Imibuzo Ebuzwa Ngabafundi
Wayesitshoni uJesu lapho esithi: “Lingacabangi ukuthi ngizoletha ukuthula”?
UJesu wafundisa abantu ukuthi bahlale ngokuthula. Kodwa ngelinye ilanga watshela abaphostoli bakhe ukuthi: “Lingacabangi ukuthi ngizoletha ukuthula emhlabeni; angizangaletha ukuthula kodwa ngizoletha inkemba. Ngilande ukuzodala ukwehlukana phakathi komuntu loyise, kwendodakazi lonina, laphakathi kukamalokazana loninazala.” (Mat. 10:34, 35) Wayesitshoni lapha uJesu?
Ayisikho ukuthi uJesu wayelande ukuzokwehlukanisa izimuli, kodwa wayesazi ukuthi lokho akufundisayo kwakungadala ukwahlukana kwezinye izimuli. Yikho-ke labo ababekhetha ukuba ngabafundi bakhe futhi babhabhathizwe kwakumele bakwazi ukuthi kwezinye izikhathi abangakibo babengasoze bathokoze ngalokho abakukhethileyo. Babengaphikiswa ngomkabo abangakhonziyo kumbe yizihlobo. Lokhu kwakungenza kube nzima ukuthi bahlale belandela lokho okwakufundiswa nguJesu.
IBhayibhili likhuthaza amaKhristu ukuthi ‘ahlale ngokuthula labantu bonke.’ (Rom. 12:18) Kodwa kwezinye izimuli izimfundiso zikaJesu zingaba ‘njengenkemba.’ Lokhu kujayele ukwenzakala nxa omunye emulini angemukela izimfundiso zikaJesu, besekusithi abanye baphikisane lalokho asekwamukele. Nxa kungaba njalo izihlobo ziyabe sezizenza “izitha” zalowo oyabe eseyamukele izimfundiso zikaJesu.—Mat. 10:36.
Abafundi bakaJesu abahlala labantu abangena amanye amasonto kuyabe sekumele bakhethe ukuthi bazakwenza lokho okuthokozisa uJehova loJesu kumbe lokho okuzathokozisa izihlobo zabo. Ngokwesibonelo, izihlobo ezingakhonziyo zingazama ukubabamba ngenkani ukuthi bananze imikhosi engavumelani lalokho okutshiwo liBhayibhili. Lapho-ke kuyabe sekumele bakhethe ukuthi bafuna ukuthokozisa bani. UJesu wathi: “Loba ngubani othanda uyise kumbe unina ukwedlula mina kangifanelanga; njalo loba ngubani othanda indodana yakhe kumbe indodakazi yakhe ukwedlula mina kangifanelanga.” (Mat. 10:37) UJesu wayengatsho ukuthi labo abafuna ukuba ngabalandeli bakhe sekumele bazonde abazali babo. Kodwa wayefuna babone ukuthi kuyini okuqakatheke kakhulu empilweni. Lanxa izihlobo zethu zisiphikisa, kumele sihlale sisazi ukuthi okuqakatheke kakhulu yikuthanda uJehova.
Akuthandabuzwa ukuthi ukuphikiswa yizihlobo kungasenza sidane kakhulu. Kodwa abalandeli bakaJesu kumele bahlale bekhumbula amazwi akhe athi: “Loba ngubani ongasemukeliyo isigodo sakhe sokuhlutshwa angilandele, kangifanelanga.” (Mat. 10:38) Ukuphikiswa lokhu akumelanga kubamangalise ngoba ngokunye okumele bakubekezelele. Kodwa bayathemba ukuthi nxa izihlobo zabo zingabona ukuziphatha kwabo okuhle zizatshintsha besezisamukela lokho okufundiswa liBhayibhili.—1 Phet. 3:1, 2.