Ithente Lokukhonzela

KUYINI okusemfanekisweni lo? Lithente eliqakathekileyo lapho okukhonzelwa khona uJehova. Libizwa langokuthi yithabanikeli. Abantu baqeda ukulakha ngemva komnyaka owodwa besuke eGibhithe. Uyakwazi yini ukuthi ngubani owaqala ngokuthi ithente leli lakhiwe?

NguJehova. UJehova watshela uMosi esesentabeni yeSinayi ukuthi alakhe njani. Wamtshela ukuthi alakhe ngendlela ezenza lahlukaniswe kalula. Lokhu kwakuzakwenza ukuthi nxa lingahlukaniswa, lenelise ukuhanjiswa kwenye indawo beselihlanganiswa futhi. Nxa ayesuka kwenye indawo esiya kwenye, ama-Israyeli ayehamba lethente leli.

Nxa ungakhangela phakathi kwethente leli ekamelweni elincane ekucineni kwalo, uzabona ibhokisi. Libizwa kuthiwa yibhokisi lesivumelwano. Ibhokisi leli lalilezingilosi kumbe amakherubhi enziwe ngegolide, elinye likwelinye icele elinye likwelinye. UNkulunkulu wabhala futhi Imilayo Elitshumi ematsheni amabili ngoba uMosi wayeqamule awakuqala. Amatshe la ayegcinwa ebhokisini lesivumelwano. Kwakugcinwa lembodlela elemana phakathi kwebhokisi leli. Usakhumbula ukuthi imana kuyini?

UJehova ukhetha u-Aroni, umnewabo kaMosi, ukuthi abengumphristi omkhulu. Nguye okhokhela abantu ekukhonzeni uJehova. Amadodana akhe lawo angabaphristi.

Khathesi khangela ikamelo elikhulu lethente leli. Likhulu kulelincane ngokuphindwe kabili. Uyalibona yini ibhokisi eliphuma intuthu? Leli li-alithare lapho abaphristi abatshisela khona okunye okunuka kamnandi okubizwa kuthiwa yimpepha. Khonapho kuloluthi lwesibane olulezibani eziyisikhombisa. Okwesithathu okukulelokamelo litafula. Etafuleni le kugcinelwa izinkwa ezingu-12.

Endlini yokucina yethabanikeli kulenditshi enkulu egcwele amanzi. Abaphristi bagezela kiyo. Okunye okukhona yi-alithare elikhulu. Khonapho kutshiselwa inyamazana ezifileyo ezinikelwa kuJehova. Ithente liphakathi laphakathi kwezihonqo zama-Israyeli njalo amathente abo aligombolozele.