayephethe isikali sokulinganisa esandleni sakhe. 6 Ngezwa okwakuzwakala angathi lilizwi eliphuma phakathi kwezidalwa ezine eziphilayo, lisithi: “Ilitha eyodwa yengqoloyi ngodenariyu,*+ lamalitha amathathu ebhali ngodenariyu futhi ungoni amafutha ama-oliva kanye lewayini.”+

7 Yathi ivula uphawu lwesine ngezwa ilizwi lesidalwa esiphilayo sesine+ lisithi: “Woza!” 8 Ngasengibona ibhiza eliliganu! Owayeligadile wayebizwa ngokuthi nguKufa futhi ingcwaba lalimlandela eduze. Baphiwa amandla phezu kwengxenye yesine yomhlaba ukuze babulale ngenkemba ende, langokuswelakala kokudla,+ langomkhuhlane obulalayo, langezinyamazana zeganga.+

9 Yathi ivula uphawu lwesihlanu ngabona ngaphansi kwe-alithare+ kulemiphefumulo*+ yalabo ababebulewe ngesihluku ngenxa yelizwi likaNkulunkulu langenxa yokufakaza kwabo.+ 10 Babememeza ngelizwi elikhulu besithi: “Kuzaze kube nini Nkosi Enkulu, engcwele leleqiniso+ uyekela ukwahlulela lokuphindisela igazi lethu kulabo abahlala emhlabeni?”+ 11 Ngamunye wabo waphiwa ijazi elimhlophe,+ batshelwa ukuthi baphumule kancane lize lenele inani labafowabo abazinceku njengabo, abasebezabulawa njengabo.+

12 Ngasengibona ivula uphawu lwesithupha. Kwaba lokuzamazama komhlaba okukhulu, ilanga laba mnyama njengesembatho sesaka esenziwe ngoboya,* lenyanga egcweleyo yaba njengegazi.+ 13 Izinkanyezi zezulu zawela emhlabeni angathi ngamakhiwane angakavuthwa ekhithika esihlahleni somkhiwa esinyikinywa ngumoya olamandla. 14 Izulu lasuswa angathi kugoqwa incwadimgoqwa+ njalo zonke izintaba lazo zonke izihlenge zasuswa endaweni yazo.+ 15 Amakhosi omhlaba, leziphathamandla eziphezulu, lezinduna zamabutho, labanothileyo, labalamandla, lezigqili zonke kanye labantu bonke abakhululekileyo bacatsha ezimbalwini lasemadwaleni ezintaba.+ 16 Babelokhu besithi ezintabeni lasemadwaleni: “Welani phezu kwethu+ lisifihle ebusweni balowo ohlezi esihlalweni sobukhosi+ kanye laselakeni lweMvana+ 17 ngoba usuku olukhulu lolaka lwabo selufikile.+ Ngubani ongalumela?”+

7 Ngemva kwalokho ngabona izingilosi ezine zimi emagumbini amane omhlaba, ziyibambe zayiqinisa imimoya emine yomhlaba ukuze kungabi lomoya ovunguzayo emhlabeni kumbe elwandle lakuloba yisiphi isihlahla. 2 Ngasengibona enye ingilosi ikhwela ivela empumalanga ilophawu lukaNkulunkulu ophilayo. Yamemeza ngelizwi elikhulu ikhuluma lezingilosi ezine ezazivunyelwe ukuthi zilimaze umhlaba lolwandle, 3 yathi: “Lingawulimazi umhlaba loba ulwandle loba izihlahla size sifake uphawu+ emabunzini+ ezinceku zikaNkulunkulu wethu.”

4 Ngasengisizwa inani lalabo ababefakwe uphawu. Babeyi-144 000+ njalo babevela kuzo zonke izizwana zamadodana ako-Israyeli:+

9 Ngemva kwalokho ngabona ixuku elikhulu njalo kakho owayengenelisa ukulibala! Laliphuma kuzo zonke izizwe, lezizwana, labantu kanye lezindimi+ futhi lalimi phambi kwesihlalo sobukhosi laphambi kweMvana ligqoke izembatho ezimhlophe,+ liphethe ingatsha zelala ezandleni.+ 10 Ixuku leli liqhubeka limemeza ngelizwi elikhulu lisithi: “Insindiso ivela kuNkulunkulu wethu ohlezi esihlalweni sobukhosi,+ lakuyo iMvana.”+

11 Zonke izingilosi zazimi zigombolozele isihlalo sobukhosi labadala+ kanye lezidalwa ezine eziphilayo njalo zazilahla phansi zakhothama phambi kwesihlalo sobukhosi zakhonza uNkulunkulu, 12 zisithi: “Ameni! Udumo, lenkazimulo, lokuhlakanipha, lokubonga, lenhlonipho, lamandla lokuqina akube kuNkulunkulu wethu kuze kube nini lanini.+ Ameni.”

13 Omunye wabadala wasesithi kimi: “Kanti laba abagqoke izembatho ezimhlophe+ ngobani njalo bavela ngaphi?” 14 Mina ngahle ngathi kuye: “Nguwe okwaziyo nkosi yami.” Yena wathi kimi: “Laba yibo abaphuma ekuhluphekeni okukhulu+ njalo sebegezise izembatho zabo egazini leMvana,+ bazenza zaba mhlophe. 15 Yikho bephambi kwesihlalo sobukhosi sikaNkulunkulu njalo bemenzela inkonzo engcwele ethempelini lakhe emini lebusuku futhi lowo ohlezi esihlalweni sobukhosi+ uzakwelulela itende lakhe phezu kwabo.+ 16 Ngeke baphinde balambe njalo ngeke baphinde bome, lelanga kalisoze libahangule futhi ukutshisa okuvuthayo akusoze kubaxathule+ 17 ngoba iMvana+ ephakathi* kwesihlalo sobukhosi izabelusa,+ ibakhokhele ibase emithonjeni yamanzi okuphila+ njalo uNkulunkulu uzakwesula zonke izinyembezi emehlweni abo.”+

8 IMvana+ yathi ivula uphawu lwesikhombisa,+ kwathula kwathi cwaka ezulwini phose okwengxenye yehora. 2 Ngasengibona izingilosi eziyisikhombisa+ ezima phambi kukaNkulunkulu futhi zaphiwa amacilongo ayisikhombisa.

3 Enye ingilosi eyayibambe isitsha segolide sokutshisela impepha yafika yama e-alithareni+ yaphiwa impepha enengi+ ukuze inikele ngayo phezu kwe-alithare legolide+ elaliphambi kwesihlalo sobukhosi ngesikhathi kulalelwe imithandazo yabo bonke abangcwele. 4 Intuthu yempepha eyayisesandleni sengilosi kanye lemithandazo+ yabangcwele kwaphakama kwaya phezulu phambi kukaNkulunkulu. 5 Kodwa ingilosi yahle yathatha isitsha sokutshisela impepha yasigcwalisa ngomlilo ovela e-alithareni, yawuphosela emhlabeni. Kwezwakala imidumo yezulu, lamazwi, kwaphazima umbane+ njalo umhlaba wazamazama. 6 Izingilosi eziyisikhombisa ezazilamacilongo ayisikhombisa+ zalungiselela ukuwatshaya.

7 Eyokuqala yatshaya icilongo layo. Kwaba lesiqhotho lomlilo okuhlangene legazi futhi kwaphoselwa emhlabeni,+ ingxenye yesithathu yomhlaba yatsha, lengxenye yesithathu yezihlahla yatsha, kwatsha lezilimo zonke eziluhlaza.+

8 Ingilosi yesibili yatshaya icilongo layo. Kwaphoselwa elwandle into engathi yintaba enkulu evutha umlilo.+ Ingxenye yesithathu yolwandle yaba ligazi,+ 9 ingxenye yesithathu yezidalwa eziphilayo* ezaziselwandle yafa+ futhi ingxenye yesithathu yemikhumbi yabhidlika.

10 Ingilosi yesithathu yatshaya icilongo layo. Inkanyezi enkulu eyayibhebha njengesibane yawa ivela ezulwini, yawela engxenyeni yesithathu yemifula lasemithonjeni yamanzi.+ 11 Ibizo lenkanyezi leyo kuthiwa nguMhlonyane.* Ingxenye yesithathu yamanzi yatshintsha yaba ngumhlonyane futhi amanzi lawo abulala abantu abanengi ngoba ayesebaba gamu.+

12 Ingilosi yesine yatshaya icilongo layo. Ingxenye yesithathu yelanga yatshaywa,+ kwatshaywa lengxenye yesithathu yenyanga kanye lengxenye yesithathu yezinkanyezi ukuze ingxenye yesithathu yezinto lezi ibe mnyama+ lengxenye yesithathu yosuku ingabi lokukhanya, kube njalo langobusuku.

13 Ngabona futhi ngezwa ukhozi olwaluphapha emoyeni lumemeza ngelizwi elikhulu lusithi: “Maye, maye, maye+ kulabo abahlala emhlabeni ngenxa yokukhala kwamacilongo ezingilosi ezintathu esezizatshaya amacilongo azo!”+

9 Ingilosi yesihlanu yatshaya icilongo layo.+ Ngasengibona inkanyezi eyayiwele emhlabeni ivela ezulwini njalo yaphiwa ikhiye yentuba yomgodi ongelamkhawulo.+ 2 Yavula intuba yomgodi ongelamkhawulo kwaphakama intuthu iphuma kuleyontuba, kungathi yintuthu yesithando somlilo esikhulu. Ilanga kanye lomoya kwaba mnyama+ ngenxa yentuthu eyayiphuma entubeni. 3 Entuthwini le kwaphuma intethe zabuya emhlabeni+ futhi zaphiwa amandla. Amandla ezawaphiwayo ayenjengawenkume ezisemhlabeni. 4 Intethe lezi zatshelwa ukuthi zingalimazi izilimo ezisemhlabeni lokuthi zingalimazi loba yibuphi utshani obuluhlaza laloba yisiphi isihlahla kodwa zilimaze kuphela abantu abangelalo uphawu lukaNkulunkulu emabunzini abo.+

5 Intethe zavunyelwa ukuthi zibahlukuluze okwenyanga ezinhlanu kodwa zingababulali. Ukuhlukuluza kwazo kwakungathi yibuhlungu benkume+ nxa iluma umuntu. 6 Ngalezonsuku abantu bazadinga ukufa kodwa bangakutholi ngitsho njalo bazafisa ukufa kodwa ukufa kuzababalekela.

7 Intethe lezo zazikhanya angathi ngamabhiza alungele ukuya empini+ futhi emakhanda azo kwakulezinto ezingathi yimiqhele yegolide. Ubuso bazo babunjengobuso bomuntu, 8 inwele zazo zazinjengenwele zabesifazana. Amazinyo azo ayengathi ngawezilwane+ 9 njalo zazigqoke izivikelo zesifuba ezingathi ngezensimbi. Umsindo wamaphiko azo wawunjengomsindo wezinqola ezidonswa ngamabhiza zigijimela empini.+ 10 Kanti njalo zazilemisila eluma njengeyenkume futhi emisileni yazo zazilamandla okulimaza abantu okwenyanga ezinhlanu.+ 11 Zazikhokhelwa yinkosi eyingilosi yomgodi ongelamkhawulo.+ NgesiHebheru ibizo layo ngu-Abhadoni* kodwa ngesiGrikhi ibizwa ngokuthi ngu-Apholiyoni.*

12 Umaye oyedwa usedlulile. Kodwa kuza abanye omaye+ ababili ngemva kwezinto lezi.

13 Ingilosi yesithupha+ yatshaya icilongo layo.+ Ngasengisizwa ilizwi elilodwa liphuma empondweni ze-alithare legolide+ eliphambi kukaNkulunkulu, 14 lisithi engilosini yesithupha eyayilecilongo: “Khulula izingilosi ezine ezibotshiweyo emfuleni omkhulu uYufrathe.”+ 15 Zakhululwa-ke izingilosi ezine ezazilungiselelwe ihora, losuku, lenyanga kanye lomnyaka ukuze zibulale ingxenye yesithathu yabantu.

16 Inani lamabutho ayegade amabhiza laliyizinkulungwane ezingamatshumi amabili eziphindwe ngezinkulungwane ezilitshumi.* Ngalizwa inani lawo. 17 Amabhiza engawabona embonweni kanye lababewagadile kwakunje: Ababewagadile babegqoke izivikelo zesifuba ezilombala obomvu okomlilo loluhlaza okwesibhakabhaka kanye lolithanga njengesalufa. Amakhanda amabhiza la ayenjengawezilwane+ futhi emilonyeni yawo kwakuphuma umlilo lentuthu kanye lesalufa. 18 Ingxenye yesithathu yabantu yabulawa zinhlupho lezi ezintathu: umlilo lentuthu kanye lesalufa okwakuphuma emilonyeni yamabhiza. 19 Phela amandla amabhiza la asemilonyeni lasemisileni yawo ngoba imisila yawo injengenyoka futhi ilamakhanda. Imisila le yiyo alimaza ngayo.

20 Kodwa bonke abanye abangazange babulawe zinhlupho lezi abazange baphenduke batshiye imisebenzi yezandla zabo. Abayekelanga ukukhonza amadimoni, lezithombe zegolide, lezesiliva, lezekhopha, lezamatshe kanye lezezigodo, ezingenelisiyo ukubona lokuzwa kanye lokuhamba+ 21 njalo abazange baphenduke batshiye izenzo zabo zokubulala, lokusebenzelana lamadimoni, lobufebe* kanye lobusela.

10 Ngasengibona enye ingilosi elamandla isehla ivela ezulwini yembethe iyezi* njalo ekhanda layo kwakulomchilowamakhosikazi. Ubuso bayo babunjengelanga+ lenyawo zayo zinjengezinsika zomlilo 2 futhi esandleni yayiphethe incwadimgoqwa encane eyayivuliwe. Yabeka unyawo lwayo lwesokudla elwandle, olwenxele yalubeka emhlabathini 3 yasimemeza ngelizwi elikhulu kwangathi yisilwane esibhongayo.+ Yathi imemeza ngezwa amazwi emidumo yezulu+ eyisikhombisa.

4 Imidumo yezulu eyisikhombisa yakhuluma, ngasengisithi kahle ngibhale kodwa ngezwa ilizwi livela ezulwini+ lisithi: “Zivale ngophawu izinto ezikhulunywe yimidumo yezulu eyisikhombisa njalo ungazibhali.” 5 Ingilosi engayibona imi elwandle lasemhlabathini yaphakamisela isandla sayo sokudla ezulwini, 6 yafunga ngalowo ophila kuze kube nini lanini+ owadala izulu lezinto ezikulo, lomhlaba lezinto ezikuwo kanye lolwandle lezinto ezikulo,+ yathi: “Akusoze kube kusaphuza. 7 Kodwa ngensuku ingilosi yesikhombisa+ isizatshaya icilongo layo,+ imfihlo engcwele+ yezindaba ezinhle uNkulunkulu ayezitshela izinceku zakhe ezingabaphrofethi+ izagcwaliseka loba sekutheni.”

8 Ngasengisizwa ilizwi elivela ezulwini+ likhuluma lami futhi, lisithi: “Hamba uyethatha incwadimgoqwa evuliweyo esesandleni sengilosi emi elwandle lasemhlabathini.”+ 9 Ngaya engilosini ngayitshela ukuthi ingiphe leyoncwadimgoqwa encane. Yona yathi kimi: “Yithathe uyidle,+ emlonyeni wakho izabe imnandi njengoluju kodwa izakwenza isisu sakho sibe buhlungu.”* 10 Ngayithatha incwadimgoqwa encane eyayisesandleni sengilosi ngayidla.+ Emlonyeni yayimnandi njengoluju+ kodwa ngathi sengiyidlile isisu sami saba buhlungu.* 11 Basebesithi kimi: “Kumele uphinde uphrofethe ngabantu, langezizwe, langezindimi, langamakhosi amanengi.”

11 Ngaphiwa umhlanga owawunjengomqwayi,*+ kwasekuthiwa kimi: “Sukuma ulinganise indawo engcwele yethempeli likaNkulunkulu, le-alithare kanye lalabo abakhonzela kuyo. 2 Kodwa tshiya iguma elingaphandle kwendawo engcwele yethempeli, ungalilinganisi ngoba seliphiwe abantu bezinye izizwe futhi bazanyathenyathela idolobho elingcwele+ okwenyanga ezingu-42.+ 3 Ngizakwenza ukuthi ofakazi bami ababili baphrofethe okwamalanga angu-1 260 begqoke izembatho zamasaka.” 4 Laba bayizihlahla zama-oliva ezimbili+ njalo bayizinti zezibane ezimbili,+ futhi bami phambi kweNkosi yomhlaba.+

5 Nxa ekhona ofuna ukubalimaza, kuzaphuma umlilo emilonyeni yabo utshabalalise izitha zabo. Nxa ekhona ongafuna ukubalimaza, le yiyo indlela okumele abulawe ngayo. 6 Laba balamandla okuvala isibhakabhaka+ ukuze kungabi lezulu elinayo+ ngensuku zokuphrofetha kwabo njalo balamandla okutshintsha amanzi abe ligazi+ futhi balamandla okutshaya umhlaba ngayo yonke imihlobo yenhlupho, bekwenza kanengi ngokuthanda kwabo.

7 Bazakuthi sebeqedile ukufakaza, isilo esiphuma emgodini ongelamkhawulo sizakulwa labo sibanqobe njalo sibabulale.+ 8 Izidumbu zabo zizakuba semgwaqweni omkhulu wedolobho elikhulu elifanekiselwa yiSodoma leGibhithe, lapho iNkosi yabo eyabulawelwa khona ngokubethelwa esigodweni. 9 Abantu abavela kuyo yonke imihlobo, lezizwana, lezindimi lezizwe bazakhangela izidumbu zabo okwamalanga amathathu+ lengxenye njalo abasoze bavume ukuthi izidumbu zabo zibekwe ethuneni. 10 Abahlala emhlabeni bayathokoza ngokufa kwabo, bakholise njalo bazathumelana izipho ngoba abaphrofethi laba ababili bebehlukuluza labo abahlala emhlabeni.

11 Ngemva kwamalanga amathathu lengxenye, umoya wokuphila ovela kuNkulunkulu wangena kubo+ basebesukuma bama ngenyawo futhi abababonayo besaba kakhulu. 12 Basebesizwa ilizwi elikhulu livela ezulwini lisithi kubo: “Wozani ngapha phezulu.” Lakanye baphakama ngeyezi baya ezulwini njalo izitha zabo zababona.* 13 Ngalelohora kwaba lokuzamazama komhlaba okukhulu futhi ingxenye yetshumi yedolobho yatshabalala. Ukuzamazama komhlaba lokhu kwabulala abantu abangu-7 000 futhi ababesele besaba, bakhazimulisa uNkulunkulu wasezulwini.

14 Umaye wesibili+ usedlulile. Kodwa umaye wesithathu uyeza masinyane.

15 Ingilosi yesikhombisa yatshaya icilongo layo,+ kwasekuzwakala amazwi amakhulu ezulwini esithi: “Umbuso womhlaba usube nguMbuso weNkosi yethu+ loKhristu wayo+ njalo izakuba yinkosi ibuse kuze kube nini lanini.”+

16 Abadala abangu-24+ ababehlezi phambi kukaNkulunkulu ezihlalweni zabo zobukhosi bazilahla phansi bakhothama bakhonza uNkulunkulu 17 besithi: “Siyakubonga Jehova* Nkulunkulu Somandla, wena okhona+ lowayekhona ngoba usuthethe amandla akho amakhulu waqalisa ukubusa uyinkosi.+ 18 Kodwa izizwe zaba lolaka, lolaka lwakho lwafika futhi safika isikhathi esibekiweyo esokuthi abafileyo bahlulelwe kanye lesokupha izinceku zakho umvuzo,+ lezo ezingabaphrofethi+ kanye labangcwele lalabo abesaba ibizo lakho abancane labakhulu kanye lesokubhubhisa abawonakalisa umhlaba.”+

19 Indawo engcwele yethempeli likaNkulunkulu elisezulwini yavulwa futhi ibhokisi lesivumelwano sakhe labonakala endaweni engcwele yethempeli lakhe.+ Kwaphazima umbane, kwezwakala amazwi lomdumo wezulu kanye lokuzamazama komhlaba lesiqhotho esikhulu.

12 Kwasekubonakala isibonakaliso esikhulu ezulwini: Kwakulowesifazana+ owayecece ngelanga,* ngaphansi kwenyawo zakhe kulenyanga futhi ekhanda lakhe kulomqhele wenkanyezi ezilitshumi lambili. 2 Wayezithwele njalo wayekhala esebuhlungwini, ephakathi kwemihelo yokubeletha.

3 Kwabonakala lesinye isibonakaliso ezulwini, esomgobho obomvu gebhu,+ olamakhanda ayisikhombisa lempondo ezilitshumi kanye lemiqhele eyisikhombisa emakhanda awo. 4 Wadonsa ingxenye yesithathu yezinkanyezi+ zasezulwini ngomsila wawo waziphosela emhlabeni.+ Umgobho waqhubeka umi phambi kowesifazana+ owayesezabeletha ukuze kuthi nxa angabeletha uginye umntanakhe.

5 Owesifazana wabeletha indodana,+ umntwana ongumfana ozakwelusa zonke izizwe ngentonga yensimbi.+ Umntanakhe wahluthunwa wahanjiswa kuNkulunkulu lasesihlalweni sakhe sobukhosi. 6 Owesifazana wabaleka waya enkangala endaweni yakhe ayilungiselwe nguNkulunkulu, lapho abazamnika khona ukudla okwamalanga angu-1 260.+

7 Kwavuka impi ezulwini: UMikhayeli*+ lezingilosi zakhe balwa lomgobho, lomgobho lezingilosi zawo balwa labo 8 kodwa abazange banqobe,* lendawo yabo ayizange iqhubeke ikhona ezulwini. 9 Ngakho waphoselwa phansi umgobho,+ inyoka yokuqala+ ebizwa ngokuthi nguDeveli+ langokuthi nguSathane,+ odukisa umhlaba wonke.+ Waphoselwa phansi emhlabeni,+ lezingilosi zakhe zaphoselwa phansi ndawonye laye. 10 Ngezwa ilizwi elikhulu ezulwini lisithi:

“Khathesi isikhona insindiso,+ lamandla, loMbuso kaNkulunkulu wethu+ kanye lamandla kaKhristu wakhe ngoba ummangaleli wabafowethu usephoselwe phansi, lowo obamangalela emini lebusuku phambi kukaNkulunkulu wethu!+ 11 Bamnqoba+ ngenxa yegazi leMvana+ langenxa yelizwi ababelifakaza+ futhi kabazange bazithande impilo zabo+ ngitsho lalapho sebekhangelane lokufa. 12 Ngenxa yalokho, thokozani mazulu lani elihlala kuwo! Maye ngomhlaba langolwandle+ ngoba uDeveli wehlele kini ethukuthele kakhulu, esazi ukuthi usalelwe yisikhathi esifitshane.”+

13 Umgobho uthe ubona ukuthi wawusuphoselwe phansi emhlabeni,+ wahlukuluza owesifazana+ owayebelethe umntwana ongumfana. 14 Kodwa owesifazana waphiwa impiko ezimbili zokhozi olukhulu+ ukuze aphaphe aye enkangala endaweni yakhe, lapho azaphiwa khona ukudla okwesikhathi, lezikhathi, lengxenye yesikhathi,*+ ekhatshana lenyoka.+

15 Inyoka yakhafula amanzi angathi ngumfula ngemva kowesifazana ukuze imgalulise kulowomfula. 16 Kodwa umhlaba wamnceda owesifazana. Umhlaba wavula umlomo waginya umfula owawukhafulwe ngumgobho. 17 Ngakho umgobho wamzondela kakhulu owesifazana, wasusiyakulwa labaseleyo benzalo+ yakhe, labo abalalela imilayo kaNkulunkulu njalo abalomsebenzi wokufakaza ngoJesu.+

13 Wasusima* mpo etshebetshebeni yolwandle.

Ngabona isilo+ siphuma elwandle,+ silempondo ezilitshumi lamakhanda ayisikhombisa njalo empondweni zaso kwakulemiqhele elitshumi kodwa emakhanda aso kulamabizo ayinhlamba. 2 Isilo engasibonayo sasinjengengwe kodwa inyawo zaso zinjengezebhere, umlomo waso unjengowesilwane. Umgobho+ wapha isilo lesi amandla awo lesihlalo sawo sobukhosi kanye lelungelo elikhulu.+

3 Ngabona ukuthi elinye lamakhanda aso lalikhanya lilenxeba elibulalayo kodwa inxeba lelo laselipholile+ futhi umhlaba wonke wasilandela isilo usibuka. 4 Abantu babekhonza umgobho ngoba wawuphe isilo amandla njalo babekhonza isilo besithi: “Ngubani onjengesilo futhi ngubani ongalwisana laso?” 5 Isilo saphiwa umlomo owawukhuluma izinto ezinkulu lenhlamba, saphiwa lamandla okwenza esikufunayo okwenyanga ezingu-42.+ 6 Sasesivula umlomo waso sathuka+ uNkulunkulu, sathuka ibizo lakhe kanye lendawo ahlala kuyo, ngitsho lalabo abahlala ezulwini.+ 7 Savunyelwa ukuthi silwe labangcwele sibanqobe,+ saphiwa lamandla phezu kwazo zonke izizwana, labantu, lezindimi, lezizwe. 8 Bonke abahlala emhlabeni bazasikhonza isilo. Kusukela ekusungulweni komhlaba alikho lelilodwa ibizo labo eselibhaliwe encwadinimgoqwa yokuphila+ yeMvana eyabulawayo.+

9 Loba ngubani olendlebe kezwe.+ 10 Loba ngubani okumele athunjwe uzakuya ekuthunjweni. Loba ngubani ozabulala* ngenkemba laye kumele abulawe ngenkemba.+ Lapha yikho okufuneka khona ukuthi abangcwele+ baqinisele+ futhi babe lokholo.+

11 Ngasengibona esinye isilo siphuma emhlabeni njalo sasilempondo ezimbili ezinjengezemvana kodwa saqalisa ukukhuluma njengomgobho.+ 12 Isilo lesi sisebenzisa wonke amandla esilo sokuqala+ futhi lokhu sikwenza phambi kwaso njalo senza umhlaba lalabo abahlala kuwo bakhonze isilo sokuqala esasilenxeba elibulalayo elapholayo.+ 13 Senza lezibonakaliso ezinkulu, size senze lokuthi umlilo wehle uvela ezulwini usiza emhlabeni abantu bekhangele.

14 Sidukisa abahlala emhlabeni ngenxa yezibonakaliso esavunyelwa ukuthi sizenze phambi kwesilo, ngapha sitshela abahlala emhlabeni ukuthi benze isithombe+ sesilo esasilinyazwe ngenkemba saphinda saphola.+ 15 Savunyelwa ukuthi siphe isithombe sesilo umoya wokuphefumula ukuze isithombe sesilo sikhulume njalo sibulalise bonke abala ukukhonza isithombe sesilo.

16 Isilo leso sibamba bonke abantu ngenkani, abancane labakhulu, abanothileyo labayanga, abakhululekileyo lezigqili ukuze babekwe uphawu esandleni sabo sokudla kumbe emabunzini abo+ 17 futhi kungabi lomuntu ongathenga kumbe ongathengisa ngaphandle kwalowo olophawu, olulibizo+ lesilo kumbe inombolo yebizo laso.+ 18 Lapha yikho okufuneka khona ukuhlakanipha: Olokuqedisisa kabale inombolo yesilo ngoba yinombolo yabantu, inombolo yakhona ngu-666.+

14 Ngakhangela ngasengibona iMvana+ imi phezu kwentaba iZiyoni+ ilabangu-144 000,+ bebhalwe ibizo layo lebizo likaYise+ emabunzini abo. 2 Ngezwa umdumo uvela ezulwini, ungathi ngumdumo wamanzi amanengi futhi ungathi yikukhwaza komdumo wezulu omkhulu. Umdumo engawuzwayo wawungathi ngowabahlabeleli abahlabela betshaya amahabhu* abo. 3 Babehlabela okuzwakala angathi yingoma entsha+ bephambi kwesihlalo sobukhosi laphambi kwezidalwa ezine eziphilayo+ laphambi kwabadala+ njalo kakho owayesenelisa ukuyifunda ingoma leyo ngaphandle kwabangu-144 000+ abathengwe emhlabeni. 4 Laba yibo abangazange bazingcolise ngabesifazana, bamsulwa.*+ Yibo abaqhubeka belandela iMvana kungelani lokuthi iyangaphi.+ Bathengwa+ ebantwini baba yizithelo zokuqala+ kuNkulunkulu lakuyo iMvana 5 futhi ubuqili abutholakalanga emilonyeni yabo, abalasici.+

6 Ngasengibona enye ingilosi iphapha emoyeni ilezindaba ezinhle zaphakade ukuze izimemezele kulabo abahlala emhlabeni, kuzo zonke izizwe, lezizwana, lezindimi kanye labantu.+ 7 Yayimemeza isithi: “Mesabeni uNkulunkulu limnike inkazimulo ngoba ihora lokuthi ahlulele selifikile.+ Yikho khonzani lowo owenza izulu, lomhlaba, lolwandle+ kanye lemithombo yamanzi.”

8 Enye ingilosi eyesibili yalandela isithi: “Isiwile! IBhabhiloni Enkulu+ isiwile,+ leyo eyayisenza ukuthi izizwe zonke zinathe iwayini lenkanuko* yobufebe* bayo!”+

9 Enye ingilosi eyesithathu yazilandela imemeza isithi: “Loba ngubani okhonza isilo+ lesithombe saso futhi abekwe uphawu ebunzini kumbe esandleni sakhe,+ 10 uzanatha lewayini lentukuthelo kaNkulunkulu elithululelwa enkomitshini yolaka lwakhe+ lingahlanganiswanga lalutho* njalo uzahlukuluzwa ngomlilo langesalufa+ phambi kwezingilosi ezingcwele laphambi kweMvana. 11 Intuthu yokuhlukuluzwa+ kwabo iyaphakama kuze kube nini lanini+ futhi akukho ukuphumula emini lebusuku kulabo abakhonza isilo lesithombe saso lakuloba ngubani owemukela uphawu lwebizo laso.+ 12 Lapha yikho okufuneka khona ukuthi abangcwele baqinisele,+ labo abagcina imilayo kaNkulunkulu lababambelela ekholweni+ lukaJesu.”*

13 Ngezwa ilizwi livela ezulwini lisithi, “Bhala uthi: Bayathokoza abafileyo, abafa bemanyene leNkosi+ kusukela ngalesisikhathi kusiya phambili. Umoya uthi ye, bayekele baphumule emisebenzini yabo ngoba izinto ababezenza zihamba labo.”

14 Ngathi ngiyakhangela ngabona nanti iyezi elimhlophe! Phezu kweyezi lelo kwakulomuntu owayenjengendodana yomuntu,+ elomqhele wegolide ekhanda lakhe futhi ephethe isikela ebukhali.

15 Enye ingilosi yaphuma endaweni engcwele yethempeli imemeza ngelizwi elikhulu isithi kulowo owayehlezi phezu kweyezi: “Thatha isikela yakho uvune ngoba ihora lokuvuna selifikile, isivuno somhlaba sesivuthwe ngokugcweleyo.”+ 16 Owayehlezi phezu kweyezi welulela isikela yakhe emhlabeni, umhlaba wasuvunwa.

17 Kwaphuma lenye ingilosi endaweni engcwele yethempeli elisezulwini njalo layo yayilesikela ebukhali.

18 Kwaphinda kwaphuma enye ingilosi e-alithareni. Yayilamandla phezu komlilo futhi yamemeza ngelizwi elikhulu ikhuluma laleyo eyayilesikela ebukhali yathi: “Thatha isikela yakho ebukhali uvune izixha zamagilebisi omhlaba ngoba amagilebisi awo asevuthiwe.”+ 19 Ingilosi yelulela isikela emhlabeni yavuna amagilebisi omhlaba yawaphosela esikhamelweni sewayini* esikhulu sentukuthelo kaNkulunkulu.+ 20 Isikhamelo sewayini sanyathenyathelwa ngaphandle kwedolobho njalo igazi laphuma phandle kwesikhamelo sewayini, laphakama laze layafika ematomini amabhiza, okomango ongamastadiya angu-1 600.*

15 Ngasengibona esinye isibonakaliso ezulwini, esikhulu njalo esimangalisayo. Kwakulezingilosi eziyisikhombisa,+ zilenhlupho eziyisikhombisa. Lezi ngezokucina ngoba intukuthelo kaNkulunkulu iyapheleliswa ngazo.+

2 Ngabona lokunye okwakunjengolwandle lwengilazi+ luhlanganiswe lomlilo njalo labo abanqoba+ isilo lesithombe saso+ kanye lenombolo yebizo+ laso babemi eceleni kwengilazi yolwandle, bethwele amahabhu* kaNkulunkulu. 3 Babehlabela ingoma kaMosi+ inceku kaNkulunkulu lengoma yeMvana,+ besithi:

“Mikhulu futhi iyamangalisa imisebenzi yakho,+ Jehova* Nkulunkulu Somandla.+ Zilungile njalo ziliqiniso izindlela zakho,+ Nkosi yaphakade.+ 4 Ngubani sibili ongeke akwesabe Jehova* futhi akhazimulise ibizo lakho, njengoba kunguwe wedwa oqotho?+ Phela zonke izizwe zizabuya zizokhonza phambi kwakho+ ngoba izahlulelo zakho ezilungileyo seziveziwe.”

5 Ngemva kwalokho ngabona indawo engcwele yetende lobufakazi+ ivulwa ezulwini.+ 6 Izingilosi eziyisikhombisa ezazilenhlupho eziyisikhombisa+ zaphuma endaweni engcwele zigqoke ilineni elihlanzekileyo futhi elikhazimulayo, zibophe lamabhanti egolide ezifubeni zazo. 7 Esinye sezidalwa ezine eziphilayo sanika izingilosi eziyisikhombisa imiganu yegolide eyisikhombisa eyayigcwele intukuthelo kaNkulunkulu+ ophila kuze kube nini lanini. 8 Indawo engcwele yagcwala intuthu ngenxa yenkazimulo kaNkulunkulu+ langenxa yamandla akhe njalo kakho owenelisa ukungena endaweni engcwele kwaze kwaphela inhlupho eziyisikhombisa+ zezingilosi eziyisikhombisa.

16 Ngasengisizwa ilizwi elikhulu liphuma endaweni engcwele+ lisithi ezingilosini eziyisikhombisa: “Hambani liyethululela emhlabeni imiganu eyisikhombisa yentukuthelo kaNkulunkulu.”+

2 Eyokuqala yahamba yayathululela umganu wayo emhlabeni,+ abantu ababelophawu lwesilo+ njalo ababekhonza isithombe saso+ bahlaselwa yisilonda esiyingozi futhi esesabekayo.+

3 Eyesibili yathululela umganu wayo elwandle,+ lwaselutshintsha lwaba ligazi+ elinjengelomuntu ofileyo futhi izidalwa zonke eziphilayo zafa,* zonke nje izinto ezaziselwandle.+

4 Eyesithathu yathululela umganu wayo emifuleni lasemithonjeni yamanzi,+ konke kwaba ligazi.+ 5 Ngasengisizwa ingilosi elamandla phezu kwamanzi isithi: “Wena okhona lowayekhona+ njalo oqotho,+ utshengise ukuthi ulungile ngokukhipha izahlulelo lezi+ 6 ngoba bathulula igazi labangcwele lelabaphrofethi.+ Usubaphe igazi ukuze balinathe+ futhi lokho kubafanele.”+ 7 Ngasengisizwa i-alithare lisithi: “Jehova* Nkulunkulu Somandla,+ izahlulelo zakho ziliqiniso njalo zilungile sibili.”+

8 Eyesine yathululela umganu wayo elangeni,+ ilanga laselivunyelwa ukuthi lihangule abantu ngomlilo. 9 Lanxa abantu bahangulwa yikutshisa okukhulu, bathuka ibizo likaNkulunkulu olamandla phezu kwenhlupho lezi. Kabazange baphenduke njalo kabamnikanga inkazimulo.

10 Eyesihlanu yathululela umganu wayo esihlalweni sobukhosi sesilo, umbuso waso waba mnyama.+ Ngamunye wabo waqalisa ukuxhanxatha ulimi lwakhe ngenxa yobuhlungu ayebuzwa. 11 Lanxa kunjalo, bathuka uNkulunkulu wasezulwini ngenxa yezilonda zabo lobuhlungu ababebuzwa futhi kabazange baphenduke ezenzweni zabo.

12 Eyesithupha yathululela umganu wayo emfuleni omkhulu uYufrathe,+ amanzi awo atsha+ ukuze kulungiswe indlela yamakhosi+ avela empumalanga.*

13 Ngasengibona amazwi amathathu aphefumulelweyo ayengahlanzekanga* futhi ayekhanya angathi ngamaxoxo ephuma emlonyeni womgobho+ lasemlonyeni wesilo kanye lasemlonyeni womphrofethi wamanga. 14 Amazwi la aphefumulelwe ngamadimoni njalo enza izibonakaliso.+ Aqonda emakhosini omhlaba wonke ukuze awaqoqele ndawonye empini+ yosuku olukhulu lukaNkulunkulu uSomandla.+

15 “Khangela! Ngiza njengesela.+ Uyathokoza lowo ohlala ephapheme+ futhi oqhubeka egqoke izembatho zakhe zangaphandle ukuze angahambi nqunu njalo abantu bangaliboni ihlazo lakhe.”+

16 Basebewaqoqela ndawonye endaweni ebizwa ngokuthi yi-Amagedoni*+ ngesiHebheru.

17 Eyesikhombisa yathululela umganu wayo emoyeni. Kwasekuphuma ilizwi elikhulu endaweni engcwele+ livela esihlalweni sobukhosi lisithi: “Sekwenzakele!” 18 Kwasekuphazima umbane, kwezwakala amazwi lemidumo yezulu njalo kwaba lokuzamazama komhlaba okukhulu okwakungakaze kube khona selokhu abantu baba khona emhlabeni.+ Ukuzamazama lokhu kwakulamandla futhi kukukhulu kakhulu. 19 Idolobho elikhulu+ lehlukana laba zingxenye ezintathu, lamadolobho ezizwe adilika. UNkulunkulu wayikhumbula iBhabhiloni Enkulu+ ukuze ayiphe inkomitsho yewayini yolaka lwakhe oluvuthayo.+ 20 Izihlenge zonke zabaleka, lezintaba azitholakalanga.+ 21 Amatshe amakhulu esiqhotho asewela abantu evela ezulwini,+ ngalinye lilesisindo esasingaba lithalenta.* Abantu bathuka uNkulunkulu ngenxa yohlupho lwesiqhotho+ ngoba uhlupho lolu lwalulukhulu okungajayelekanga.

17 Enye yezingilosi eziyisikhombisa ezazilemiganu eyisikhombisa+ yafika yathi kimi: “Woza ngikutshengise ukwahlulelwa kwesifebe esikhulu esihlezi phezu kwamanzi amanengi,+ 2 leso esifeba* lamakhosi omhlaba+ njalo esasidakisa abahlala emhlabeni ngewayini yobufebe* baso.”+

3 Yasingithwala ngamandla omoya yangisa enkangala. Ngabona owesifazana ehlezi phezu kwesilo esibomvu gebhu, esasigcwele amabizo ayinhlamba futhi silamakhanda ayisikhombisa lempondo ezilitshumi. 4 Owesifazana lo wayegqoke okulombala oyibubende*+ lokubomvu gebhu njalo ecece ngegolide langamatshe aligugu kanye lamaphareli.+ Esandleni sakhe wayephethe inkomitsho yegolide eyayigcwele izinto ezenyanyekayo lezinto ezingcolileyo zobufebe* bakhe. 5 Ebunzini lakhe kwakubhalwe ibizo eliyimfihlo elithi: “IBhabhiloni Enkulu, unina wezifebe+ lowezinto ezenyanyekayo zomhlaba.”+ 6 Ngasengibona ukuthi owesifazana lo wayedakwe ligazi labangcwele legazi labofakazi bakaJesu.+

Ngathi ngimbona ngamangala kakhulu. 7 Ngakho ingilosi yathi kimi: “Kungani umangele? Ngizakutshela imfihlo emayelana lowesifazana+ lesilo esimthweleyo, esilamakhanda ayisikhombisa lempondo ezilitshumi:+ 8 Isilo osibonileyo sasikhona kodwa asisekho njalo sesizaphuma emgodini ongelamkhawulo+ siye ekubhujisweni. Abahlala emhlabeni abalamabizo angabhalwanga encwadinimgoqwa yokuphila+ kusukela ekusungulweni komhlaba bazamangala bebona ukuthi isilo sasikhona njalo kasisekho kodwa sizaphinda sibe khona.

9 “Lapha yikho okufunakala khona ingqondo elokuhlakanipha: Amakhanda ayisikhombisa+ atsho intaba eziyisikhombisa, lapho owesifazana ahlezi khona. 10 Kulamakhosi ayisikhombisa: Amahlanu asewile, eyodwa ikhona njalo enye ayikafiki kodwa nxa ingafika kumele iqhubeke ikhona okwesikhatshana. 11 Isilo esasikhona kodwa esingasekho+ siphinda sibe yinkosi yesi-8 kodwa evela emakhosini ayisikhombisa njalo siya ekubhujisweni.

12 “Impondo ezilitshumi ozibonileyo zitsho amakhosi alitshumi angakatholi umbuso kodwa athola amandla okuba ngamakhosi ndawonye lesilo okwehora elilodwa. 13 Zilomcabango munye, yikho zinika isilo amandla azo kanye lelungelo lokubusa. 14 Zizakulwa leMvana+ kodwa iMvana izanqoba+ ngoba yona iyiNkosi yamakhosi loMbusi wababusi+ futhi labo abaleMvana, ababiziweyo labakhethiweyo njalo abathembekileyo, labo bazanqoba.”+

15 Yathi kimi: “Amanzi owabonileyo lapho okuhlezi khona isifebe atsho abantu, lamaxuku, lezizwe kanye lezindimi.+ 16 Impondo ezilitshumi+ ozibonileyo kanye lesilo+ zizasizonda isifebe+ zisithathele konke esilakho futhi zisinqunule. Zizakudla inyama yaso zisitshise ngomlilo size siphele du+ 17 ngoba uNkulunkulu ukufake ezinhliziyweni zazo ukuthi zenze umcabango wakhe.+ Zizawenza sibili umcabango munye ezilawo ngokunika isilo umbuso wazo,+ kuze kube yilapho sekugcwaliseke amazwi kaNkulunkulu. 18 Owesifazana+ ombonileyo umela idolobho elikhulu elilombuso obusa phezu kwamakhosi omhlaba.”

18 Ngemva kwalokho ngabona enye ingilosi eyayilamandla amakhulu isehla ivela ezulwini futhi umhlaba wakhanyiswa yinkazimulo yayo. 2 Yamemeza ngelizwi elikhulu yathi: “Isiwile! IBhabhiloni Enkulu isiwile+ njalo isiyindawo yokuhlala yamadimoni lendawo lapho okucatsha khona yonke imimoya engcolileyo* lazo zonke inyoni ezingcolileyo lezizondwayo!+ 3 Phela izizwe zonke sezidakiwe+ ngenxa yewayini lenkanuko* yobufebe* bayo futhi ifeba lamakhosi omhlaba.+ Abathengisi* bomhlaba sebenothile ngenxa yamandla enotho yayo eyihuquluza ingelanhloni.”

4 Ngasengisizwa elinye ilizwi livela ezulwini lisithi: “Phumani kuyo bantu bami+ nxa lingafuni ukuhlanganyela layo ezonweni zayo futhi lingafuni ukwamukela ezinye zezinhlupho zayo+ 5 ngoba izono zayo sezibe yinqwaba zaze zayafika ezulwini+ njalo uNkulunkulu usezikhumbulile izenzo zayo ezingalunganga.*+ 6 Yiphatheni ngendlela ebiphatha ngayo abanye,+ liyibuyisele seziphindwe kabili izinto ezenzileyo.+ Enkomitshini+ ebihlanganisela khona okunathwayo, yihlanganiseleni sekuphindwe kabili.+ 7 Yihlukuluzeni liyenze ilile kuze kufike ebangeni ebizikhazimulisa ngalo ilenotho enengi futhi ingelanhloni ngakho ngoba iqhubeka isithi enhliziyweni yayo: ‘Ngihlezi sandlovukazi, kangisimfelokazi njalo kangisoze ngilile loba sekutheni.’+ 8 Yikho okuzakwenza yehlelwe zinhlupho ngelanga elilodwa, ukufa lokulila kanye lendlala futhi izatshiswa ngomlilo+ iphele du ngoba uJehova* uNkulunkulu oyahluleleyo ulamandla.+

9 “Amakhosi omhlaba ayefeba* layo njalo ephila ngenotho yayo eyayiyihuquluza ingelanhloni azakhala futhi azitshaye ezifubeni eyililela lapho ebona intuthu yokutsha kwayo. 10 Azamela khatshana ngoba esesaba ukuhlukuluzwa kwayo, athi: ‘Maye, maye ngawe dolobho elikhulu,+ Bhabhiloni, wena dolobho eliqinileyo ngoba ukwahlulelwa kwakho kufike ngehora elilodwa nje!’

11 “Labathengisi bomhlaba bayakhala, bayayililela ngoba zonke impahla abazithengisayo sezizaswela ozazithenga, 12 lalo lonke igolide, lesiliva, lamatshe aligugu, lamaphareli, lelineni elohlonzi, lelembu eliyibubende,* lelembu lesilikhi, lelembu elibomvu gebhu kanye lakho konke okwenziwe ngogodo olunukelelayo, lazo zonke izinto ezenziwe ngophondo lwendlovu, langezigodo ezidulayo, langekhopha, langensimbi, langamatshe alemibalabala, 13 lesinamoni, lezilimo ezilephunga elimnandi ezivela e-Indiya, lempepha, lamafutha anukelelayo, lenhlaka yokwenza impepha, lewayini, lamafutha ama-oliva, lefulawa ecolekileyo, lengqoloyi, lenkomo, lezimvu, lamabhiza, lezinqola, lezigqili kanye lempilo zabantu.* 14 Zonke izithelo ezivuthiweyo owawuzifisa* sezikutshiyile, lazo zonke izibiliboco lezinto zakho ezinhle kakhulu sezinyamalele futhi ngeke ziphinde zitholakale.

15 “Abathengisi ababethengisa izinto lezi, abanotha ngenxa yayo bazamela khatshana besesaba ukuhlukuluzwa kwayo futhi bazakhala balile 16 bathi: ‘Maye, maye kulo idolobho elikhulu eligqoke ilineni elohlonzi lokuyibubende kanye lokubomvu gebhu, elicece ngezinto ezinengi ezidulayo ezenziwe ngegolide langamatshe aligugu lamaphareli+ 17 ngoba ngehora elilodwa nje inotho enengi kangaka isitshabalalisiwe!’

“Zonke izinduna zemikhumbi lalabo abahlala behamba elwandle, labagwedli bemikhumbi kanye labo bonke abaphila ngokusebenza elwandle bamela khatshana, 18 bamemeza bekhangele intuthu yokutsha kwalo, bathi: ‘Kambe yiliphi idolobho elinjengedolobho leli elikhulu?’ 19 Bazithela ngothuli emakhanda abo bamemeza bekhala futhi belila besithi: ‘Maye, maye kulo idolobho elikhulu elanothisa bonke ababelemikhumbi elwandle ngenotho yalo ngoba ngehora elilodwa nje selitshabalalisiwe!’+

20 “Thokozani ngalokho okuyehleleyo lina elisezulwini,+ lani abangcwele,+ labaphostoli kanye labaphrofethi ngoba uNkulunkulu useyahlulele ngenxa yenu!”+

21 Ingilosi elamandla yaphakamisa ilitshe elinjengelitshe lokuchola elikhulu yaliphosela elwandle isithi: “Ledolobho elikhulu iBhabhiloni lizaphoselwa phansi masinyane njalo kalisoze liphinde litholakale.+ 22 Akusoze kuphinde kuzwakale umsindo wabahlabeleli kuwe, owabahlabela betshaya amahabhu,* lowabanye abahlabeleli, lowabatshaya amafluthi kanye lamacilongo. Ngeke kutholakale kuwe ingcitshi yomsebenzi eyenza loba yini futhi akusoze kuphinde kuzwakale umsindo welitshe lokuchola. 23 Kasikho isibane esizaphinda sikhanyise kuwe njalo kalikho ilizwi lomyeni lelikamakoti elizazwakala kuwe futhi ngoba abathengisi bakho yibo ababeyizikhulu zomhlaba njalo zonke izizwe zadukiswa yizenzo zakho zokusebenzelana lamadimoni.+ 24 Kwatholakala kulo igazi labaphrofethi lelabangcwele+ lelabo bonke ababuleweyo emhlabeni.”+

19 Ngemva kwalokho ngezwa okwakungathi lilizwi elikhulu elalivela exukwini elikhulu elisezulwini. Lathi: “Dumisani uJah!*+ Insindiso lenkazimulo lamandla ngokukaNkulunkulu wethu 2 ngoba izahlulelo zakhe ziliqiniso njalo zilungile.+ Usesahlulele isifebe esikhulu ebesisonakalisa umhlaba ngobufebe* baso futhi useliphindisele igazi lezinceku zakhe elisezandleni zaso.”*+ 3 Khonokho nje ixuku lelo lakhuluma okwesibili lathi: “Dumisani uJah!*+ Intuthu yokutsha kwaso iqhubeka ithunqa isiya phezulu kuze kube nini lanini.”+

4 Abadala abangu-24+ lezidalwa ezine eziphilayo+ bazilahla phansi bakhonza uNkulunkulu ohlezi esihlalweni sobukhosi, bathi: “Ameni! Dumisani uJah!”*+

5 Kwasekuzwakala ilizwi livela esihlalweni sobukhosi lisithi: “Mdumiseni uNkulunkulu wethu lonke lina zinceku zakhe,+ lina elimesabayo, abancane labakhulu.”+

6 Ngasengisizwa okwakuzwakala angathi lilizwi lexuku elikhulu, kungathi ngumdumo wamanzi amanengi lomdumo omkhulu wezulu. Ixuku lelo lathi: “Dumisani uJah,*+ ngoba uJehova* uNkulunkulu wethu uSomandla+ useqalisile ukubusa eyinkosi!+ 7 Kasithabeni futhi sithokoze kakhulu, simnike inkazimulo ngoba umtshado weMvana usufikile lenkosikazi yayo isizilungiselele. 8 Inkosikazi yayo isivunyelwe ukuthi igqoke ilineni elohlonzi ekhazimulayo njalo ehlanzekileyo ngoba ilineni elohlonzi imela izenzo ezilungileyo zabangcwele.”+

9 Ingilosi yathi kimi, “Bhala uthi: Bayathokoza abanxuswe edilini lantambama lomtshado weMvana.”+ Yaphinda yathi kimi: “La ngamazwi kaNkulunkulu aliqiniso.” 10 Ngasengizilahla phansi enyaweni zayo ukuze ngiyikhonze. Kodwa yona yathi kimi: “Nanzelela! Ungakwenzi lokho!+ Mina ngiyinceku nje esebenza lawe labafowenu abalomsebenzi wokufakaza ngoJesu.+ Khonza uNkulunkulu!+ Phela ubufakazi obuphathelane loJesu yibo obenza isiphrofetho siphefumulelwe.”+

11 Ngabona izulu livulekile, ngasengibona nanto ibhiza elimhlophe!+ Owayeligadile ubizwa ngokuthi nguThembekile+ loQiniso.+ Wahlulela futhi alwe impi ngokulunga.+ 12 Amehlo akhe alilangabi lomlilo ovuthayo+ njalo ekhanda lakhe kulemiqhele eminengi. Ulebizo elibhaliweyo elingaziwa muntu kodwa elaziwa nguye kuphela. 13 Ugqoke isembatho sangaphandle esingcoliswe ligazi* njalo ubizwa ngokuthi nguLizwi+ kaNkulunkulu. 14 Amabutho asezulwini lawo ayemlandela egade amabhiza amhlophe njalo ayegqoke ilineni elohlonzi emhlophe futhi ehlanzekileyo. 15 Emlonyeni wakhe kuphuma inkemba ende ebukhali+ agalela ngayo izizwe futhi uzazelusa ngentonga yensimbi.+ Phezu kwalokho, unyathenyathela isikhamelo sewayini* sentukuthelo yolaka lukaNkulunkulu uSomandla.+ 16 Esembathweni sakhe sangaphandle, emlenzeni wakhe, kubhalwe ibizo elithi uMbusi wababusi leNkosi yamakhosi.+

17 Ngabona lengilosi imi elangeni njalo yamemeza ngelizwi elikhulu yathi kuzo zonke inyoni eziphapha emoyeni: “Wozani lapha libuthane edilini elikhulu likaNkulunkulu elantambama+ 18 ukuze lidle inyama yamakhosi, lenyama yezinduna zamabutho, leyamadoda aqinileyo,+ leyamabhiza leyalabo abawagadileyo,+ lenyama yabo bonke abantu, abakhululekileyo labayizigqili, abancane labakhulu.”

19 Ngasengibona isilo lamakhosi omhlaba elamabutho awo, bebuthene ndawonye ukuze balwe lalowo owayegade ibhiza kanye lebutho lakhe.+ 20 Isilo sabanjwa kanye lomphrofethi wamanga+ owayesenza izibonakaliso phambi kwaso, lezo ayedukisa ngazo ababemukele uphawu lwesilo+ lababekhonza isithombe saso.+ Bobabili baphoselwa bephila echibini lomlilo ovutha isalufa.+ 21 Bonke abanye babulawa ngenkemba ende eyayiphuma emlonyeni walowo owayegade ibhiza.+ Zonke inyoni zadla inyama yabo zasutha.+

20 Ngasengibona ingilosi isehlela phansi ivela ezulwini ilekhiye yomgodi ongelamkhawulo+ leketane enkulu esandleni sayo. 2 Yawubamba umgobho,+ inyoka yokuqala+ enguDeveli+ loSathane,+ yambopha okweminyaka eyinkulungwane. 3 Yamphosela emgodini ongelamkhawulo+ yawuvala, yanameka uphawu phezu kwawo ukuze angaphindi adukise izizwe ize iphele iminyaka eyinkulungwane. Ngemva kwalokho kumele akhululwe okwesikhatshana.+

4 Ngaphinda ngabona izihlalo zobukhosi futhi ababehlezi kuzo baphiwa amandla okwahlulela. Ngayibona imiphefumulo* yalabo ababebulewe* ngenxa yokufakaza ngoJesu, langenxa yokukhuluma ngoNkulunkulu. Ngabona lalabo ababengasikhonzanga isilo loba isithombe saso njalo ababengalwamukelanga uphawu emabunzini abo lasezandleni zabo.+ Baphila, babusa bengamakhosi loKhristu+ okweminyaka eyinkulungwane. 5 (Bonke abanye abafileyo+ abazange baphile yaze yaphela iminyaka eyinkulungwane.) Lokhu yikuvuswa kwabafileyo kokuqala.+ 6 Bayathokoza futhi bangcwele bonke abazavuka ekuvusweni kwabafileyo kokuqala.+ Ukufa kwesibili+ akulamandla phezu kwabo+ kodwa bazakuba ngabaphristi+ bakaNkulunkulu labakaKhristu njalo bazabusa laye bengamakhosi okweminyaka eyinkulungwane.+

7 Iminyaka eyinkulungwane izakuthi iphela nje, uSathane akhululwe entolongweni yakhe 8 futhi uzaphuma ayedukisa izizwe emagumbini amane omhlaba, uGogi loMagogi ukuze azibuthanisele ndawonye empini. Inani lazo lingangetshebetshebe yolwandle. 9 Bagcwala emhlabeni wonke bagombolozela lezihonqo zabangcwele ledolobho elithandekayo. Kodwa umlilo wehla uvela ezulwini wabatshabalalisa.+ 10 UDeveli owayebadukisa waphoselwa echibini lomlilo lesalufa, lapho okwasekulesilo+ lomphrofethi wamanga+ njalo bazahlukuluzwa* emini lebusuku kuze kube nini lanini.

11 Ngasengibona isihlalo sobukhosi esikhulu esimhlophe kanye lalowo owayehlezi kuso.+ Izulu lomhlaba kwabaleka+ phambi kwakhe njalo akuzange kutholelwe indawo. 12 Ngabona abafileyo, abakhulu labancane bemi phambi kwesihlalo sobukhosi kwasekuvulwa izincwadimgoqwa. Kodwa kwavulwa lenye incwadimgoqwa, incwadimgoqwa yokuphila.+ Abafileyo bahlulelwa ngezinto ezazibhalwe ezincwadinimgoqwa kusiya ngezenzo zabo.+ 13 Ulwandle lwakhipha abafileyo ababekulo, ukufa lengcwaba lakho kwakhipha abafileyo ababekukho, ngamunye wasesahlulelwa kusiya ngezenzo zakhe.+ 14 Ukufa lengcwaba kwaphoselwa echibini lomlilo.+ Ichibi lomlilo+ litsho ukufa kwesibili.+ 15 Phezu kwalokho, loba ngubani ongatholakalanga ebhaliwe ebhukwini lokuphila+ waphoselwa echibini lomlilo.+

21 Ngasengibona izulu elitsha lomhlaba omutsha+ ngoba izulu lakuqala lomhlaba wakuqala kwasekudlulile+ njalo lolwandle+ lwalungasekho. 2 Ngabona ledolobho elingcwele, iJerusalema Elitsha, lisehla livela ezulwini kuNkulunkulu+ lilungiswe njengomakoti ocecele umkakhe.+ 3 Ngasengisizwa ilizwi elikhulu livela esihlalweni sobukhosi lisithi: “Khangela! Itende likaNkulunkulu lisebantwini, uzahlala labo njalo bazakuba ngabantu bakhe. UNkulunkulu ngokwakhe uzakuba labo.+ 4 Uzakwesula zonke izinyembezi emehlweni abo.+ Ukufa akusoze kuphinde kubekhona,+ loba ukulila loba ukukhala loba ubuhlungu ngeke kusabakhona.+ Izinto ebezisenzakala sezidlulile.”

5 Lowo owayehlezi esihlalweni sobukhosi+ wathi: “Khangela! Ngenza izinto zonke zibe zintsha.”+ Waphinda wathi: “Bhala ngoba amazwi la athembekile futhi aliqiniso.” 6 Wasesithi kimi: “Sekwenzakele! Mina ngingu-Alfa lo-Omega,* isiqalo lesiphetho.+ Loba ngubani owomileyo ngizamnika mahala* amanzi omthombo wamanzi okuphila.+ 7 Loba ngubani onqobayo uzakudla ilifa lakho konke lokhu futhi ngizakuba nguNkulunkulu wakhe, yena abe yindodana yami. 8 Kodwa abantu abangamagwala, labangelakholo,+ labangcole okwenyanyekayo, lababulali,+ labayizifebe*+ labasebenzelana lamadimoni, labakhonza izithombe, labo bonke abaqamba amanga,+ isabelo sabo sizakuba sechibini elivutha umlilo lesalufa.+ Lokhu kutsho ukufa kwesibili.”+

9 Enye yezingilosi eziyisikhombisa ezazilemiganu eyisikhombisa eyayigcwele inhlupho zokucina eziyisikhombisa+ yafika yathi kimi: “Woza ngizakutshengisa umakoti, inkosikazi yeMvana.”+ 10 Ngakho yangithwala ngamandla omoya yangisa entabeni enkulu futhi ende, yasingitshengisa idolobho elingcwele iJerusalema, lisehla livela ezulwini kuNkulunkulu+ 11 lilenkazimulo kaNkulunkulu.+ Ukukhazimula kwalo kwakunjengokwelitshe eliligugu ukwedlula wonke, angathi lilitshe lejaspa elicazimula njengekhristali ekhanyiselayo.+ 12 Lalilomduli omkhulu futhi omude kakhulu, lilamagedi alitshumi lambili njalo kwakulezingilosi ezilitshumi lambili kulawomagedi. Emagedini la kwakubhalwe amabizo ezizwana ezilitshumi lambili zamadodana ako-Israyeli. 13 Empumalanga kwakulamagedi amathathu, enyakatho kulamagedi amathathu, eningizimu lakho kulamagedi amathathu, lasentshonalanga kulamagedi+ amathathu. 14 Umduli wedolobho wawulamatshe ayisisekelo alitshumi lambili futhi phezu kwawo kwakulamabizo alitshumi lambili abaphostoli+ beMvana abalitshumi lambili.

15 Ingilosi eyayikhuluma lami yayithwele umhlanga wegolide ukuze ilinganise ngawo idolobho kanye lamagedi alo lomduli walo.+ 16 Idolobho lelo liyalingana amacele womane njalo ubude balo bulingana lobubanzi balo. Yalilinganisa idolobho ngomhlanga, laba ngamastadiya angu-12 000,* ubude lobubanzi balo kanye lokuphakama kwalo kuyalingana konke. 17 Yalinganisa umduli walo waba zingalo ezingu-144* ngokulinganisa komuntu, okufanana lokulinganisa kwengilosi. 18 Umduli wawenziwe ngejaspa+ njalo idolobho laliligolide elicengekileyo, linjengengilazi ekhanyiselayo. 19 Izisekelo zomduli wedolobho zaziceciswe ngayo yonke imihlobo yamatshe aligugu: Isisekelo sokuqala sasiyijaspa, esesibili siyisafire, esesithathu siyikhalisedoni, esesine siyi-emeraldi, 20 esesihlanu siyisadonikisi, esesithupha siyisadiyusi, esesikhombisa siyikhrisolithe, esesi-8 siyibherili, esesi-9 siyithophazi, esesi-10 siyikhrisophirase, esesi-11 siyihiyasinte, esesi-12 siyi-amethisithi. 21 Amagedi angu-12 ayengamaphareli angu-12, igedi ngalinye lenziwe ngephareli elilodwa. Umgwaqo omkhulu wedolobho wawuligolide elicengekileyo, unjengengilazi ekhanyiselayo.

22 Angizange ngibone ithempeli kulo ngoba uJehova* uNkulunkulu uSomandla+ ulithempeli lalo, leMvana ilithempeli lalo. 23 Idolobho lelo kalidingi langa loba inyanga ukuthi kukhanyise kulo ngoba inkazimulo kaNkulunkulu yayikhanyisa kulo+ futhi isibane salo kwakuyiMvana.+ 24 Kanti njalo izizwe zizahamba ekukhanyeni kwalo+ futhi amakhosi omhlaba azaletha inkazimulo yawo kulo. 25 Amagedi alo awasoze avalwe emini loba sekutheni ngoba akusoze kube lobusuku edolobheni lelo.+ 26 Kuzalethwa kulo inkazimulo yezizwe kanye lodumo lwazo.+ 27 Kodwa loba yini engcolileyo njalo loba ngubani owenza izinto ezenyanyekayo futhi oliqili kasoze angene kulo.+ Kuzangena kuphela labo ababhalwe encwadinimgoqwa yokuphila yeMvana.+

22 Yasingitshengisa umfula wamanzi okuphila+ ayecengeke njengekhristali. Ayegeleza evela esihlalweni sobukhosi sikaNkulunkulu leseMvana,+ 2 esehlela phakathi laphakathi komgwaqo omkhulu wedolobho. Emaceleni womabili omfula lo kwakulezihlahla zokuphila ezazithela izithelo okwezikhathi ezilitshumi lambili ngomnyaka, zithela izithelo zazo inyanga ngayinye. Amahlamvu ezihlahla lezo ayengawokwelapha izizwe.+

3 Akusoze kuphinde kube khona loba yisiphi isiqalekiso. Isihlalo sobukhosi sikaNkulunkulu leseMvana+ sizakuba sedolobheni lelo njalo izinceku zakhe zizamenzela inkonzo engcwele. 4 Zizabubona ubuso bakhe+ njalo ibizo lakhe lizakuba semabunzini azo.+ 5 Akusoze kuphinde kube lobusuku+ futhi kazisoze zikudinge ukukhanya kwesibane loba ukukhanya kwelanga ngoba uJehova* uNkulunkulu uzazikhanyisela+ njalo zizakuba ngamakhosi zibuse kuze kube nini lanini.+

6 Yathi kimi: “Amazwi la athembekile futhi aliqiniso.+ UJehova* uNkulunkulu owaphefumulela abaphrofethi+ useyithumile sibili ingilosi yakhe ukuthi itshengise izinceku zakhe izinto okumele zenzakale masinyane. 7 Khangela! Ngiyeza masinyane.+ Loba ngubani olandela amazwi esiphrofetho esisencwadinimgoqwa le uyathokoza.”+

8 Mina Johane yimi engangisizwa izinto lezi futhi ngizibona. Ngathi sengizizwile njalo sengizibonile, ngawela phansi enyaweni zengilosi ukuze ngiyikhonze ingilosi leyo eyayingitshengisa izinto lezi. 9 Kodwa yathi kimi: “Nanzelela! Ungakwenzi lokho! Mina ngiyinceku nje esebenza lawe labafowenu abangabaphrofethi kanye lalabo abalandela amazwi akulincwadimgoqwa. Khonza uNkulunkulu.”+

10 Yaphinda yathi kimi: “Ungawavali ngophawu amazwi esiphrofetho esisencwadinimgoqwa le ngoba isikhathi esibekiweyo sesiseduze. 11 Ongalunganga kaqhubeke esenza okungalunganga, longcolileyo aqhubeke esekungcoleni kwakhe kodwa olungileyo kaqhubeke esenza okulungileyo, longcwele aqhubeke esebungcweleni.

12 “‘Khangela! Ngiyeza masinyane njalo ngilomvuzo engizawupha abantu, ngizabuyisela umuntu ngamunye kusiya ngomsebenzi wakhe.+ 13 Mina ngingu-Alfa lo-Omega,*+ ngingowokuqala lowokucina, isiqalo lesiphetho. 14 Bayathokoza labo abawatsha izembatho zabo+ ukuze babe lelungelo lokuya ezihlahleni zokuphila+ njalo bangene edolobheni ngamagedi alo.+ 15 Phandle kulezinja,* labasebenzelana lamadimoni, lezifebe* lababulali, labakhonza izithombe kanye labo bonke abathanda amanga futhi abalomkhuba wokuqamba amanga.’+

16 “‘Mina Jesu ngathuma ingilosi yami ukuthi izofakaza kini izinto lezi eziya emabandleni. Ngiyimpande kaDavida njalo ngiyinzalo yakhe+ futhi ngiyindonsakusa ekhazimulayo.’”+

17 Umoya lomakoti+ baqhubeka besithi, “Woza!” njalo loba ngubani ozwayo kathi, “Woza!” Loba ngubani owomileyo keze+ njalo loba ngubani ofisayo kathathe amanzi okuphila mahala.+

18 “Ngifakaza emuntwini wonke ozwa amazwi esiphrofetho sencwadimgoqwa le: Loba ngubani ongezelela ezintweni lezi,+ uNkulunkulu uzakwengezelela kuye inhlupho ezibhalwe encwadinimgoqwa le+ 19 futhi nxa umuntu engasusa loba yini emazwini encwadimgoqwa yesiphrofetho lesi, uNkulunkulu uzasusa isabelo sakhe ezihlahleni zokuphila+ lasedolobheni elingcwele.+ Izinto lezo zibhaliwe encwadinimgoqwa le.

20 “Ofakaza izinto lezi uthi, ‘Ngiyeza masinyane.’”

“Ameni! Woza Nkosi Jesu.”

21 Umusa omkhulu weNkosi uJesu kawube labangcwele.