IMIBUZO YEBHAYIBHILI IYAPHENDULWA

Kungani kumele sithandaze?

UJehova uNkulunkulu ufuna sikhululeke ukukhuluma laye kokuphela simtshela loba kuyini okusikhathazayo. (ULukha 18:1-7) Uyasilalela ngenxa yokuthi uyasithanda. UBaba wethu osezulwini olomusa uyasinxusa ukuthi sithandaze. Lokhu kutshengisa ukuthi akulasizatho sokuthi singathandazi.​—Bala uFiliphi 4:6.

Kodwa nxa sithandaza akutsho ukuthi siyabe sicela uncedo kuphela. Umthandazo usinceda lokuthi sisondele eduze loNkulunkulu. (IHubo 8:3, 4) Nxa sihlala simtshela konke okusezinhliziyweni zethu, siba ngabangane bakhe sibili.​—Bala uJakhobe 4:8.

Kumele sithandaze njani?

Nxa sithandaza uNkulunkulu kafuni ukuthi sigabaze ngolimi kumbe sihlale siphinda amazwi esiwabambe ngekhanda. Kanti njalo ukuthi siguqile, sihlezi kumbe simile ayisikho okuqakathekileyo. UJehova ufuna sikhulume lokho okusezinhliziyweni zethu nxa sithandaza. (UMathewu 6:7) Ngokwesibonelo ko-Israyeli endulo, uHana wathandaza ngohlupho olwalumzwisa ubuhlungu olwalusemulini yakhe. Lapho uhlupho lolu seludlulile uHana wathandaza ngenhliziyo yakhe yonke ebonga uNkulunkulu.​—Bala u-1 Samuyeli 1:10, 12, 13, 26, 27; 2:1.

Ukuthandaza yisibusiso esihle kakhulu. Singakhuluma loMdali wethu simtshela konke okusihluphayo. Okunye esingakwenza yikumdumisa lokumbonga ngakho konke akwenzayo. Kuyacaca ukuthi akumelanga siyekele ukusebenzisa isibusiso lesi esihle kangaka.​—Bala iHubo 145:14-16.