Uchago Lukamama

Elinye ibhuku lithi: “Uchago lwabantwana oluthengwayo alusoze lwafa lwafanana lochago lukamama.” Okunye okwenza kube njalo yikuthi umzimba kamama uyenelisa ukutshintsha uchago lwakhe kusiya ngokuthi usane ludingani ngalesosikhathi.

Cabanga ngalokhu: Nxa umntwana exhunywa ebeleni uchago alutholayo alufanani lalolo oluyabe soluphuma ekucineni. Oluphuma kuqala lulama-protein amanengi, ama-vitamin, ama-mineral, lamanzi amanengi kodwa oluphuma ekucineni lona lulamafutha amanengi okwenza usane lusale lusuthi. Kanti njalo uchago lukamama luyatshintsha kusiya ngokuthi umntwana unganani lokuthi yisiphi isikhathi somnyaka.

Uchago lukamama lulamanye ama-hormone okuthiwa ngama-melatonin ayiwo enza umuntu alale. Kwezinye izikhathi ama-hormone la aba manengi ebusuku, kumbe abe manengi phakathi kwelanga. Kusiya ngokuthi yisikhathi bani ama-hormone la anceda umntwana ukuthi enelise ukulala ngesikhathi esiyiso njalo ahlale ephapheme ngesikhathi esifaneleyo.

Nxa umama esanda kubeletha kuphuma uchago olulithanga olubizwa ngokuthi ngumthubi. Uchago lolu lugayeka lula esiswini somntwana futhi lulokudla okunengi okwenza usane lusale lusuthi lanxa lumunye kancane nje. Luphinda lube lamasotsha omzimba aqakathekileyo avikela usane emikhuhlaneni futhi lwenza umntwana angagubelani.

Omama akumelanga bakhathazeke ngokuthi uchago lwabo luzakwenela yini ngitsho lanxa belamaphahla ngoba imizimba yabo iyenelisa ukwenza uchago olunengi kusiya ngesidingo.

Ubona njani? Indlela uchago lukamama oluyilo lona yazenzakalela yini kumbe yadalwa?