11 Ukukhuthala

KUTSHONI?

Abantu abakhutheleyo abakwesabi ukusebenza. Kodwa bayakukholisa ukusebenza nzima ukuze bazinakekele futhi bancedise labanye lanxa besenza umsebenzi ongamangalisiyo.

KUQAKATHEKE NGANI?

Kumele sisebenze empilweni kungelani lokuthi siyafuna kumbe asifuni. Emhlabeni lo esiphila kuwo abantu abanengi abakuthandi ukusebenza nzima kodwa ukusebenza gadalala kunceda wena.​—UmTshumayeli 3:13.

“Sengifunde ukuthi ukusebenza nzima kwenza uziqhenye njalo usuthiseke. Ukuzwa ngilokusuthiseka yikho osekungenze ngakuthanda ukusebenza. Ukuzimisela ukusebenza nzima kuzakunceda ukuthi ube ngumuntu ebantwini.”​—UReyon.

OKUTSHIWO LIBHAYIBHILI: “Ukusebenza nzima konke kuletha inzuzo.”​—IZaga 14:23.

ONGAKWENZA

Amanyathelo alandelayo azakunceda ukuthi ukuthande ukusebenza.

Zigqaje nxa usenza kuhle imisebenzi. Kungelani lokuthi wenza imisebenzi yendlini, uqedisa umsebenzi wesikolo kumbe wenza umsebenzi othile, wenze ngenhliziyo yonke. Nxa ususenelisa ukwenza kuhle umsebenzi, dinga izindlela zokuthi uthuthuke ukuze uqhubeke usenza kuhle kakhulu futhi ngesikhathi esincane. Uzakukholisa ukusebenza nxa ulokhe usiba yingcitshi emsebenzini wakho.

OKUTSHIWO LIBHAYIBHILI: “Uyambona umuntu oyingcitshi emsebenzini wakhe na? Uzasebenzela amakhosi; akayikusebenzela abantukazana.”​—IZaga 22:29.

Cabanga ngabanye. Izikhathi ezinengi ukwenza kuhle umsebenzi wakho kunceda labanye. Ngokwesibonelo nxa ukhuthele ekwenzeni imisebenzi yakho ngekhaya uzaphungula imisebenzi yabanye emulini.

OKUTSHIWO LIBHAYIBHILI: “Ukupha kubusisekile okudlula ukwamukela.”​—ImiSebenzi 20:35.

Yenza okunengi. Kulokuthi uphongubambabamba kancane zama ukuthi wenze okunengi kulalokho okukhangelelweyo. Nxa ungenza njalo kutsho ukuthi uyenelisa ukuqondisa impilo yakho ngoba uyabe uzikhethela ukwenza umsebenzi ungazange ubanjwe ngenkani.​—UMathewu 5:41.

OKUTSHIWO LIBHAYIBHILI: “Umusa owenzayo ube ngowokuzithandela hatshi ukubanjwa ngamandla.”​—KuFilimoni 14.

Sebenza kodwa ungazibulali. Abantu abakhutheleyo abasomavila futhi abatshoneli ukusebenza. Bayasebenza nzima kodwa abazibulali ngemisebenzi, bayazinika isikhathi sokuphumula.

OKUTSHIWO LIBHAYIBHILI: “Ungazihlukuluzi uzigugise ngomsebenzi, . . . hlakanipha wazi ukuzikhuza.”​—IZaga 23:4.