UNkulunkulu Ukhetha uDavida

UYAKUBONA yini okwenzakeleyo? Umfana lo uvikele imvu encane. Ibhere kade seliyithethe lifuna ukuyidla. Kodwa umfana lo uligijimisile wasethatha imvu encane ekade isifuna ukudliwa libhere leli. Lathi selifuna ukumhlasela, umfana walitshaya lafa! Wake wavikela futhi eyinye imvu eyayisidliwa yisilwane. Ngumfana olesibindi sibili. Uyamazi yini?

Ibizo lakhe nguDavida. Uhlala edolobheni laseBhethilehema. Ukhulu wakhe kwakungu-Obhedi, umntakaRuthe loBhowazi. Usabakhumbula yini? Ubaba kaDavida nguJese. UDavida walusa izimvu zikababa wakhe. UDavida wazalwa sekudlule iminyaka elitshumi uSawuli ekhethwe nguJehova ukuthi abe yinkosi.

Kufika isikhathi sokuthi uJehova athi kuSamuyeli: ‘Thatha amafutha amahle uye endlini kaJese eBhethilehema. Sengikhethe enye yamadodana akhe ukuthi ibe yinkosi.’ USamuyeli ubona indodana kaJese elizibulo okuthiwa ngu-Eliyabi abesezitshela ukuthi: ‘Lo nguye sibili okhethwe nguJehova.’ Kodwa uJehova umtshela ukuthi: ‘Ungakhangeli ubude bakhe lobuhle bakhe. Angimkhethanga ukuthi abe yinkosi.’

UJese ubiza indodana yakhe u-Abhinadabi ayilethe kuSamuyeli. Kodwa uSamuyeli uthi: ‘Lalo uJehova kamkhethanga.’ UJese ubisa enye indodana yakhe okuthiwa nguShama. USamuyeli uthi: ‘Hatshi, layenalo uJehova kamkhethanga.’ UJese uletha amadodana akhe ayisikhombisa kuSamuyeli kodwa uJehova kawakhethi. USamuyeli uyabuza: ‘Yibo bonke yini abafana?’

UJese uthi: ‘Kulomunye omncane. Kodwa uyekwelusa izimvu.’ UDavida ulethwa kuSamuyeli. USamuyeli uyakubona ukuthi ngumfana omuhle. UJehova uthi: ‘Nguye, mgcobe amafutha.’ USamuyeli uyamgcoba. Kuzafika isikhathi sokuthi uDavida abe yinkosi yama-Israyeli.