AmaGibheyoni Ahlakaniphileyo

AMADOLOBHO amanengi eKhenani alungiselela ukulwa labako-Israyeli. Acabanga ukuthi anganqoba. Kodwa abantu abasedolobheni eliseduze elaseGibheyoni kabacabangi njalo. Bakholwa ukuthi uNkulunkulu uyawancedisa ama-Israyeli, njalo kabafuni ukulwa loNkulunkulu. Yikho-ke uyakwazi ukuthi amaGibheyoni enzani?

Bakhetha ukuthi benze angani bahlala endaweni ekhatshana kakhulu. Yikho-ke amanye amadoda akhona agqoka izigqoko ezidabukileyo lamanyathela agugileyo. Bafaka amasaka adabukileyo phezu kwamadonki abo, bathwale lesinkwa esesiwomile. Besebesiya kuJoshuwa bathi: ‘Sivela elizweni elikhatshana, ngenxa yokuthi sizwe ngoNkulunkulu wenu omkhulu uJehova. Sizwile ngakho konke alenzela khona eGibhithe. Yikho-ke abakhokheli bethu basitshele ukuthi sithwale umphako sibuye kini sithi: “Sizinceku zenu. Sithembiseni ukuthi kalisoze lilwe lathi.” Liyabona ukuthi izigqoko zethu sezidabukile ngenxa yomango omude esiwuhambileyo lokuthi isinkwa sethu sesiwomile.’

UJoshuwa labanye abakhokheli bayawakholwa amaGibheyoni. Yikho-ke benza isivumelwano sokuthi kabasoze balwe labo. Kodwa sekudlule izinsuku ezintathu, bathola ukuthi amaGibheyoni ahlala eduze kakhulu.

UJoshuwa uyababuza: ‘Kungani lisitshele ukuthi livela elizweni elikhatshana?’

AmaGibheyoni ayaphendula: ‘Senze njalo ngoba sizwe ukuthi uNkulunkulu wenu uJehova wathembisa ukulinika ilizwe lonke laseKhenani. Yikho-ke besisesaba ukuthi lizasibulala.’ Kodwa abako-Israyeli bagcina isithembiso sabo njalo kabawabulali amaGibheyoni. Kodwa babenza babeyizisebenzi zabo.

Inkosi yeJerusalema izondile ngenxa yokuthi amaGibheyoni enze isivumelwano sokuthula labako-Israyeli. Yikho-ke ithi kwamanye amakhosi amane: ‘Wozani lizongincedisa ukulwa leGibheyoni.’ Yikho kanye amakhosi la amahlanu akwenzayo. Kwakuyikuhlakanipha yini ukuthi amaGibheyoni enze isivumelwano sokuthula lo-Israyeli, osekubangele ukuthi amakhosi la azokulwa lawo? Sizabona.