Ukwenziwa Kwamavidiyo Omhlangano Wesabelo Ka-2020 Olesihloko esithi “Hlala Uthokoza”!

Amavidiyo esiwabukela emihlanganweni yethu yesabelo asithinta inhliziyo futhi asinceda sikuzwisise ngcono lokho esikufundiswa yiMibhalo. UMhlangano Wesabelo ka-2020 olesihloko esithi “Hlala Uthokoza”! ulamavidiyo angu-114, nxa sokubalwa lezinkulumo ezingu-43 ezenziwa ngamalunga eQula Elibusayo kanye labasizi babo. Uyake uzibuze yini ukuthi umsebenzi wokwenza amavidiyo la unganani lokuthi ulezindleko ezingakanani?

Abafowethu labodadewethu abangafika 900 emazweni atshiyeneyo basebenzisa isikhathi sabo kanye leziphiwo zabo ukuze bancedise ekwenzeni uhlelo lomhlangano. Amahora abawaqeda besenza umsebenzi lo owathatha iminyaka emibili angaphose afike ku-100 000. Lokhu kugoqela lamahora angu-70 000 athathwa kusenziwa umdlalo weBhayibhili wemizuzu engu-76, olesihloko esithi UNehemiya: “Ukuthokoza KukaJehova Kungamandla Enu.”

Ngithemba sokuhle kwazikhanyela ukuthi kwaba lezindleko ezinkulu ukuze kunakekelwe izidingo zansuku zonke zabazalwane bethu ababezinikele emsebenzini lo, kanye lokuthi kudingwe imitshina, izinkundla lokunye okutshiyeneyo okwakufuneka ukuze umsebenzi lo uphumelele.

UJared Gossman osebenza kuHlangothi lwe-Audio/Video uthi: “IKhomithi Yokufundisa yeQula Elibusayo iyakuqakathekisa kakhulu ukuthi amavidiyo ethu atshengise amasiko kanye lezindawo ezitshiyeneyo. Lokhu kwenza kucace ukuthi singabazalwane abasemhlabeni wonke.” Uqhubeka esithi: “Kwabalamaqembu angu-24 emazweni angu-11 asebenza ndawonye ukuze umsebenzi wonke lo uphumelele. Ukusebenza ndawonye okunjalo okugoqela amazwe atshiyeneyo kulezindleko ezinkulu njalo kudinga ukuhlela okuhle lokubambisana.”

Amavidiyo ethu amanengi adinga lokuthi sibe lezinkundla kanye lezinto zokusebenzisa ezifaneleyo. Ngokwesibonelo, inkundla yokwenzela umdlalo othi UNehemiya: “Ukuthokoza KukaJehova Kungamandla Enu” yakhelwa phakathi kwestudiyo se-Mt. Ebo duze lePatterson, eNew York, e-U.S.A. Abafowethu bazakhela okufanana lemiduli yeJerusalema yasendulo besebenzisa izinto ezilula ezingaduli kakhulu ukuze iminikelo isetshenziswe kuhle ngesikhathi esifananayo kwenziwe umdlalo otshengisa khona kanye okwenzakala kudala. Kwakhiwa kusetshenziswa amaplanka alula abawabethela ndawonye basebewanamathisela izinto ezenza kukhanye angani yimiduli yamatshe. Imiduli le yayivuma ukutshediswa imiswe ngendlela ezitshiyatshiyeneyo ukuze kuhambelane lezingxenye ezehlukeneyo zomdlalo. Lokhu kwanceda ukuthi kungadingakali izindawo ezinengi ezazingasetshenziswa njengenkundla yomdlalo. Lanxa kunjalo, kwafuneka imali engaba yi $100 000 (U.S.) ukuze kwakhiwe inkundla yomdlalo lo nje kuphela.a

Ukwazi konke lokhu kwenza inhliziyo zethu zigcwale ukubonga okukhulu ngomhlangano wesabelo walonyaka. Kasithandabuzi ukuthi yonke imizamo eyenziweyo ukuthi uhlelo lolu luphumelele izakwenza ukuthi uJehova adunyiswe emhlabeni wonke. Siyalibonga kakhulu ngeminikelo yenu esuka enhliziyweni yokuncedisa emsebenzini womhlaba wonke eliyenza ku-donate.jw.org kanye langezinye izindlela.