IMPILO YAMAKHRISTU

Ingxenye Entsha Emhlanganweni Waphakathi Kweviki

Kuqalisa ngoJanuary 2018 umhlangano waphakathi kweviki uzabe usulemicijo yokutaditsha kanye lamapikitsha lemidwebo etholakala eBhayibhilini lokutaditsha elikuwebhusayithi okuthiwa yi-New World Translation of the Holy Scriptures (nwtsty). Lanxa singakabi lalo ngolimi lwethu okukulo kuzakunceda ukuthi uthuthukise indlela olungiselela ngayo imihlangano. Okuqakathekileyo yikuthi kuzakusondeza eduze kukaJehova uBaba wethu olothando.

IMICIJO YOKUTADITSHA

Imicijo le isitshela ngamasiko, indawo kanye lolimi olusetshenziswa emavesini amanengi eBhayibhili.

UMathewu 12:20

Intambo yesibane ethunqayo: Isibane esasisetshenziswa ezindlini sasibunjwa ngebumba besekugcwaliswa amafutha e-oliva. Intambo yayimunya amafutha ukuze isibane siqhubeke sibhebha. Umutsho wesiGrikhi othi ‘intambo yesibane ethunqayo’ ungatsho intambo elokhu isathunqa ngenxa yokuthi iyabe ilokuyinhlansi okuncane lanxa ilangabi liyabe seliphela kumbe selicitshiwe. Isiphrofetho esiku-Isaya 42:3 sakhuluma ngozwela lukaJesu, ukuthi kasoze acitshe inhlansi yethemba yabantu abathobekileyo labathwele nzima.

UMathewu 26:13

Ngiqinisile: NgesiGrikhi ibala leli lithi a·menʹ njalo lihunyutshwa ngokuthi ʼa·menʹ ngesiHebheru, okutsho ukuthi “akube njalo.” Izikhathi ezinengi uJesu wayesebenzisa ibala leli nxa eqalisa umutsho, isithembiso kumbe isiphrofetho ukuze atshengise ukuthi amazwi akhe aliqiniso futhi athembekile. Indlela uJesu asebenzisa ngayo ibala elithi “ngiqinisile” kumbe elithi ameni kuthiwa ayitholakali kwezinye izingxenye zemibhalo kodwa itholakala kuphela kumaVangeli. Nxa ibala leli liphindwa (a·menʹ a·menʹ), njengoba kunjalo kuVangeli likaJohane, amazwi kaJesu ahunyutshwa ngokuthi “ngiqinisile ngiqinisile.”—Joh 1:51, NW.

AMAPIKITSHA LEMIDWEBO

Amapikitsha, imidwebo kanye lamavidiyo angelamazwi kutshengisa izinto ezitshiyeneyo okukhulunywa ngazo eBhayibhilini.

IBhethifage, INtaba Yama-Oliva Kanye LeJerusalema

Ividiyo le emfitshane itshengisa indlela eya eJerusalema uvela empumalanga, usuka esigabeni esikhona lamuhla okuthiwa yi-et-Tur okucatshangelwa ukuthi yiBhethifage okukhulunywa ngayo eBhayibhilini usiya esiqongweni seNtaba yama-Oliva. IBhethani yona isempumalanga kweBhethifage eceleni elisempumalanga kweNtaba yama-Oliva. Ngesikhathi eseJerusalema, uJesu labafundi bakhe babejayele ukulala edolobheni laseBhethani, eselisaziwa ngokuthi yi-el-ʽAzariyeh (El ʽEizariya ), ibizo lesi-Arabic elitsho “Indawo KaLazaro.” Kungenzakala ukuthi uJesu wayehlala endlini kaMatha, uMariya kanye loLazaro. (Mt 21:17; Mk 11:11; Luk 21:37; Joh 11:1) Engxenye uJesu wasebenzisa indlela etshengiswe kuvidiyo ngesikhathi esuka lapho esiya eJerusalema. NgoNisani 9, 33 C.E., uJesu aze agade ubabhemi edlula eNtabeni yama-Oliva esiya eJerusalema, kungenzakala ukuthi wayesukela eBhethifage.

Indlela Esuka EBhethani Isiya EBhethifage
IBhethifage
INtaba Yama-Oliva
ISigodi SaseKhidroni
INtaba YeThempeli

Isipikili Esihlabe Ithambo Lesithende

Umpikitsha lo utshengisa ithambo lesithende somuntu. Labunjwa lilesipikili sensimbi esingamasentimitha angu-11,5 ubude. Ngo-1968 ngesikhathi kugejwa enyakatho kweJerusalema kwatholakala ithambo lihlatshwe yisipikili futhi kukhanya ngelakudala ngesikhathi samaRoma. Lokhu kusinika ubufakazi bokuthi izipikili zazisetshenziswa nxa kubethelwa umuntu esigodweni. Kungenzakala ukuthi izipikili lezo ziyafanana lalezo ezasetshenziswa ngamasotsha amaRoma ngesikhathi ebethela uJesu Khristu esigodweni. Ithambo elihlatshwe yisipikili latholakala ebhokisini elenziwa ngamatshe okuthiwa yi-ossuary lapho okwakubekwa khona amathambo omuntu osefile ngemva kokuba esewonakele. Lokhu kutshengisa ukuthi umuntu owayebethelwa esigodweni wayengcwatshwa.—Mt 27:35.