IJerusalema Liyabhidlizwa

SEKUDLULE iminyaka elitshumi iNkosi uNebhukhadinezari ithethe ama-Israyeli wonke afunde kakhulu yawasa eBhabhiloni. Khathesi khangela ukuthi kwenzakalani! IJerusalema liyatsha. Ama-Israyeli asindileyo ahanjiswa eBhabhiloni njengezibotshwa.

Khumbula ukuthi abaphrofethi bakaJehova babekhulumile ukuthi lokhu yikho okwakuzakwenzakala nxa abantu babezaqhubeka besenza izinto ezimbi. Kodwa ama-Israyeli kawabalalelanga abaphrofethi. Baqhubeka bezikhonzela onkulunkulu bamanga kulokuthi bakhonze uJehova. Ngakho akukubi ukuthi abantu laba bajeziswe. Siyakwazi lokhu ngoba umphrofethi kaNkulunkulu uHezekheli usitshela ngezinto ezimbi ezazisenziwa ngama-Israyeli.

Uyamazi yini uHezekheli? Ungomunye wamajaha athathwa yiNkosi uNebhukhadinezari ahanjiswa eBhabhiloni eminyakeni elitshumi iJerusalema lingakabhidlizwa. UDanyeli labangane bakhe abathathu uShadreki, uMeshaki lo-Abhediniko labo bahanjiswa eBhabhiloni ngalesosikhathi.

UHezekheli esaseBhabhiloni, uJehova umtshengisa izinto ezimbi ezenzakalayo ethempelini eliseJerusalema. UJehova wenza lokhu ngesimangaliso. UHezekheli useBhabhiloni sibili, kodwa uJehova umenza abone konke okwenzakalayo ethempelini. Okubonwa nguHezekheli kuyethusa!

UJehova utshela uHezekheli ukuthi: ‘Khangela izinto ezenyanyekayo ezenziwa ngabantu lapha ethempelini. Khangela imiduli elemifanekiso yezinyoka lezinye izinyamazana. Khangela ama-Israyeli ekhonza izinto lezi!’ UHezekheli uyazibona lezi zinto abesebhala phansi okwenzakalayo.

UJehova ubuza uHezekheli esithi: ‘Uyabona yini ukuthi abakhokheli bama-Israyeli benzani emnyameni?’ UHezekheli uyakubona lokhu. Kulamadoda angu-70 njalo wonke la akhonza onkulunkulu bamanga. Athi: ‘UJehova kasiboni. Uselilahlile ilizwe.’

UJehova utshengisa uHezekheli abafazi abathile egedini lethempeli elisenyakatho. Bakhonza unkulunkulu wamanga uThamuzi behlezi khonapho. UJehova umtshela ukuthi akhangele amadoda asemnyango wethempeli lakhe! UHezekheli uyawabona amadoda la angaba ngu-25. Akhothamela phansi ekhangele empumalanga njalo akhonza ilanga!

UJehova uthi: ‘Abantu laba kabangihloniphi. Benza izinto ezimbi kakhulu, kodwa okubi kakhulu yikuthi bazenzela ethempelini lami!’ Ngakho uJehova uthembisa ukuthi: ‘Bazakubona ukuthi ngiyazonda. Angisoze ngibazwele nxa sebebulawa.’

Ngemva kweminyaka emithathu uJehova etshengise uHezekheli izinto lezi, ama-Israyeli ayayekela ukulalela iNkosi uNebhukhadinezari. Ngakho uNebhukhadinezari ulwa lawo. Ngemva komnyaka lenyanga eziyisithupha, abantu baseBhabhiloni badiliza imiduli yaseJerusalema besebetshisa idolobho leli liphele nya. Abantu abanengi bayabulawa njalo abanye bahanjiswa eBhabhiloni njengezibotshwa.

Kungani uJehova evumele ukuthi ama-Israyeli awelwe luhlupho olungaka? Kungenxa yokuthi awamlalelanga uJehova njalo awalandelanga imithetho yakhe. Lokhu kutshengisa ukuthi kuqakathekile kakhulu ukuthi senze okufunwa nguNkulunkulu zikhathi zonke.

Ekuqaliseni, abantu abalutshwana bavunyelwa ukuhlala elizweni lama-Israyeli. UNebhukhadinezari ukhetha umJuda okuthiwa nguGedaliya ukuthi akhangele abantu laba. Kodwa amanye ama-Israyeli abulala uGedaliya. Khathesi abantu sebesesaba ukuthi amaBhabhiloni azabuya ezobabulala ngenxa yento le embi abayenzileyo. Babamba uJeremiya ngenkani ukuthi ahambe labo, besebebalekela eGibhithe.

Lokhu kwenza ilizwe lama-Israyeli lisale lingela bantu ngitsho. Akula muntu ohlala elizweni leli okweminyaka engu-70. Akula lutho ngitsho. Lanxa kunjalo, uJehova uthembisa ukuthi uzabuyisela abantu bakhe elizweni leli ngemva kweminyaka engu-70. Kodwa-ke, kuyini okwenzakala ebantwini bakaNkulunkulu abahanjiswe elizweni laseBhabhiloni? Ake sibone.