INDABA 26
UJobe Wathembeka kuNkulunkulu
UYAYIZWELA yini indoda le egulayo? Ibizo layo nguJobe njalo umama lo ngumfazi wayo. Uyakwazi ukuthi uthini kuJobe? Uthi, ‘Mthuke uNkulunkulu uzifele.’ Ake sibone ukuthi kungani esitsho njalo lokuthi kungani uJobe esebuhlungwini kangaka.
UJobe wayeyindoda ethembekileyo eyayilalela uJehova. Wayehlala elizweni lase-Uzi, eduzane leKhenani. UJehova wayemthanda kakhulu uJobe kodwa kwakulomuntu owayezonda uJobe. Uyamazi yini lowo muntu?
KwakunguSathane uDeveli. Khumbula ukuthi uSathane yingilosi embi ezonda uJehova. Wenelisa ukwenza ukuthi u-Adamu lo-Eva bangalaleli uJehova, ngakho wayesecabanga ukuthi engenza bonke abantu bangalaleli uJehova. Kodwa wenelisa yini ukwenza njalo? Hatshi. Akucabange ngamadoda labafazi abanengi ababethembekile esesifunde ngabo. Ungaqamba abangaki?
UJobe wayethembeke ukudlula abantu bonke kuJehova emhlabeni wonke ngemva kokufa kukaJakhobe loJosefa eGibhithe. UJehova wayefuna ukutshengisa uSathane ukuthi wayengeke enelise ukwenza wonke umuntu abe mubi, ngakho wathi: ‘Khangela uJobe. Uyabona ukuthi uthembeke njani kimi.’
USathane waphikisa esithi, ‘Uthembekile ngoba uyambusisa njalo ulezinto ezinhle ezinengi. Kodwa ungamthathela konke alakho, uzakuthuka.’
Ngakho uJehova wathi: ‘Kulungile. Mthathele. Yenza konke okubi ofuna ukukwenza kuJobe. Sizabona kumbe uzangithuka. Kodwa ungambulali.’
Okwakuqala, uSathane wenza ukuthi abantu bantshontshe inkomo zikaJobe lamakamela akhe njalo lezimvu zakhe zabulawa. Wasebulala amadodana kaJobe angu-10 kanye lamadodakazi ngesivunguzane. USathane wasesenza ukuthi uJobe abe lomkhuhlane obuhlungu. UJobe wahlupheka kakhulu. Yikho okwenza ukuthi umfazi kaJobe atshele uJobe ukuthi: ‘Mthuke uNkulunkulu uzifele.’ Kodwa uJobe akakwenzanga lokho. Abangane bakhe abathathu bamanga labo babuya bamtshela ukuthi ubephila impilo embi. Kodwa uJobe wahlala ethembekile.
Lokhu kwenza uJehova wathokoza kakhulu, njalo ngemva kwalokho wambusisa uJobe, njengoba ubona emfanekisweni. Wamsilisa emkhuhlaneni wakhe. UJobe waba labanye abantwana abangu-10 abahle njalo waba lenkomo ezinengi, izimvu lamakamela. Lokhu kwakukunengi ukudlula ayelakho kuqala.
Uzahlala uthembekile yini kuJehova njengoJobe? Nxa ungenzenjalo, lawe uNkulunkulu uzakubusisa. Uzenelisa ukuhlala kuze kube nini lanini nxa umhlaba wonke usumuhle njengesivande sase-Edeni.