Isela ko-Israyeli

KHANGELA ukuthi indoda le ifihlani ethenteni layo. Ifihla isigqoko esihle, legolide lesiliva. Ikuthethe edolobheni leJerikho. Kodwa izinto ezaziseJerikho kwakumele zenziweni? Usakhumbula yini?

Kwakumele zitshiswe, besekusithi isiliva legolide kuhanjiswe esiphaleni senotho sethabanikeli likaJehova. Abantu laba kabamlalelanga uNkulunkulu. Sebentshontshe izinto zikaNkulunkulu. Indoda le kuthiwa ngu-Akhani njalo labo alabo ngabemuli yakhe. Ake sibone ukuthi kwenzakalani.

U-Akhani esentshontshe izinto lezi, uJoshuwa uthuma abantu ukuthi bayekulwa ledolobho lase-Ayi. Kodwa bayehlulwa empini. Abanye bayabulawa, abanye babaleke. UJoshuwa udane kakhulu. Ulala phansi ubuso bakhe bukhangele phansi, akhuleke kuJehova: ‘Kungani uvumele lokhu ukuthi kwenzakale kithi?’

UJehova uyaphendula: ‘Sukuma! Abako-Israyeli bonile. Bathethe ezinye izinto okade kumele zibhujiswe noma zilethwe ethabanikeli likaJehova. Bantshontshe isigqoko esihle basifihla. Angisoze ngilibusise lize litshise izinto lezi njalo libulale lalowo ozithetheyo.’ UJehova uthi uzamtshengisa uJoshuwa ukuthi indoda embi enze lokhu ingubani.

Yikho-ke, uJoshuwa ubuthanisa abantu bonke ndawonye, uJehova abesekhetha indoda engalunganga u-Akhani. U-Akhani uthi: ‘Ngonile. Ngabona isigqoko esihle, igolide lesiliva. Ngakuhawukela kakhulu ngasengikuthatha. Lizakuthola kugqitshelwe ethenteni lami.’

Lapho izinto lezi zitholwa njalo zilethwa kuJoshuwa, uJoshuwa uthi ku-Akhani: ‘Kungani usilethele uhlupho olungaka? UJehova usezakwehlisela uhlupho!’ Sekwenzakele lokhu, bonke abantu bakhanda u-Akhani lemuli yakhe ngamatshe baze bafe. Lokhu akutshengisi yini ukuthi loba sekutheni akumelanga sithathe izinto ezingayisizo zethu?

Sekwenzakale lokhu, u-Israyeli uyaphuma ayekulwa le-Ayi futhi. Khathesi uJehova uyabancedisa njalo bayanqoba.