Kuqalisa Impilo Enzima

BEPHANDLE kwesivande sase-Edeni u-Adamu lo-Eva baba lezinhlupho ezinengi. Kwakumele basebenze nzima ukuze bathole ukudla. Kulokuthi babone izihlahla ezinhle ezilezithelo, babona kukhula ameva amanengi lezihlahla ezinengi zameva. Yikho okwacina kusenzakala lapho u-Adamu lo-Eva beyekela ukulalela uNkulunkulu njalo beyekela ukuba ngabangane bakhe.

Kodwa okubi kakhulu yikuthi u-Adamu lo-Eva baqalisa ukufa. Khumbula, uNkulunkulu wayebatshelile ukuthi bangadla esihlahleni ayebatshele ukuthi bengasidli, babezakufa. Ngelanga abadla ngalo isihlahla, baqalisa ukufa. Babeyizithutha ngokungalaleli uNkulunkulu.

Bonke abantwana baka-Adamu lo-Eva bazalwa uNkulunkulu esexotshe abazali babo esivandeni sase-Edeni. Lokhu kutsho ukuthi labantwana babo kwakuzamele baguge bafe.

Aluba u-Adamu lo-Eva balalela uJehova, impilo yayizaba mnandi kubo lasebantwaneni babo. Bonke babezaphila phakade bethokoza emhlabeni. Akula muntu owayezaguga, agule abesesifa.

UNkulunkulu ufuna abantu baphile phakade bethokoza njalo uyathembisa ukuthi ngelinye ilanga lokhu kuzakwenzakala. Abantu bonke bazakuba lempilakahle njalo umhlaba wonke uzaba muhle. Bonke abantu emhlabeni bazakuba ngabangane abahle njalo bazakuba ngabangane bakaNkulunkulu.

Kodwa u-Eva wayeselahlekelwe yibungane bakhe loNkulunkulu. Yikho lapho ezala abantwana bakhe kwakungalula kuye. Wezwa ubuhlungu. Ukungalaleli uJehova kwamlethela usizi olunengi?

U-Adamu lo-Eva babelamadodana lamadodakazi amanengi. Lapho kuzalwa indodana yabo yokuqala, bayibiza ngokuthi nguKhayini. Indodana yabo yesibili bayithi ngu-Abela. Kuyini okwenzakala kubo? Uyakwazi yini?