USolomoni, Inkosi Ehlakaniphileyo

USOLOMONI uba yinkosi esesemncane. Uyamthanda uJehova njalo ulandela ukulaya okuhle akuphiwa ngubaba wakhe uDavida. UJehova uyathokoza ngoSolomoni ngakho ngelinye ilanga ebusuku uthi kuye ephutsheni: ‘Ufuna ngikupheni Solomoni?’

Ngakho uSolomoni uyaphendula: ‘Jehova Nkulunkulu wami, ngisesemncane njalo kangikwazi ukubusa. Ngakho ngicela unginike inhlakanipho ukuze ngenelise ukubusa abantu bakho kuhle.’

UJehova uyathokoza ngalokho uSolomoni akucelayo. Ngakho uthi: ‘Ngenxa yokuthi ucele inhlakanipho hatshi impilo ende loba inotho, ngizakunika inhlakanipho edlula ekanoma ngubani owake waphila. Kodwa ngizakunika longakucelanga, inotho lodumo.’

Ngemva kwesikhatshana, kufika abesifazana ababili bezombona ngohlupho olunzima abalalo. Omunye wabo uyachasisa: ‘Umama lo sihlala sonke, ngabeletha umntwana ongumfana laye wasebeletha umntwana ongumfana. Ngelinye ilanga ebusuku, umntanakhe wafa. Wasethatha umntanakhe ofileyo wamfaka eceleni kwami ngilele, wasethatha owami umntwana. Ngathi ngivuka ngikhangela umntwana ofileyo ngabona ukuthi kasuye owami.’

Esezwe lokhu umama lo omunye uthi: ‘Hatshi! Umntwana ophilayo ngowami, lo ofileyo ngowakhe!’ Umfazi wakuqala uphendula athi: ‘Hatshi! Umntwana ofileyo ngowakho, lo ophilayo ngowami!’ Yiyo indlela abaphikisana ngayo. USolomoni uzakwenzani?

Uthi kakulethwe inkemba, njalo lapho isilethiwe uthi: ‘Qumani umntwana ophilayo phakathi laphakathi, liphe omunye umama ingxenye lomunye laye limnike enye ingxenye.’

Umama onguye umnikazi womntwana uthi: ‘Hatshi! Lingambulali umntwana. Kungcono linike yena umntwana!’ Kodwa omunye umama uthi: ‘Kakho phakathi kwethu okumele amzuze umntwana, mqumeni phakathi.’

Ekucineni uSolomoni uthi: ‘Lingambulali umntwana! Mupheni umama wakuqala. Nguye umama womntwana.’ USolomoni uyakwazi lokhu ngoba umama womntwana oweqiniso umthanda okokuthi uzimisele ukuthi aphiwe umama lo omunye ukuze angabulawa. Lapho abantu besizwa ukuthi uSolomoni uyixazulule njani indaba le, bayathokoza ngokuba lenkosi elenhlakanipho enjalo.

Ngesikhathi uSolomoni ebusa, uNkulunkulu uyababusisa abantu ngokwenza ukuthi umhlabathi umile ingqoloyi enengi lebhali, umkhiwa, amagilebisi lokunye ukudla. Abantu bagqoka izigqoko ezinhle njalo bahlala ezindlini ezinhle. Kulezinto ezinhle ezenela abantu bonke.