Lokho Esikufundiswa LiBhayibhili
“Lo ngumlando wamazulu lomhlaba ekudalweni kwakho.” (UGenesisi 2:4) Ivesi le isitshela ukuthi umhlaba wavela ngaphi. Kodwa lokho okutshiwo liBhayibhili kuyahambelana yini lokutshiwo ngabesayensi? Ake sixoxe ngezinye izibonelo.
Ekuqaleni: Kudalwa amazulu lomhlaba
Amazulu lomhlaba kwakuvele kukhona yini?
UGenesisi 1:1 uthi: “Ekuqaleni uNkulunkulu wadala amazulu lomhlaba.”
Kungakafiki u-1950, abezesayensi ababedumile babekholwa ukuthi amazulu lomhlaba kwakukhona. Kodwa khathesi sebethole ubufakazi obuveza ukuthi amazulu lomhlaba kwaba lesiqalo sibili.
Umhlaba wawunjani ekuqaleni?
KuGenesisi 1:2, 9 iBhayibhili lisitshela ukuthi ekuqaleni umhlaba “wawungelasimo njalo ungelalutho,” ugcwele amanzi yonke indawo.
Abezesayensi bayavumelana lamazwi la. UPatrick Shih uthi ekuqaleni umhlaba wethu wawungelamoya wokuphefumula futhi wawungabukeki. Imagazini ethiwa yi-Astronomy ithi: ‘Ulwazi olutsha esesilutholile lutshengisa ukuthi umhlaba wawugcwele amanzi, kungela ngitsho umhlabathi owomileyo.’
Umkhathi wethu watshintsha njani?
UGenesisi 1:3-5 utshengisa ukuthi ekuqaleni, umkhathi wawugubuzele okokuthi nxa usemhlabeni wawungeke ubone ukuthi ukukhanya kuvela ngaphi. Kodwa ngokuhamba kwesikhathi, ilanga lenyanga kwasekubonakala kuhle emhlabeni.—UGenesisi 1:14-18.
IBhayibhili kalitsho ukuthi izinto eziphilayo emhlabeni zadalwa ngensuku eziyisithupha ezilamahora angu-24
I-Smithsonian Environmental Research Center ithi ekuqaleni ukukhanya okwakufika emhlabeni kwakukulutshwana futhi kwakugcwele inkungu eyayigubuzele umhlaba wonke. Ngokuhamba kwesikhathi inkungu yaphela kwasekubonakala isibhakabhaka esiluhlaza.
Kuyini okwaqalisa ukudalwa futhi kwalandelana njani?
UGenesisi 1:20-27 usitshela ukuthi kwaqala kwadalwa inhlanzi, inyoni, izinyamazana kwasekucina ngabantu. Abezesayensi bakholwa ukuthi kwaqala kwadalwa inhlanzi, kwasekuhlala isikhathi eside kungakadalwa izinyamazana, kwasekucina ngabantu.
IBhayibhili kalitsho ukuthi izinto eziphilayo ngeke ziguquke ngokuhamba kwesikhathi
Lokho IBhayibhili Elingakutshoyo
Abanye abantu bathi okutshiwo liBhayibhili akuhambelani lokutholwe ngabezesayensi. Lokhu kungenxa yokuthi kabakuzwisisi sibili okufundiswa liBhayibhili.
IBhayibhili kalitsho ukuthi umhlaba wadalwa eminyakeni engu-6 000 eyadlulayo. Kodwa lithi “ekuqaleni” kwadalwa amazulu lomhlaba. (UGenesisi 1:1) Lanxa kunjalo, kalisitsheli ukuthi lokhu kwenzakala ngawuphi umnyaka.
IBhayibhili kalitsho ukuthi zonke izinto eziphilayo zadalwa ngensuku eziyisithupha ezilamahora angu-24.
Ibala elithi ‘usuku’ elisetshenziswe eBhayibhilini litsho isikhathi eside ukwedlula ilanga elilodwa elilamahora angu-24. Ngokwesibonelo, lisitshela ukuthi umhlaba lakho konke okuphilayo kwadalwa ngensuku eziyithupha. Insuku lezi zibizwa ngokuthi ‘lusuku uJehovaa adala ngalo amazulu lomhlaba.’ (UGenesisi 2:4) Insuku eziyisithupha okukhulunywa ngazo kuGenesisi isahluko 1 ziphakathi kwesikhathi lesi. Yikho usuku ngalunye phakathi kwalezi eziyisithupha lumela isikhathi eside kakhulu.
IBhayibhili kalitsho ukuthi izinto eziphilayo ngeke ziguquke ngokuhamba kwesikhathi.
IBhayibhili lithi izinyamazana zadalwa “ngemihlobo yazo.” (UGenesisi 1:24, 25) Ibala eliseBhayibhilini elithi imihlobo kayisilo lesayensi kodwa kukhanya litsho amaqembu atshiyeneyo ezinyamazana. Yikho ngaphansi komhlobo owodwa kungaba lezinyamazana ezinengi ezidalwe ngendlela ehambelanayo. Lokhu kutshengisa ukuthi izinyamazana zomhlobo owodwa ezihlala endaweni efananayo zingenelisa ukuzala umntwana ongafanani lazo kodwa oyabe engumhlobo wazo.
Ubona njani?
Njengoba sesibonile, iBhayibhili likwenza kucace ukuthi amazulu avela ngaphi, lokuthi umhlaba wawunjani ekuqaleni lokuthi ukuphila kwaqalisa njani. Kungenzakala yini ukuthi iBhayibhili liqondile nxa likhuluma ngokuthi ngubani owadala izinto lezi? I-Encyclopædia Britannica ithi umbono wokuthi ukuphila kwavela kulowo omkhulu kulabantu uvumelana lalokho okutholwe ngabesayensi.b
a IBhayibhili lisitshela ukuthi ibizo likaNkulunkulu nguJehova.
b I-Encyclopædia Britannica kayifundisi ukuthi izinto eziphilayo zadalwa.