Thinta Izinhliziyo Zalabo Obafundisayo
1. UJesu wayefundisa njani?
1 UJesu Khristu nxa wayefundisa wayetshaya kuthophele ezinhliziyweni zabalaleli bakhe. Phela ngolunye usuku izinhliziyo zabafundi bakhe zaze ‘zatshiseka’ ngemva kokubacacadela lokho okutshiwo yimibhalo. (Luk. 24:32) Ukulalela uNkulunkulu kufanele kuqubuke enzikini yenhliziyo yomuntu, ngakho kufanele sizame ukusiza esimfundisayo ukuthi azimisele ukusebenzisa akufundayo ukuze antshintshe ukuphila kwakhe. Singakwenza njani lokho?—Rom. 6:17.
2. Kuqakatheke ngani ukuba lobuciko kanye lokuzwisisa nxa sifundisa?
2 Woba Lobuciko Njalo Uzwisise: Akwanelanga ukufundisa umuntu iqiniso eliseBhayibhilini kuphela ngoba lokho kakungeke kumthinte inhliziyo. Kanti njalo ukuhlasela lokho akukholwayo sisebenzisa imibhalo eminenginengi kungabangela ukuthi acine esenengwa yikuxoxa lathi. Yikho ukuze sithinte inhliziyo yakhe kuqakathekile ukuthi siqale sizwisise isizatho esimenza abambelele kulokho akukholwayo. Ukuba lobuciko kuzasinceda ukuthi sisebenzise imibuzo ezakwenza akhululeke ukukhupha konke okusekujuleni kwenhliziyo yakhe. (Zaga. 20:5) Lokhu kuzasinceda ukuthi senelise ukusebenzisa iLizwi likaNkulunkulu ngendlela ezamthinta inhliziyo. Kuyakhanya ukuthi kufanele sibe lendaba laye njalo sibe ngababekezelayo. (Zaga. 25:15) Akuthandabuzwa ukuthi abantu bathuthuka ngezindlela ezitshiyeneyo, yikho ukubekezela kuzasinceda silindele ukuthi kube ngumoya kaJehova ofuqa umuntu ukuthi acabange njalo aphile ngendlela ethokozisa uNkulunkulu.—Mak. 4:26-29.
3. Singamncedisa njani esimfundisayo ukuthi abe lezimpawu zobuntu ezinhle?
3 Mncedise Abe Lezimpawu Zobuntu Ezinhle: Amavesi aseBhayibhilini akhuluma ngobuhle bukaJehova kanye lothando alalo angamnceda esimfundisayo ukuthi laye abe lezimpawu zobuntu ezinhle. Eminye imibhalo esingayisebenzisa liHubo 139:1-4 kumbe uLukha 12:6, 7 ukuze abone ukuthi uJehova uyasithanda sonke. Nxa engazibonela ukuthi uJehova ulomusa omkhulu uyaqala ukumthanda njalo amlalele kukho konke akwenzayo. (Rom. 5:6-8; 1 Joh. 4:19) Kanti njalo ukufunda ukuthi akwenzayo kungamjabulisa loba kumdanise uJehova kungenza azimisele ukuphila ngendlela ezamthokozisa.—Hubo. 78:40, 41; Zaga. 23:15.
4. Singamtshengisa njani inhlonipho umuntu esimfundisayo?
4 UJehova akabambi muntu ngamandla ukuthi alalele imithetho yakhe. Kodwa akwenzayo yikuveza ukuthi kunceda ngani ukumlalela. (Isaya. 48:17, 18) Yikho lathi nxa sifundisa kufanele silingisele uJehova ngokuvumela esimfundisayo ukuthi azenzele izinqumo. Nxa engakubona ukuthi kuyadingeka sibili ukuthi enze untshintsho empilweni yakhe uyancedakala kakhulu. (Rom. 12:2) Lokhu kuzakwenza ukuthi abe lobudlelwano obuseduze loJehova yena ‘ohlola inhliziyo.’—Zaga. 17:3.