UMosi lo-Aroni Babona uFaro

LAPHO uMosi ebuyela eGibhithe watshela umnewabo u-Aroni ngezimangaliso lezi. UMosi lo-Aroni batshengisa ama-Israyeli izimangaliso lezi, abantu bonke basebekholwa ukuthi uJehova wayelabo.

Ngemva kwalokho, uMosi lo-Aroni bahamba bayabona uFaro. Bamtshela ukuthi: ‘UJehova uNkulunkulu wabantu bako-Israyeli uthi, “Vumela abantu bami bahambe okwamalanga amathathu ukuze bangikhonze enkangala.” ’ Kodwa uFaro waphendula esithi: ‘Mina kangikholwa kuJehova, njalo kangiyikubavumela abako-Israyeli ukuba bahambe.’

UFaro wazonda ngoba abantu babefuna amalanga okuphumula ukuze bayekhonza uNkulunkulu. Ngakho wabenza basebenza nzima kakhulu. Ama-Israyeli asola uMosi ngendlela abasebephathwa ngayo. Lokhu kwamdanisa uMosi. Kodwa uJehova wamtshela ukuthi angakhathazeki. UJehova wathi: ‘Ngizakwenza ukuthi uFaro ayekele abantu bami bahambe.’

UMosi lo-Aroni bahamba ukuyabona uFaro futhi. Kodwa khathesi benza isimangaliso. U-Aroni waphosela induku yakhe phansi, yaba yinkalakatha yenyoka. Amadoda kaFaro ahlakaniphileyo lawo aphosa induku zawo, zantshintsha zaba zinyoka. Kodwa khangela emfanekisweni! Inyoka ka-Aroni idla izinyoka zamadoda ahlakaniphileyo. Lanxa kunjalo, uFaro kazange avumele ama-Israyeli ukuthi ahambe.

Kwafika isikhathi sokuthi uJehova afundise uFaro isifundo. Uyakwazi yini ukuthi wakwenza njani lokhu? Waletha inhlupho ezingu-10 eGibhithe.

Ngemva kwenhlupho ezinengana, uFaro wabiza uMosi wasesithi: ‘Susa uhlupho lolu, ngizawavumela ama-Israyeli ukuthi ahambe.’ Kodwa uFaro wayentshintsha ingqondo yakhe nxa uhlupho selususiwe. Kazange avumele abantu ukuthi bahambe. Ngemva kohlupho lwesi-10 yikho lapho uFaro avumela ama-Israyeli ukuthi ahambe.

Uyazazi yini inhlupho zonke ezingu-10? Vula ikhasi elilandelayo, sifunde ngazo.