URuthe loNawomi

EBHAYIBHILINI uzathola ibhuku elithiwa nguRuthe. Yindaba emayelana lemuli eyaphila ngesikhathi ama-Israyeli esaselabahluleli. URuthe ngowesifazana osakhulayo owaselizweni laseMowabi, kaveli esizweni sikaNkulunkulu u-Israyeli. Kodwa lapho efunda ngoNkulunkulu weqiniso uJehova, wamthanda kakhulu. UNawomi ngowesifazana osekhulile. Nguye owafundisa uRuthe ngoJehova.

UNawomi ngowesifazana ongumIsrayeli. Yena lendoda yakhe lamadodana abo amabili bathuthela elizweni lakoMowabi ngesikhathi kulokudla okulutshwana ko-Israyeli. Ngelinye ilanga indoda kaNawomi yafa. Ngemva kwesikhathi, amadodana kaNawomi atshada lamankazana angamaMowabi okuthiwa nguRuthe lo-Opha. Kodwa ngemva kweminyaka engu-10 amadodana kaNawomi afa. UNawomi lamankazana la amabili bezwa ubuhlungu kakhulu! UNawomi wayesezakwenzani khathesi?

Ngelinye ilanga uNawomi ucabanga ukuthatha uhambo olude ebuyela ebantwini bakibo. URuthe lo-Opha bafuna ukuhlala laye, ngakho bahamba laye. Kodwa sebehambe umango omncane, uNawomi uyatshibilika abesesithi: ‘Buyelani emuva liyehlala labo mama benu.’

UNawomi uyawanga amankazana la, awavalelise. Baqalisa ukukhala ngoba bayamthanda kakhulu uNawomi. Bathi: ‘Hatshi! Sizahamba lawe ebantwini bakini.’ Kodwa uNawomi uthi: ‘Kumele libuyele emuva madodakazi ami. Kungcono ukuthi libuyele kini.’ Ngakho u-Opha uqalisa ukubuyela ngakibo. Kodwa uRuthe yena uyasala.

UNawomi uthi kuye: ‘U-Opha usebuyelile. Lawe phenduka ubuyele laye.’ Kodwa uRuthe uyaphendula: ‘Ungazami ukungenza ukuthi ngikutshiye! Ngekela ngihambe lawe. Lapho oya khona ngizakuya khona, lalapho ozahlala khona ngizahlala khona. Abantu bakini bazakuba ngabakithi, loNkulunkulu wakho uzakuba nguNkulunkulu wami. Lapho ozafela khona ngizafela khona njalo ngizangcwatshelwa khona.’ Lapho uRuthe esitsho njalo, uNawomi kazami futhi ukumenza abuyele ngakibo.

Ekucineni, abesifazana laba ababili bafika e-Israyeli. Bafika bahlale khona. URuthe uhle aqalise ukusebenza emasimini ngoba yisikhathi sokuvuna ibhali. Indoda okuthiwa nguBhowazi iyamvumela ukuthi avune ibhali emasimini ayo. Uyakwazi yini ukuthi wayengubani umama kaBhowazi? WayenguRahabi wedolobheni laseJerikho.

Ngelinye ilanga uBhowazi utshela uRuthe: ‘Sengitsheliwe konke ngawe lomusa owawenzela uNawomi. Ngiyakwazi lokuthi watshiya umama lobaba wakho lelizwe lakini njalo weza ukuzahlala labantu owawungabazi. Sengathi uJehova angakwenzela okuhle!’

URuthe uyaphendula: ‘Ungitshengisa umusa omkhulu nkosi yami. Usungiduduzile ngendlela enhle okhulume ngayo lami.’ UBhowazi uyamthanda kakhulu uRuthe njalo kungakahlali isikhathi eside bayatshada. Lokhu kuyamthokozisa kakhulu uNawomi! Kodwa uNawomi uthokoza kakhulu lapho uRuthe loBhowazi besiba lomntwana wabo wokuqala ongumfana okuthiwa ngu-Obhedi. Ngokuhamba kwesikhathi u-Obhedi uba ngubabamkhulu kaDavida. Sizafunda okunengi ngoDavida emakhasini alandelayo.