ISIHLOKO ESISEKUQALISENI | UYAWAZI YINI AMANGA ENZA KUBENZIMA UKUTHANDA UNKULUNKULU?
Amanga Enza Kukhanye Angani uNkulunkulu Kazwisiseki
OKUKHOLWA NGABANENGI
Amasonto esiKhristu “ngengxenye zawo ezintathu ezigoqela amaRoma Katolika, amasonto obu-Orthodoxy asempumalanga kanye lamasonto ahlamuka esontweni yeRoma, ayavumelana ngokuthi uNkulunkulu ubunjwa ngabantu abathathu: uNkulunkulu uBaba, uNkulunkulu iNdodana loNkulunkulu uMoya oNgcwele. Ngokutsho kwemfundiso yobuKhristu, bonke laba abathathu babumba unkulunkulu oyedwa hatshi ukuthi ngonkulunkulu abathathu.”—The New Encyclopædia Britannica.
IQINISO ELIVELA EBHAYIBHILINI
UJesu iNdodana kaNkulunkulu kazange atsho loba nini ukuthi uyalingana loYise kumbe athi bangumuntu oyedwa. Kodwa wathi: “Ngiya kuBaba, ngoba uBaba mkhulu kulami.” (UJohane 14:28) Kanti njalo wake wathi komunye wabalandeli bakhe: “Sengibuyela kuBaba njalo uYihlo, kuNkulunkulu wami, uNkulunkulu wenu.”—UJohane 20:17.
Umoya ongcwele kawusiye Nkulunkulu. AmaKhristu okuqala ‘agcwaliswa ngomoya ongcwele,’ njalo uJehova wathi: ‘ngizathululela umoya wami kubo bonke abantu.’ (ImiSebenzi 2:1-4, 17) Umoya ongcwele kawusiyo ngxenye yoButhathu bukaNkulunkulu. Kodwa ungamandla asetshenziswa nguNkulunkulu.
KUNGANI LIQAKATHEKILE?
Izifundiswa ezingamaKatolika uKarl Rahner loHerbert Vorgrimler zichaza ukuthi uButhathu bukaNkulunkulu, “abungeke baziwe nxa kungela kwambulelwa njalo lanxa sobambuliwe ngeke ubuzwisise ngokupheleleyo.” Kulula yini ukuthanda umuntu okunzima ukuthi umazi njalo umzwisise? Hatshi. Yikho-ke imfundiso yoButhathu bukaNkulunkulu ivalela abantu ukuthi bamazi uNkulunkulu njalo bamthande.
UMarco okuke kwakhulunywa ngaye esihlokweni sokuqala wayebona imfundiso yoButhathu bukaNkulunkulu njengomgoqo sibili. Uthi yena: “Ngangicabanga ukuthi uNkulunkulu ungifihlela indlela ayiyo yona, njalo lokhu kwakusenza ukuthi abe khatshana kakhulu, angazwisiseki njalo kungabi lula ukusondela kuye.” Kodwa-ke, “UNkulunkulu kasuye Nkulunkulu wengxabangxoza.” (1 KwabaseKhorinte 14:33) Kasifihleli ukuthi unjani. Ufuna simazi. UJesu wathi: “Sikhonza lokho esikwaziyo.”—Johane 4:22.
UMarco uthi: “Ngathi sengifundile ukuthi uNkulunkulu kasuye ngxenye yoButhathu bukaNkulunkulu ngacina sengisenelisa ukuba lobuhlobo obuqinileyo laye.” Uma sivuma ukuthi uJehova unguNkulunkulu ophilayo njalo ozwisisekayo kuba lula ukuthi simthande. IBhayibhili lithi: “Lowo ongathandiyo kamazi uNkulunkulu, ngoba uNkulunkulu uluthando.”—1 UJohane 4:8.