Ezempucuko Zingaphambanisa Njani Indlela Ocabanga Ngayo?
Ezempucuko zinceda abantu abatshiyeneyo, okuhlanganisa abasezikolo labasebenzayo ukuthi bahlale befunda izinto ezinengi. Khathesi sokulula sibili ukuthi umuntu azithaphele ulwazi ezihlalele emzini wakhe.
Kodwa abantu abatshonela ezempucuko . . .
bathwala nzima ukuthi bajule kwabakubalayo.
bathwala nzima ukuthi bafake ingqondo yabo entweni eyodwa.
bayaphangisa ukubhowakala nxa bebodwa.
OKUMELE UKWAZI
NXA UBALA
Ngezinye izikhathi abantu abatshonela ezempucuko abalasineke sokubala indaba baze bayiqede. Nxa bebala baphongudlulisa amehlo nje ukuze bazwe ukuthi kukhulunywa ngani.
Akukubi sibili ukwenza njalo nxa udinga impendulo yombuzo othile endabeni, kodwa kungenza uthwale nzima nxa sokumele uyibale uyizwisise.
ONGACABANGA NGAKHO: Uyenelisa yini ukubala indaba ende? Ukwenza njalo kungakunceda njani ukuthi ufunde?—IZAGA 18:15.
UKUFAKA INGQONDO ENTWENI EYODWA
Abanye abantu bacabanga ukuthi ukusebenzisa ezempucuko kungabanceda benze izinto ezinengi ngesikhathi esisodwa. Ngokwesibonelo bayabala ngapha bethumezela abangane babo amameseji. Kodwa lokhu kungabaphambanisa bacine bengasakwenzanga kuhle kokubili.
Khona akulula ukufaka ingqondo entweni eyodwa kodwa kuyanceda kakhulu. Osakhulayo okuthiwa nguGrace uthi, “Awusoze wenze amaphutha amanengi kumbe ukhathazeke kakhulu.” Uqhubeka esithi, “Sengafunda ukuthi kungcono ukufaka ingqondo entweni eyodwa ngoba ungaxotshanisa izinto ezinengi ucina uphambanisa okwenzayo.”
ONGACABANGA NGAKHO: Ukwenza izinto ezinengi ngesikhathi esisodwa kuyakuphambanisa yini ukuthi uzwisise okubalayo njalo ungakukhohlwa?—IZAGA 17:24.
NXA UWEDWA
Abanye abantu abakuthandi ukuba bodwa yikho basebenzisa ezempucuko ukuze bazilibazise. Owesifazana okuthiwa ngu-Olivia uthi nxa eyedwa akuhlaleki ngitsho lemizuzu engu-15 engazange abukele i-TV kumbe akhangele ifoni yakhe loba i-tablet.
Kodwa nxa uwedwa uba lethuba lokucabanga ujule futhi kungelani lokuthi ungosakhulayo kumbe ungumuntu omdala, kungakunceda ekufundeni.
ONGACABANGA NGAKHO: Nxa uwedwa uyacabanga ujule yini?—1 KUTHIMOTHI 4:15.
ONGAKWENZA
HLOLISISA INDLELA OSEBENZISA NGAYO EZEMPUCUKO
Ungazisebenzisa njani ezempucuko ukuze ufunde okunengi? Ezempucuko zingakuphambanisa njani ukuthi ujulise ingqondo kokubalayo njalo ufunde?
ISIMISO ESISEBHAYIBHILINI: “Gcina ukuhlakanipha okuncedayo, uhlale usebenzisa kuhle ingqondo.”—IZAGA 3:21, NWT.