ISIHLOKO ESISEKUQALISENI | UYAWAZI YINI AMANGA ENZA KUBENZIMA UKUTHANDA UNKULUNKULU?
Kungani Kunzima Kwabanye Ukuthanda uNkulunkulu?
“ ‘Thanda iNkosi uNkulunkulu wakho ngenhliziyo yakho yonke langomphefumulo wakho wonke langengqondo yakho yonke.’ Yiwo oyingqala njalo odlula yonke imilayo.”—uJesu Khristu ngo-33 C.E.a
banye abantu bathi kunzima ukuthanda uNkulunkulu. Babona angani uNkulunkulu kazwisiseki, ukhatshana lathi njalo ulesihluku. Akuzwe ukuthi abanye bathini:
“Ngangithandaza kuNkulunkulu ukuthi angincedise kodwa enhliziyweni yami ngangilomuzwa wokuthi ukhatshana kakhulu, okokuthi akukhulumeki laye. Kimi uNkulunkulu wayengenye into nje engelamizwa.”—uMarco wase-Italy.
“Lanxa ngangifisa ngenhliziyo yonke ukukhonza uNkulunkulu, wayekhanya angani ukhatshana kakhulu. Ngangicabanga ukuthi unguNkulunkulu ololunya njalo umsebenzi wakhe ngowokusijezisa kuphela. Ngangingakukholwa ukuthi angaba lothando lomusa.”—uRosa waseGuatemala.
“Ngisesemncane ngangikholwa ukuthi uNkulunkulu uhlala ecinga amaphutha ethu, emelele ukuthi ajezise labo abaphambanisayo. Ngathi sengikhulakhulile ngasengicabanga ukuthi kalandaba labantu. UNkulunkulu wayengani ngumongameli welizwe okhangela indlela abantu abaphilisana ngayo kodwa engelasikhathi labo.”—uRaymonde waseCanada.
Ucabangani? Kunzima yini ukuthanda uNkulunkulu? Sokuleminyaka engamakhulu amanengi amaKhristu ebuza umbuzo lo. Kulesikhathi lapho abamasonto azithi ngawesiKhristu ababengazihluphi ngokuthandaza kuNkulunkulu uSomandla. Ngani? Ngoba abantu babemesaba okwesilwane. Ingcitshi yezembali uWill Durant wakubeka wathi: “Kwakungenzakala njani sibili ukuthi umuntu nje oyisoni alinge athandaze eNkosini embi njalo ekhatshana kangako?”
Kwenzakala njani ukuthi abantu bacine sebecabanga ukuthi uNkulunkulu yiNkosi “embi njalo ekhatshana” labo? IBhayibhili lifundisani sibili ngoNkulunkulu? Ukufunda iqiniso ngoNkulunkulu kungakwenza umthande yini?