UNkulunkulu Uvivinya Ukholo luka-Abhrahama

UYAKUBONA yini okwenziwa ngu-Abhrahama lapha? Ulengqamu njalo kukhanya angani uzabulala umntanakhe. Engabe ekwenzelani lokhu? Okokuqala, ake sibone indlela u-Abhrahama loSara abathola ngayo indodana yabo.

Khumbula ukuthi uNkulunkulu wabathembisa ukuthi babezakuba lendodana. Kodwa lokhu kwabonakala angani kwakungeke kwenzeke ngoba u-Abhrahama loSara basebegugile. Loba kunjalo, u-Abhrahama wayekholwa ukuthi uNkulunkulu wayengenza ulutho olwalubonakala angani lwalungeke lwenzakale. Manje kwenzakalani?

Kwadlula umnyaka uNkulunkulu enze isithembiso sakhe. U-Abhrahama eseleminyaka engu-100 uSara elengu-​90, baba lomntwana ongumfana okuthiwa ngu-Isaka. UNkulunkulu wagcina isithembiso sakhe!

Kodwa lapho u-Isaka esemkhudlwana, uJehova wavivinya ukholo luka-Abhrahama. Wambiza wathi: ‘Abhrahama!’ U-Abhrahama waphendula wathi: ‘Ngilapha!’ UNkulunkulu wasesithi: ‘Thatha indodana yakho, indodana yakho eyiyo yodwa, u-Isaka, omthandayo, uye entabeni engizakutshela yona. Khonapho ubulale umntanakho umenze abe ngumnikelo womhlatshelo.’

Ngenxa yokuthi u-Abhrahama wayethanda umntanakhe kakhulu, amazwi la amenza wadana kakhulu. Khumbula njalo ukuthi uNkulunkulu wayethembise ukuthi abantwana baka-Abhrahama babezahlala eKhenani. Kodwa lokhu kwakuzakwenzakala njani u-Isaka esefile? U-Abhrahama wayengakuzwisisi lokho kodwa walalela uNkulunkulu.

Esefikile entabeni, u-Abhrahama wabopha u-Isaka wamfaka phezu kwe-alithare ayelakhile. Wasekhupha ingqamu ukuze abulale indodana yakhe. Kodwa ngesikhathi leso ingilosi kaNkulunkulu yamemeza yathi: ‘Abhrahama, Abhrahama!’ U-Abhrahama waphendula wathi: ‘Ngilapha!’

UNkulunkulu wasesithi: ‘Ungamthinti umfana. Ungenzi lutho kuye. Khathesi sengisazi ukuthi ulokholo kimi, ngokuba kawungincitshanga indodana yakho eyiyo yodwa.’

U-Abhrahama wayelokholo oluqinileyo kuNkulunkulu! Wayekholwa ukuthi kwakungela lutho olwalungehlula uJehova lokuthi uJehova wayengamvusa u-Isaka nxa wayengafa. Kodwa kwakungayisiyo intando kaNkulunkulu ukuthi u-Abhrahama abulale u-Isaka. Yikho-ke uNkulunkulu wenza ukuthi kube lemvu ebanjelwe esixukwini esiseduze, wasetshela u-Abhrahama ukuthi anikele ngayo kulokunikela ngendodana yakhe.