UZamcolo Omkhulu

PHANDLE komkhumbi, abantu baqhubeka ngempilo njengansuku zonke. Babelokhu bengakholwa ukuthi uZamcolo engabuya. Kungenzeka ukuthi baqhubeka behleka kakhulu. Kodwa ukuhleka kwaphela masinyane.

Izulu laqalisa ukuna. Lana angani ngumuntu ochitha amanzi asebhakedini. UNowa wayeqinisile! Kodwa kwasekuphuzile ukuthi bangene emkhunjini. Umnyango wawuvalwe ngci nguJehova.

Masinyane umhlaba wonke wavalwa ngamanzi. Amanzi aba njengemifula emikhulu. Akhukhula izihlahla lamatshe amakhulu njalo enza umsindo omkhulu. Abantu baqalisa ukwesaba. Baya endaweni eziphezulu. Bafisa ukuthi nga babelalele uNowa, bangena emkhunjini umnyango usavulekile! Kodwa kwasekuphuzile.

Amanzi aqhubeka elokhu eqansa. Izulu lana okwamalanga angu-40 lobusuku obungu-40. Aqansa emaceleni kwezintaba njalo masinyane lezintaba ezinde kakhulu zasezicwilile. Njengoba nje uNkulunkulu ayetshilo, bonke abantu ababephandle komkhumbi bafa kugoqele lezinyamazana. Kodwa wonke umuntu owayesemkhunjini wayengekho engozini.

UNowa lamadodana akhe babewakhe kuhle umkhumbi. Amanzi awuphakamisa, wandenda phezu kwamanzi. Kwathi ngelinye ilanga, izulu seliphelile, ilanga laphuma. Kwakulesimanga! Kwakululwandle yonke indawo. Umkhumbi yiwo wodwa owawukhanya undenda phezu kwamanzi.

Iziqhwaga zazingasekho. Zazingeke zisabalimaza abantu. Zonke zasezifile, kugoqele labomama bazo labo bonke abantu ababi. Kodwa kwenzakalani ngabobaba bazo?

Obaba beziqhwaga lezi babengasibo bantu abafanana lathi. Babeyizingilosi ezazibuye zazohlala njengabantu emhlabeni. Ngakho lapho uZamcolo eqalisa, kabazange bafe labanye abantu. Bayekela ukusebenzisa imizimba enjengeyabantu, babuyela ezulwini sebenjengezingilosi. Kodwa kabavunyelwanga ukuthi babuyele emulini yezingilosi zikaNkulunkulu. Ngakho baba yizingilosi zikaSathane. EBhayibhilini babizwa ngokuthi ngamadimoni.

UNkulunkulu wasesenza ukuthi kuvunguze umoya, amanzi kazamcolo aseqalisa ukwehla. Ngemva kwenyanga ezinhlanu, umkhumbi wahlala phezu kwentaba. Kwadlula amalanga amanengi, njalo labo ababephakathi komkhumbi babesithi bangakhangela phandle babone phezu kwezintaba. Amanzi aqhubeka esehla.

UNowa wasekhipha inyoni emnyama okuthiwa liwabayi phandle komkhumbi. Yayilokhu iphapha okwesikhatshana iphinde iphenduke ngenxa yokuthi yayiswela indawo yokuhlala. Yaqhubeka isenza lokhu njalo lapho iphenduka yayilokhu ihlala phezu komkhumbi.

UNowa wayefuna ukubona ukuthi amanzi ayesephelile yini emhlabeni ngakho wathuma ijuba. Kodwa lalo laphenduka ngenxa yokuthi laswela indawo yokuhlala. UNowa waphinda walithuma futhi okwesibili, laphenduka lilehlamvu lesihlahla se-oliva emlonyeni walo. Ngakho uNowa wabona ukuthi amanzi ayeseyehlile. UNowa walithuma okwesithathu ijuba njalo lathola indawo ewomileyo yokuhlala.

UNkulunkulu wasekhuluma loNowa. Wathi: ‘Phuma emkhunjini, wena lomkakho, lamadodana akho labomkawo. Khupha yonke into ephilayo kugoqele lezinyamazana.’ Babehlale emkhunjini isikhathi esidlula umnyaka. Singahle sibone ukuthi babekuthabele ukuba ngabaphilayo lokuphuma phandle!