INDABA 54
Indoda Elamandla Amakhulu
UYALAZI yini ibizo lendoda eyayilamandla amakhulu eyake yaphila emhlabeni? Ngumahluleli othiwa nguSamsoni. UJehova nguye onika uSamsoni amandla. USamsoni engakazalwa, uJehova utshela umama wakhe ukuthi: ‘Uzakuba lomntwana ongumfana. Nguye ozakhokhela ekukhululeni ama-Israyeli kumaFilisti.’
AmaFilisti angabantu ababi abahlala eKhenani. Balamadoda amanengi alwayo, njalo bazwisa ama-Israyeli ubuhlungu. Ngelinye ilanga uSamsoni esiya kumaFilisti uthutshelwa yisilwane simbhongela. Kodwa uSamsoni uyasibulala isilwane lesi ngezandla zakhe. Ubulala lamaFilisti amanengi amabi.
Ngemva kwesikhathi, uSamsoni uthandana lenye intombi ethiwa nguDelila. Abakhokheli bamaFilisti bathembisa ukupha uDelila amasiliva angu-1 100 nxa engabatshela ukuthi kuyini okwenza uSamsoni abe lamandla angaka. UDelila uyayifuna yonke imali leyo. Kayisuye mngane omuhle kaSamsoni njalo kayisuye mngane omuhle wabantu bakaNkulunkulu. Ubuza uSamsoni kanenginengi ukuthi kuyini okumenza abe lamandla angaka.
USamsoni ucina esemtshela ukuthi kuyini okumenza abe lamandla. Uthi: ‘Inwele zami azikaze zigelwe. Lokhe ngazalwayo, uNkulunkulu wangikhetha ukuthi ngibe yisikhonzi sakhe esiqakathekileyo esibizwa ngokuthi umNaziri. Nxa inwele zami zingagelwa ngingaphelelwa ngamandla ami.’
UDelila uthi esezwile lokhu, abeselalisa uSamsoni enyaweni zakhe. Ubiza enye indoda ukuthi ingene izogela inwele zikaSamsoni. USamsoni uvuka esephelelwe ngamandla akhe. AmaFilisti ayangena abesemthatha. Amkhipha amehlo akhe womabili, abesemenza isigqili sawo.
Ngelinye ilanga amaFilisti enza idili elikhulu ukuze akhonze unkulunkulu wawo uDagoni. Bakhipha uSamsoni ejele ukuze bamhleke. Kodwa ngalesisikhathi, inwele zikaSamsoni sezikhulile futhi. USamsoni utshela umfana omkhokhelayo, ombambe isandla ukuthi: ‘Wothi ngibambelele ezinsikeni ezisekele isakhiwo lesi.’ USamsoni uyakhuleka kuJehova ecela amandla, abesebamba izinsika lezi. Uyamemeza esithi: ‘Kangife lamaFilisti.’ Edilini leli kulamaFilisti angu-3 000. Ngakho uSamsoni ufuqa insika lezi ngamandla akhe wonke, isakhiwo besesisiwa sibulale bonke abantu laba ababi.