Sebenzisa iWebhusayithi Yethu Ekufundiseni Abantwabakho
1. Yenzelweni ingxenye yeWebhusayithi yethu ebhalwe ukuthi “Children”?
1 IWebhusayithi yethu ethi jw.org yenzelwe ukuthi ikhange abantu bonke abaleminyaka etshiyeneyo. Ingxenye ekuWebhusayithi ebhalwe ukuthi “Children” (hamba ku-Bible Teachings > Children) inceda abantwana abancane kanye labazali ukuthi basondelelane futhi basondele kuJehova. (Dute. 6:6, 7) Ungasebenzisa njani ingxenye le ekufundiseni abantwabakho?
2. Ungakhetha njani izifundo ongazisebenzisa ukufundisa abantwabakho ngokutshiyana kweminyaka yabo?
2 Khetha Okuhambelana Labantwabakho: Umntwana ngamunye ulezidingo zakhe ezingafanani lezabanye. (1 Khor. 13:11) Ngakho ungakhetha njani izifundo ongazisebenzisa ukufundisa abantwabakho ngokutshiyana kweminyaka yabo? Zibuze ukuthi: ‘Kuyini okuzakhanga abantwabami kubenze bathande ukufunda? Kungakanani abazakuzwisisa? Balalela okwesikhathi esingakanani nxa ngibafundisa?’ Nxa kulabantwana abaleminyaka emithathu kumbe engaphansi, ungaxoxa ngezindaba ezitholakala ngaphansi kwesihloko esithi “My Bible Lessons.” Ezinye izimuli zithanda izindaba zeBhayibhili ezitholakala kungxenye ethi “Teach Your Children.” Okunye ongakwenza yikukhangela amanye amacebo alandelayo.
3. Abazali bangazisebenzisa njani kuhle izindaba kanye lemisebenzi etholakala ngaphansi kwesihloko esithi “Family Worship Projects”?
3 Okokufunda Ekukhonzeni Kwemuli: Okokufunda lokhu kunganceda kakhulu izinhloko zemuli ukuthi zifunde labantwabazo. Ukuze ufunde ukuthi ungazisebenzisa njani izindaba kanye lokunye ongakwenza fithizela lapho okubhalwe-download ubusubala lapho okubhalwe “Parents’ Guide”, engxenyeni ngayinye. Sebenzisa amapikitsha, njengalawo okumele apendwe ukuthi ufundise abantwana abancane. Ncedisa asebekhulile kancane ukuthi bayiqede yonke imisebenzi abayenzayo eyizifundo. Yonke imisebenzi esengxenyeni ngayinye ikhuluma ngendaba eyodwa yeBhayibhili kumbe isifundo esifananayo, ngakho abantwana abaleminyaka etshiyeneyo bangahlanganyela engxenyeni eyodwa ekukhonzeni kwabo kwemuli.
4. Kuyini okutholakalayo kungxenye ethi “Become Jehovah’s Friend”?
4 Woba Ngumngane kaNkulunkulu: Amavidiyo, izingoma kanye lemisebenzi ethile ekungxenye le kuWebhusayithi yethu kunceda abazali ukuthi bagxilise iLizwi likaNkulunkulu ebantwaneni babo abancane. (Dute. 31:12) Ividiyo ngayinye emfitshane elabodoli abakhulumayo ilesifundo esiqakathekileyo. Imidlalo ethi “search and find” iyagcizelela izifundo lezo. Abantwana bathanda ukuhlabela futhi izingoma zibanceda ukuthi bakukhumbule abakufundileyo—izingoma zoMbuso kanye lezingoma ezibhalelwe abantwana ziyafakwa ngazozonke izikhathi kuWebhusayithi yethu.
5. Kungani kumele abazali bacele uJehova ukuthi abancedise nxa befundisa abantwababo iqiniso?
5 Bazali, uJehova ufuna ukuthi libe ngomama labobaba abaphumelelayo. Ngakho celani kuye ukuthi alincedise ukufundisa abantwana benu iqiniso. (Abahlu. 13:8) Ngokusekela kukaJehova, ungaqeqetsha abantwabakho ukuthi ‘bahlakaniphele ukusindiswa ngokukholwa kuKhristu uJesu.’—2 Thim. 3:15; Zaga. 4:1-4.