UJosefa Ufakwa Ejele

UJOSEFA uhanjiswa eGibhithe eleminyaka engu-17 kuphela. Khonangale uthengiselwa indoda ethiwa nguPhothifa. UPhothifa usebenzela inkosi yaseGibhithe okuthiwa nguFaro.

UJosefa uyisebenzela gadalala inkosi yakhe uPhothifa. Ngakho uJosefa esekhulile, uPhothifa umnika isikhundla sokukhangela indlu yakhe yonke. Kodwa kungani uJosefa esejele? Kungenxa yomkaPhothifa.

UJosefa ukhula abe yindoda ebukeka kuhle, yikho umkaPhothifa usefuna ukulala laye. Kodwa uJosefa kasoze akwenze lokhu ngoba uyakwazi ukuthi kubi. UmkaPhothifa uzonda kakhulu. Ngakho lapho umkakhe efika ngekhaya, uqamba amanga esithi: ‘UJosefa lowana ongalunganga uzame ukulala lami!’ UPhothifa ucabanga ukuthi umkakhe uqinisile, abesemzondela kakhulu uJosefa. Yikho umfaka ejele.

Indoda ekhangela ijele iyabona ukuthi uJosefa uyindoda elungileyo. Ngakho inika uJosefa isikhundla sokukhangela ezinye izibotshwa. Ngemva kwesikhathi, uFaro uzondela umphathinkezo lompheki wezinkwa abesebafaka ejele. Ngelinye ilanga ebusuku, abantu laba ababili bayaphupha, kodwa kabakwazi ukuthi amaphupho abo atshoni. Ngelanga elilandelayo uJosefa uthi: ‘Ngitshelani amaphupho enu.’ Bayamtshela, uJosefa, esizwa nguNkulunkulu, uyabachasisela okutshiwo ngamaphupho abo.

Kumphathinkezo, uJosefa uthi: ‘Phakathi kwezinsuku ezintathu uzakhitshwa ejele, njalo uzakuba ngumphathinkezo kaFaro futhi.’ UJosefa uphinda amtshele athi: ‘Nxa usuphumile, ungikhulumele kuFaro ukuze ngiphume kuleli jele.’ Kodwa kumpheki wezinkwa uJosefa uthi: ‘Phakathi kwezinsuku ezintathu uFaro uzakuquma ikhanda.’

Ngemva kwamalanga amathathu, okwakhulunywa nguJosefa kuyenzakala. UFaro uquma ikhanda lompheki wezinkwa. Kodwa umphathinkezo uyakhitshwa ejele abeseqalisa ukusebenzela inkosi futhi. Kodwa umphathinkezo lo uyamkhohlwa uJosefa! Kamtsheli uFaro ngoJosefa, ngakho uJosefa kumele aqhubeke esejele.