Indoda Yokuqala Lowesifazana Wokuqala

KUYINI okutsha emfanekisweni lo? Ye, ngabantu abakuwo. Yindoda yokuqala lowesifazana wakuqala. Ngubani owabadalayo? NguNkulunkulu. Uyalazi yini ibizo lakhe? NguJehova. Indoda lowesifazana lo baphiwa amabizo kwathiwa ngu-Adamu lo-Eva.

Nansi indlela uJehova uNkulunkulu adala ngayo u-Adamu. Wathatha uthuli emhlabathini wasebumba umzimba opheleleyo owendoda. Wasephefumulela emakhaleni ka-Adamu, u-Adamu waphila.

UJehova uNkulunkulu wayelomsebenzi ayefuna u-Adamu awenze. Watshela u-Adamu ukuthi anike izinyamazana zonke amabizo. U-Adamu engabe wazibuka zonke izinyamazana okwesikhathi eside ukuze azikhethele amabizo angcono. Esanika izinyamazana amabizo, u-Adamu wananzelela olunye ulutho. Uyakwazi ukuthi kuyini akunanzelelayo?

Wananzelela ukuthi zonke izinyamazana zazihamba ngazimbili. Kwakulezindlovu ezingobaba lezingomama, lezilwane ezingobaba lezingomama. Kodwa yena u-Adamu wayeyedwa. Yikho-ke, uJehova wenza ukuthi u-Adamu ehlelwe yibuthongo obukhulu wasethatha olunye ubambo luka-Adamu. UJehova wenzela u-Adamu owesifazana esebenzisa ubambo lolu wasesiba ngumfazi ka-Adamu.

U-Adamu wasethokoza kakhulu! Kumele ukuthi Eva laye kwamthokozisa kakhulu ukuthi afakwe esivandeni esihle kangaka! Khathesi babengaba labantwana njalo bahlale ndawonye bethokoza.

UJehova wayefuna ukuthi u-Adamu lo-Eva baphile kuze kube nini lanini. Wayefuna ukuthi benze umhlaba wonke ubemuhle njengesivande sase-Edeni. Kumele ukuthi ukucabanga ngalokho kwenza u-Adamu lo-Eva bathokoza kakhulu! Wawuzakuthanda yini ukuthi lawe wenze umhlaba ube yisivande esihle? Kodwa ukuthokoza kuka-Adamu lo-Eva kakuhlalanga isikhathi eside. Ake sizwe ukuthi kungani.