Amaphahla Ayengafanani

UYAKUBONA yini ukuthi abafana ababili abalapha kabafanani? Uyawazi yini amabizo abo? U-Esawu uyazingela njalo umfana oweluse izimvu nguJakhobe.

U-Esawu loJakhobe babengamadodana ka-Isaka loRabheka angamaphahla. U-Isaka wayethanda kakhulu u-Esawu ngoba wayengumzingeli omkhulu njalo wayeletha ukudla ngekhaya ukuze imuli idle. Kodwa uRabheka wayethanda kakhulu uJakhobe ngoba wayengumfana othuleyo njalo owayengathandi ukulwa.

Ukhulu wabo u-Abhrahama wayesaphila. Kufanele ukuthi uJakhobe wayekuthanda kakhulu ukumlalela nxa emtshela ngoJehova. U-Abhrahama wafa eseleminyaka engu-175 njalo amaphahla ayeseleminyaka engu-15.

U-Esawu watshada labafazi baselizweni laseKhenani eleminyaka engu-40. Lokhu kwadanisa u-Isaka loRabheka ngoba abafazi laba babengamkhonzi uJehova.

Kodwa ngelinye ilanga kwenzakala into eyayenza u-Esawu wamzondela kakhulu umnewabo uJakhobe. Kwafika isikhathi sokuthi u-Isaka anike indodana yakhe yakuqala isibusiso. U-Esawu wayekhangelele ukuthola isibusiso ngoba wayemkhulu kuloJakhobe. Kodwa u-Esawu wayesethengisele uJakhobe ilungelo lokuthola isibusiso. Lapho abafana laba ababili bezalwa, uNkulunkulu wayethe uJakhobe nguye owayezathola isibusiso. Ngakho okwayenzakalayo yikuthi u-Isaka wanika uJakhobe indodana yakhe isibusiso.

Lapho u-Esawu esekwazi okwakwenzakele, wamzondela uJakhobe. Wazonda kakhulu okokuthi wayesecabanga ukumbulala uJakhobe. URabheka wathi esizwa lokhu wakhathazeka kakhulu. Wasetshela umkakhe u-Isaka ukuthi: ‘Kungaba kubi kakhulu nxa uJakhobe engatshada labafazi abangamaKhenani.’

Ngemva kwalokho, u-Isaka wabiza indodana yakhe uJakhobe wayitshela ukuthi: ‘Ungathathi umfazi womKhenani. Hamba khathesi uye emzini kayihlomkhulu uBhethuweli eHarani. Thatha khona umfazi, emadodakazini kaLabani, umalume wakho.’

UJakhobe walalela ubaba wakhe wahle waqalisa uhambo lwakhe olude esiya lapho okwakuhlala khona izihlobo zakhe eHarani.