Lingisela Ukukholwa Kwabo
1. Yiliphi ibhuku esizaqalisa ukulisebenzisa eSifundweni SeBhayibhili Sebandla ngeviki ka-October 19?
1 Kusukela ngeviki ka-October 19, 2015 sizaqalisa ukusebenzisa ibhuku elithi Lingisela Ukukholwa Kwabo eSifundweni SeBhayibhili Sebandla. Ibhuku leli licubungula izimpilo zamadoda labesifazana abangu-14 okukhulunywa ngabo eBhayibhilini ababelokholo. Lilotshwe ngendlela ezasenza sibabone ngelihlo lengqondo njalo sibabone njengabantu abake babakhona sibili labahlala bethembekile kuJehova lanxa babehlangana lobunzima. Njengoba indlela ibuzwa kwabaphambili, izibonelo ezisebhukwini leli zizasinceda ukuthi sithole izifundo esingazisebenzisa empilweni.—Heb. 6:12.
2. Landisa ukuthi kuyini okutholakala ebhukwini elithi Lingisela Ukukholwa Kwabo.
2 Okutholakala Ebhukwini Leli: Kulamamephu atshengisa ukuthi abantu okukhulunywa ngabo babehlala ngaphi kanye lamatshathi atshengisa ukuthi okuthile kwenzakala nini. Isahluko sinye ngasinye silengxenye ethi “Ongacabangisisa Ngakho . . . ,” ezasinceda sinakane ngezibonelo lezi njalo sisebenzise lezifundo esizitholayo. Liphinde libe lemifanekiso elemibala ebukekayo edwetshwe ngobunono obukhulu, ekhanya kla njalo etshengisa izinto njengoba zilandiswa eBhayibhilini.
3. Kumele senzeni ukuze ibhuku leli lisincede sibili?
3 Kuyini Okufanele Ukwenze? Incwadi evela kuQula Elibusayo ilamazwi la asikhuthazayo: “Kubone engqondweni lokho okubalayo, uzifake endabeni yakhona. Nxa ubala ngomuntu othile, zama ukucabanga ngokuthi wayengabe ezizwa njani, ubone lezinto ayezibona. Cabangisisa ngokuthi ngabe lokho okwamehlelayo kwenzakala kuwe, wena wawuzakwenza njani.” Ukubona ngelihlo lengqondo akutsho ukuphonguphupha nje kodwa kutsho ukuzama ukuzwisisa okukhulunywa ngakho labantu bakhona. Lokhu kutsho ukuthi kumele sizinike isikhathi sokunakana. (Neh. 8:8) Nxa isifundo seviki ethile siqalisela phakathi kwesahluko, oqhubayo kumele athi fahlafahla ngesifundo seviki edlulileyo okwemizuzwana engu-30 kusiya kwengu-60. Nxa isifundo samhlalokho singacini ngengxenye ethi “Ongacabangisisa Ngakho . . . ,” oqhubayo angabuza umbuzo owodwa loba emibili ukuze ibandla litsho elikufundileyo.
4. Kungani kumele sifunde ibhuku elithi Lingisela Ukukholwa Kwabo?
4 Siphila emhlabeni ozama ngazo zonke izindlela ukukhukhula lokuxegisa ukholo lwethu. Ibhuku leli kanye lezihloko ezithi “Lingisela Ukukholwa Kwabo” ezizabe zilokhu ziphuma ku-Nqabayokulinda ziyisipho esivela kuJehova esiqinisa ukholo lwethu. (Jak. 1:17) Yikho-ke ungaphuthi eSifundweni SeBhayibhili Sebandla futhi uqhubeke uphendula njengoba sifunda ibhuku leli.