Isikolo Senkonzo SamaKhristu Sika-2015 Sizasinceda Ukuthi Sithuthukise Indlela Esifundisa Ngayo

¹ Umhubi uDavida wabhala wathi: “Sengathi amazwi omlomo wami leminakano yenhliziyo yami kungathokozisa emehlweni akho, O Jehova, Dwala lami loMkhululi wami.” (Hubo. 19:14) Lathi sisibambe sasiqinisa nko isibusiso sokukhuluma iqiniso ebandleni lasenkonzweni ngoba sifuna ukuthi amazwi ethu athokozise uJehova. UJehova usebenzisa iSikolo Senkonzo SamaKhristu ukuthi asifundise ukutshumayela. Yikho-ke isikolo lesi senziwa maviki wonke emhlabeni wonke emabandleni adlula i-111 000. Isikolo lesi sesincede abafowethu labodadewethu abasemhlabeni wonke ukuthi benelise ukufundisa abantu izindaba ezinhle ngobuciko langesibindi.​—ImiSeb. 19:8; Kol. 4:6.

² Uhlelo lwesikolo luka-2015 luzabe lulezihloko ezithethwe ebhukwini elithi Sifundani ELizwini LikaNkulunkulu? lelithi Izihloko zeBhayibhili Zokuxoxa Ngazo. Isikhathi senkulumo yokubalwa kweBhayibhili kanye leseNkulumo No. 1 sesintshintshile. Untshintsho lolu kanye lemilayezo ephathelane lendlela izinkulumo zesikolo okumele zenziwe ngayo kuzaxoxwa ngakho ezindimeni ezilandelayo.

³ Ukubalwa KweBhayibhili: Umfowethu oyabe ephiwe inkulumo le kumele asebenzise imizuzu emibili ukuze akhulume ngomcijo owodwa oseBhayibhilini ozanceda ibandla. Ukulungiselela kuhle yikho okuzamnceda ukuthi awubeke kuhle umcijo lowo ngemizuzu emibili nje. Ngemva kwalokho abalaleli bazaphiwa imizuzu eyisithupha ukuthi batsho imicijo abayithandileyo ngesikhathi bebala ingxenye leyo yeBhayibhili. Umuntu ngamunye kumele angedlulisi imizuzwana engu-30. Ukulungiselela kuhle kuzabanceda abalaleli ukuthi benelise ukukhuluma umcijo onceda ibandla ngemizuzwana engu-30 nje kuphela. Lokhu kwenza labanye bathole ithuba lokutsho abakufundileyo ngesikhathi belungiselela.

⁴ INkulumo No. 1: Inkulumo le isizakuba yimizuzu emithathu kumbe engaphansi futhi iyabe ingamavesi amalutshwana. Labo abayabe bephiwe inkulumo le kumele bayiphurakithize izikhathi ezinengana bebalela phezulu futhi bezama ukubala kuhle amabala, bengagagasi ukuze benelise ukubala ngendlela etshengisa ukuthi bayakuzwisisa abakubalayo. Bonke abantu bakaJehova kumele bazame ukubala kuhle ngoba ukubala kuqakatheke kakhulu ekukhonzeni kwethu uJehova. Sigwaba ngabo abantwana esilabo emabandleni ngoba babala kuhle futhi sibatshayela ihlombe abazali babo ngenxa yokubancedisa ukuthi babale kuhle.

⁵ INkulumo No. 2: Inkulumo le izathatha imizuzu emihlanu futhi izakwenziwa ngudade. Kufanele asebenzise isihloko asiphiweyo. Nxa inkulumo ithethwe ebhukwini elithi Izihloko zeBhayibhili Zokuxoxa Ngazo, kufanele ihambelane lalokho okwenziwa ensimini yebandla.

⁶ INkulumo No. 3: Inkulumo le izathatha imizuzu emihlanu futhi izakwenziwa ngumzalwane kumbe udade. Nxa inkulumo le isenziwa ngudadewethu, kumele ayenze elandela iziqondiso zeNkulumo No. 2. Nxa iphiwe umzalwane, kumele ayenze ngendlela okwenziwa ngayo inkulumo kazulu wonke.

⁷ Iziqondiso Ezintsha Zabazalwane Abenza INkulumo No. 3: Nxa inkulumo le ithethwe ebhukwini elithi Sifundani ELizwini LikaNkulunkulu?, kumele yenziwe njengesiboniso sokukhonza kwemuli kumbe esabantu abasenkonzweni. Umbonisi wesikolo uzakhetha umsizi njalo atsho ukuthi inkulumo le kumele yenziwe njani. Umsizi kumele kube lilunga lemuli yalowo owenza inkulumo kumbe abe ngomunye umzalwane ebandleni. Nxa ekhona amanye amavesi alemicijo ekhanyisa isihloko leso lawo angasetshenziswa. Ngezinye izikhathi inkulumo le ingaphiwa umdala webandla. Umdala angazikhethela umsizi kanye lokuthi ufuna ukuyenza njani inkulumo leyo. Kakuthandabuzwa ukuthi kuzalikhuthaza ibandla ukubona umdala etshengisa indlela yokufundisa ephumelelayo ngesikhathi esenza inkulumo le.

⁸ Iseluleko: Ngemva kwenkulumo yinye ngayinye umdala uzasebenzisa imizuzu emibili ukuthi abonge lowo obelenkulumo njalo ameluleke ngendlela emncedayo esebenzisa ibhuku elithi Benefit From Theocratic Ministry School Education. Ngesikhathi umbonisi wesikolo esethula inkulumo yinye ngayinye kakumelanga atsho ukuthi olenkulumo kumele athuthuke kukuphi. Nxa inkulumo isiphelile, umbonisi wesikolo kumele amncome ngenhliziyo yonke umfundi futhi atsho lokuthi ubekhangelelwe ukuthi athuthuke kukuphi. Kumele atsho kucace ukuthi kungani esithi umfundi wenze kuhle emcijweni lowo njalo atsho lokuthi kungamsiza ngani umfundi ukuqhubeka ethuthuka kulowo mcijo.

⁹ Ifomu leseluleko litholakala emakhasini 79-81 ebhukwini elithi Ministry School. Ngemva kwemihlangano umbonisi wesikolo kumele amake ifomu leseluleko elisebhukwini lomfundi njalo ambuze ukuthi usenzile yini isivivinyo esihambelana lomcijo okumele athuthuke kuwo. Nxa imihlangano isiphelile, umbonisi wesikolo angancoma umfundi bebodwa futhi atsho leminye imicijo engamnceda ekwenzeni izinkulumo. Konke lokhu kumele abafundi bakubone njengamathuba okubanceda ukuthi bathuthuke ekukhonzeni.​—1 Tim. 4:15.

¹⁰ Nxa olenkulumo engadla isikhathi, umbonisi wesikolo kumele atshengise umfundi ukuthi usedle isikhathi futhi lokhu ukwenza ngendlela engasoze iphambanise abalaleli. Umfundi yena kumele akunanzelele lokhu abesesuka esitejini masinyane.​—Khangela ibhuku elithi Ministry School, k. 282, indima 4.

¹¹ Bonke abafaneleyo ukuthi benze izinkulumo bayakhuthazwa ukuthi babhalise kumbonisi weSikolo Senkonzo SamaKhristu. (Khangela ibhuku elithi Ministry School, k. 282, indima 6.) Lokho okufundiswa esikolo lesi kuncede abantu bakaJehova ukuthi batshumayele futhi bafundise izindaba ezinhle ngesibindi langothando. Kakuthandabuzwa ukuthi uJehova uyajabula ngokuthi udunyiswa ngabantu abafundiswe eSikolo Senkonzo SamaKhristu!​—Hubo. 148:12, 13; Isaya. 50:4.