5. Ukuhlupheka Kuzaphela Yini?
Kungani Kumele Udinge Impendulo Yombuzo Lo?
Impendulo yombuzo lo iqakathekile ngoba ingakunika ithemba ngelakusasa njalo ingantshintsha okucabangayo ngoNkulunkulu.
Okumele Ucabange Ngakho
Abantu abanengi balesifiso sokuqeda ukuhlupheka kodwa kabalawo amandla okwenza njalo. Cabanga ngokulandelayo:
Lanxa kulentuthuko kwezokwelapha . . .
Umkhuhlane wenhliziyo ulokhu ubulala abantu abanengi kakhulu.
Imvukuzane ibulala amamiliyoni abantu umnyaka ngamunye.
Ebhukwini elithi Frontiers in Immunology, uDr. David Bloom wathi: “Abantu balokhu bethwele nzima ngemikhuhlane eyayikhona kudala kanye leminye emitsha ebakhona. Kuleminye futhi ethelelwanayo eyayikhona esiphinde yaphenduka.”
Lanxa amanye amazwe elemali enengi . . .
Umnyaka ngamunye, abantwana abanengi kakhulu bayafa futhi abanengi bakhona ngabahlala ezindaweni ezilobuyanga.
Abantu abanengi bahlala ezindaweni ezingahlanzekanga lezingelazambuzi.
Abantu abanengi kakhulu baswela amanzi ahlanzekileyo.
Lanxa abantu sebesazi okunengi ngamalungelo abo . . .
Umbiko owakhitshwa yi-United Nations uthi amazwe amanengi alokhu elohlupho lwezigilamkhuba ezithengisela abantu kwamanye amazwe ukuthi bayekuba yizigqili. Kungenzeka ukuthi abanye ohulumende kabakwazi ukuthi into enjalo iyenzakala emazweni abo kumbe kabanelisi ukuqeda izigilamkhuba lezo.
FUNDA OKUNENGI
Bukela ividiyo ethi Uyini UMbuso KaNkulunkulu? etholakala ku-jw.org.
Okutshiwo LiBhayibhili
UNkulunkulu ulendaba lathi.
UNkulunkulu uyasizwela kakhulu nxa sihlupheka.
“Ngokuba [uNkulunkulu] keyisanga loba adelele ukuhlupheka kwalowo ohlukuluzwayo; kamfihlelanga ubuso bakhe kodwa walalela ukukhala kwakhe ecela ukusizwa.”—IHUBO 22:24.
“Liphosele kuye konke okulikhathazayo ngoba yena ulendaba lani.”—1 UPHETRO 5:7
Ukuhlupheka kuzaphela.
IBhayibhili lisitshela ukuthi injongo kaNkulunkulu ngabantu izagcwaliseka.
“UNkulunkulu . . . uzakwesula zonke izinyembezi emehlweni abo, ukufa ngeke kusabakhona, loba ukulila loba ukukhala loba ubuhlungu, ngeke kusabakhona.”—ISAMBULO 21:3, 4.
UNkulunkulu uzakhipha konke okubangela ukuthi sihlupheke.
IBhayibhili lithi uNkulunkulu uzasebenzisa uMbuso wakhe ukuze aqede ukuhlupheka.
“UNkulunkulu wasezulwini uzabeka umbuso ongasoze wabhidlizwa lanini njalo ongasoze utshiyelwe abanye abantu. . . . Wona uzakuma laphakade.”—UDANYELI 2:44.