“Buthanisa Abantu”
1. Imihlangano yesigaba ifanana njani lombuthano wama-Israyeli ngesikhathi esanda kuphuma eGibhithe?
1 UMosi esanda kuphuma eGibhithe, uJehova wamlaya ukuthi ‘abuthanise abantu’ eNtabeni iSinayi ukuze bazokuzwa amazwi akhe ukwenzela ukuthi bamesabe njalo bafundise abantwababo izindlela zakhe. (Dute. 4:10-13) Umbuthano lo wawuzaqinisa ukholo lwabo njalo babengasoze bafa bawukhohlwa. Ezinyangeni ezilutshwane ezilandelayo, abantu bakaJehova bazabuthana emihlanganweni emikhulu ukuze uJehova abafundise. Kumele senzeni ukuze imihlangano le isincede kakhulu?
2. Kumele senzeni ukuze ‘silungiselele’ imihlangano emikhulu?
2 ‘Lungiselela’: UJehova walaya abako-Israyeli ukuthi ‘balungiselele’ umbuthano ababengasoze bawukhohlwe eNtabeni iSinayi. (Eks. 19:10, 11) Ngendlela efananayo bonke abazangena umhlangano wesigaba kumele bawulungiselele kuhle, hatshi labo abazabe belezinkulumo kumbe iziboniso kuphela. Ngokwesibonelo, abanengi kuzamele bacele isikhathi emsebenzini. Mhlawumbe isimo sakho singabe sifanana lesikaNehemiya. Wayefuna ukutshiya umsebenzi wokuba ngumphathi wezitsha zeNkosi u-Athakisekisi ukuze ayekwakha kutsha imiduli yeJerusalema, kodwa wayekwazi ukuthi kungenzeka inkosi iyale. UNehemiya wakhuleka wasequnga isibindi sokwethula isicelo sakhe ngenhlonipho. Inkosi yamvumela ukuhamba yaze yasekela lomsebenzi wokwakha. (Neh. 2:1-9) Ngaphandle kokucela isikhathi emsebenzini, usuhlelile yini ukuthi uzahamba njani futhi uzahlala ngaphi? Abadala bazajabula ukunceda labo abangadinga usizo. Hlela ukufika ingxenye ngayinye ingakaqalisi, njalo ‘qaphelisisa’ lokho ozakuzwa.—Heb. 2:1.
3. Kumele senzeni ukuze silungiselele izinhliziyo zethu ukuthi silalele uhlelo lomhlangano?
3 Enye ingxenye eqakathekileyo yokulungiselela kwethu igoqela ukulungiselela izinhliyo zethu ukuze silalele futhi sifunde. (Ezra. 7:10) Imihlangano yesigaba ingakaqalisi, uhlelo lwayo luzafakwa kuwebhusayithi ethi jw.org njalo luzaba lezihloko zenkulumo zonke, yinye ngayinye ilombhalo owodwa kumbe emibili eyisiqokoqela. Kusasele amaviki amalutshwana ukuthi umhlangano wesigaba ufike, singaxoxa ngohlelo lolu ekuKhonzeni kwethu kweMuli. Abanye abamemezeli bayathatha uhlelo lolu kukhompiyutha ukuze balusebenzise ukubhala imicijo emifitshane emhlanganweni.
4. Abazali bangenzani ukuze abantwababo bafunde emhlanganweni?
4 ‘Fundisani abantwabenu’: Enye yezinhloso zombuthano owenzelwa eNtabeni iSinayi yayingeyokuthi abazali abangama-Israyeli “bafundise abantwababo.” (Dute. 4:10) Umhlangano unika abazali ithuba elihle lokwenza okufananayo. Ngesikhathi somhlangano abazali kumele bahlale labantwababo babancedise ukuthi balalele. Izimuli zingaxoxa ngohlelo lomhlangano ntambama ngezinsuku zomhlangano kumbe sebesenza ukukhonza kwabo kwemuli.
5. Sizazuza njani emhlanganweni ozayo?
5 Umbuthano oqakathekileyo owenzelwa eNtabeni iSinayi wanceda ama-Israyeli ukuthi aqakathekise isibusiso esasingesawo wodwa sokuba ngabantu bakaNkulunkulu. (Dute. 4:7, 8) Umhlangano wethu ozayo ulungiselelwe ukuthi usisize ngendlela efananayo. Okwamalanga amathathu sizake siphume emhlabeni kaSathane oyinkangala sikholise ukuvuselelwa ekukhonzeni lobudlelwano obakhayo lokuthula phakathi kwethu. (Isaya. 35:7-9) Yikho-ke kungaba kuhle ukuthi silesebenzise kuhle ithuba lokuthi sihlangane ndawonye ukuze sikhuthazane njengoba usuku lukaJehova lusondela.—Heb. 10:24, 25.