Kuyini Okukholwa Ngabanye?

AmaHindu

akholwa ukuthi nxa umuntu angafa uyaphinda azalwe esengomunye umuntu. Nxa empilweni yakhe yokuqala wenza izono, uyabe ezahlupheka empilweni yakhe yesibili. Athi nxa umuntu engasacabangi ngezinto zokukhonza, angafa kasoze aphinde azalwe.

AmaMozilemu

athi okwenza umuntu ongasokholwa ahlupheke yikuthi uyabe ejeziselwa izono zakhe, ikanti nxa elikholwa uyabe elingwa ukuze kukhanye ukuthi ulokholo oluqinileyo yini. Umongameli we-Islamic Society of North America uDr. Sayyid Syeed uthi izinhlupho zisikhumbuza ukuthi “kumele sihlale sibonga uNkulunkulu ngezibusiso asinika zona njalo sincede lalabo abasebunzimeni.”

Isiko lamaJuda

lithi okwenza umuntu ahlupheke yizenzo zakhe. Amanye amaJuda athi abantu abafileyo bazavuswa, besekusithi labo ababehlupheka bengelacala baphathwe kuhle. Amanye afundisa ukuthi umuntu angafa uyaphinda azalwe esengomunye umuntu kumbe eseyinyamazana futhi lokho kumnika ithuba lokuthi alungise lapho ayephambanise khona engakafi.

AmaBhuda

akholwa ukuthi nxa umuntu angafa uyabe ezaphinda azalwe esengomunye umuntu futhi lokhu kwenzakala kanengi. Athi nxa umuntu elemikhuba emibi lezifiso ezimbi, uyabe ezaphinda azalwe ukuze ahlupheke ngenxa yezono zakhe. Kodwa nxa esengumuntu olungileyo kasoze aphinde azalwe. Aphinda athi nxa umuntu esehlakaniphile, esesenza imisebenzi emihle njalo esecabanga lezinto ezinhle ukuhlupheka kwakhe kuyaphela.

Abalandeli bakaConfucius

I-Dictionary of Comparative Religion ithi abantu laba bakholwa ukuthi okujayele ukwenza abantu bahlupheke “yikwehluleka kwabo loba amaphutha abawenzayo.” Bafundisa ukuthi abantu banganciphisa indlela abahlupheka ngayo nxa bangenza izinto ezinhle. Lanxa kunjalo bathi inhlupho ezinengi ngeke sizibalekele ngoba ‘zibangelwa yizidalwa zomoya ezilamandla kulathi futhi akulanto esingayenza.’

Abantu abagxile emasikweni

bathi ukuhlupheka kubangelwa yibuthakathi. Bathi inyanga zingakwenza ube lenhlanhla ikanti abathakathi bangakulimaza. Yikho ukuze bangakulimazi kulemikhuba okuyabe kumele uyenze. Bakholwa ukuthi nxa umuntu ephosiwe, imikhuba eyenziwa zinyanga kanye lemithi yazo ingamelapha.

AmaKhristu

akholwa ukuthi ukuhlupheka kwabangelwa yikona kwabazali bethu bokuqala njengoba kuchasiswa eBhayibhilini. Lanxa kunjalo, amanye akuntshintshile lokhu afundisa izinto ezingayisizo. Ngokwesibonelo, amanye amaKatolika afundisa ukuthi nxa umuntu ehlupheka kuyabe kungani ‘unikela kuNkulunkulu’ ecela ukuthi [uNkulunkulu] ancede ibandla kumbe ukuthi asebenzise ukuhlupheka lokho ukuze asindise omunye umuntu.