Dinga Iqiniso
Uhlupho Olujayelekileyo
Okwenza abanengi babe lobandlululo yikuthi bayabe betshelwe izinto ezingaqondanga. Izibonelo ezilandelayo ziyakufakazela lokhu:
Abanye abaqhatshi bakholwa ukuthi abesifazana abenelisi ukwenza imisebenzi efuna ubuciko kwezesayensi, amandla lokukhalipha.
Omunye umhlobo wabantu ungasola omunye umhlobo usithi yiwo kuphela oqhatshwayo.
Abanye abantu bazitshela ukuthi bonke abantu abakhubazekileyo bahlala bedanile njalo becaphukile.
Abantu abakukholwayo lokhu bangadinga lezibonelo ukuze batshengise ukuthi abakukholwayo kuliqiniso lokuthi ababandlululi. Bacabanga ukuthi loba ngubani ongavumelani labo wenziwa yikuthi kalalwazi.
Isimiso EsiseBhayibhilini
“Kakulunganga ukutshiseka kodwa ungelalwazi.”—IZAGA 19:2.
Ivesi le isifundisani? Nxa singelalwazi olugcweleyo ngendaba ethile singenza izinqumo ezimbi. Singacina sesikholwa izinto ezingamahungahunga nje besekusenza ukuthi sibandlulule abanye abantu.
Ukwazi Iqiniso Ngabanye Abantu Kunceda Ngani?
Nxa sesilazi iqiniso ngabantu, asisoze sikholwe amanga abanye abantu abawakhulumayo ngabo. Nxa sesikwazi ukuthi esakutshelwayo ngomhlobo othile wabantu kungamanga, asisoze siphongukholwa esikutshelwa ngabanye abantu besola eminye imihlobo.
Ongakwenza
Khumbula ukuthi nxa umuntu oyedwa phakathi komhlobo othile angenza okubi, akutsho ukuthi bonke abantu bomhlobo lowo sebebabi.
Khumbula ukuthi ungabe ulokunye ongakwaziyo ngabantu bomhlobo lowo.
Zama ukuthola ulwazi oluqondileyo ngabo.