Sebenzisa Amamagazini Amadala
Kumele sizame ukunika abantu amamagazini amadala ngoba kawancedi muntu nxa ebekiwe kumbe elahliwe. Imagazini eyodwa ingenza umuntu othile abe lesifiso sokufunda iqiniso futhi imenze aqalise ukubiza ibizo likaJehova. (Rom. 10:13, 14) Amacebo alandelayo angasinceda ukuthi sihambise amamagazini amadala.
Nxa litshumayela endaweni engandisanga ukutshunyayelwa, mhlawumbe ungatshiya eyodwa lapho elithole kungelamuntu khona.
Nxa utshumayela obala ezindaweni lapho abantu abalindela khona amabhasi kumbe izitimela, babuze ukuthi bayawafuna yini amamagazini okubala, ubusubatshengisa amamagazini amadala olawo futhi ubatshele bakhethe abawafunayo.
Nxa uvakatshele izindawo ezithile ezisensimini yebandla lenu ezinjengalapho okuhlala khona abantu asebekhulile, amakilinika, kumbe kwezinye izindawo ezifanana lalezo, ungatshiya amamagazini endaweni yokulindela. Kodwa kungabangcono ukuthi uqalise ucele imvumo kulowo okhangele leyondawo nxa ekhona. Nxa kuyikuthi uthole kulamanye amamagazini ethu khonapho ungangezeleli amanye.
Nxa ulungiselela ukubuyela ebantwini abathile, cabanga ngalokho okuthandwa ngumuntu munye ngamunye ofuna ukumvakatshela. Ulemuli yini? Uyakuthanda yini ukuvakatsha? Uyakuthanda yini ukulima? Dinga kumamagazini amadala ukuze ubone ukuthi sikhona yini isihloko angathanda ukusibala, futhi ubusumtshengisa sona nxa usubuyela.
Nxa ungathola umuntu olesifiso sokufunda iBhayibhili osulesikhathi eside ungamtholi, mtshengise amanye amamagazini amadala angazange awathole.