UDavida loGoliyathi

AMAFILISTI ayabuya ukuzokulwa lama-Israyeli futhi. Abanewabo bakaDavida abathathu sebelandele uSawuli empini. Ngelinye ilanga uJese uthi kuDavida: ‘Thatha amabele lezinkwa lezi uyenika abanewenu. Hamba uyebona ukuthi banjani.’

UDavida ufika ezihonqweni zempi abesegijimela lapho okulwiwa khona ukuze adinge abanewabo. Iqhawe lamaFilisti uGoliyathi libuya ukuzoyeyisa ama-Israyeli. Lokhu ukwenza ekuseni lantambama okwamalanga angu-40. Uyamemeza esithi: ‘Khethani indoda eyodwa ibuye izokulwa lami. Nxa ingangehlula, ingibulale sizakuba yizigqila zenu. Kodwa nxa ngingayehlula, ngiyibulale lizakuba yizigqila zethu. Ngithi khethani oyedwa azokulwa lami.’

UDavida ubuza amanye amasotsha ukuthi: ‘Indoda ezabulala umFilisti lo, isuse ihlazo leli kuma-Israyeli izatholani?’

Isotsha liphendula lisithi: ‘USawuli uzayinika inotho enengi. Uzayinika lendodakazi yakhe ukuthi ibe ngumfazi wayo.’

Kodwa ama-Israyeli wonke ayamesaba uGoliyathi ngoba mkhulu kakhulu. Mude okwamamitha angabamathathu njalo ulelinye isotsha elimbambele ihawu.

Amanye amasotsha atshela iNkosi uSawuli ukuthi uDavida ufuna ukulwa loGoliyathi. Kodwa uSawuli utshela uDavida ukuthi: ‘Awungeke ulwe lomFilisti lo. Wena umncane njalo yena kade waba lisotsha impilo yakhe yonke.’ UDavida uyaphendula: ‘Ngabulala ibhere lesilwane okwakufuna ukudla izimvu zikababa wami. UmFilisti lo uzakuba njengokunye kwakho. UJehova uzangincedisa.’ Ngakho uSawuli uthi: ‘Hamba ke, uJehova kabe lawe.’

UDavida uhamba emfuleni abesethatha amatshe amahlanu abutshelezi awafake esikhwameni sakhe. Uthatha isavutha sakhe abeselanda iqhawe leli. UGoliyathi uyambona uDavida kodwa uyameyisa. Ucabanga ukuthi kuzakuba lula ukubulala uDavida.

UGoliyathi uthi, ‘Woza lapha, ngizanika izinyoni lezinyamazana inyama yakho ziyidle.’ Kodwa uDavida uthi: ‘Wena ubuya kimi lomkhonto lenkemba, kodwa mina ngibuya kuwe ngebizo likaJehova. Lamuhla uJehova uzakunikela kimi njalo ngizakulahla phansi.’

Ngemva kwalokho, uDavida ugijimela kuGoliyathi. Uthatha ilitshe esikhwameni sakhe abeselifaka esavutheni sakhe ajikijele uGoliyathi ngamandla akhe wonke. Ilitshe litshaya uGoliyathi ekhanda abesewela phansi afe. AmaFilisti ayabaleka wonke lapho ebona ukuthi iqhawe lawo selifile. Ama-Israyeli ayabagijimisa abesenqoba impi le.