UMbuso Uyehlukana

UYAKWAZI yini ukuthi kungani indoda le idabula isigqoko sayo sibe yiziqa? UJehova nguye omtshele ukuthi enze njalo. Indoda le ingumphrofethi kaNkulunkulu u-Ahija. Uyakwazi ukuthi umphrofethi uyini? Ngumuntu otshelwa nguNkulunkulu kusalesikhathi okuzakwenzakala.

U-Ahija lapha ukhuluma loJerobhowami. UJerobhowami yindoda uSolomoni ayibeka ukuthi ikhokhele kweminye imisebenzi yakhe yokwakha. Lapho u-Ahija ehlangana loJerobhowami emgwaqweni, wenza into eyisimanga. Ukhipha isigqoko esitsha asigqokileyo asidabule sibe yiziqa ezingu-12. Uthi kuJerobhowami: ‘Thatha iziqa ezilitshumi.’ Uyakwazi yini ukuthi kungani u-Ahija enika uJerobhowami iziqa ezilitshumi?

U-Ahija uyachasisa ukuthi uJehova uzathathela uSolomoni umbuso. Uthi uJehova uzanika uJerobhowami izizwana ezilitshumi. Lokhu kutsho ukuthi kuzasala izizwana ezimbili kuphela zokuthi indodana kaSolomoni uRehobhowami izibuse.

Lapho uSolomoni esizwa ukuthi u-Ahija utsheleni uJerobhowami, uyazonda kakhulu. Uzama ukubulala uJerobhowami. Kodwa uJerobhowami uyabaleka aye eGibhithe. Ngemva kwesikhathi uSolomoni uyafa. Waba yinkosi okweminyaka engu-​40, kodwa khathesi indodana yakhe uRehobhowami ubekwa abe yinkosi. EseGibhithe, uJerobhowami uyezwa ukuthi uSolomoni sefile, yikho-ke, uyabuyela ko-Israyeli.

URehobhowami kayisiyo nkosi elungileyo. Ubaphatha kubi kakhulu abantu ukwedlula uyise uSolomoni. UJerobhowami lamanye amadoda aqakathekileyo aya eNkosini uRehobhowami amcele ukuthi aphathe kuhle abantu. Kodwa uRehobhowami kabalaleli. Usuka abaphathe kubi kakhulu abantu, okwedlula okwakuqala. Yikho-ke, abantu babeka uJerobhowami abe yinkosi yezizwana ezilitshumi, kodwa izizwana zakoBhenjamini loJuda zigcina uRehobhowami eyinkosi yazo.

UJerobhowami kafuni ukuthi abantu baye eJerusalema ukuthi bayekhonza ethempelini likaJehova. Yikho-ke wenza amathole amabili awegolide abesesenza ukuthi abantu bombuso wezizwana ezilitshumi bawakhonze. Ngesikhatshana, ilizwe ligcwala ubugebenga lodlakela.

Lasembusweni wezizwana ezimbili kulohlupho. Kungakafiki iminyaka emihlanu uRehobhowami ebusa njengenkosi, inkosi yeGibhithe ibuya ukuzokulwa leJerusalema. Ithatha izinto ezinengi ezidulayo ethempelini likaJehova. Yikho-ke, ithempeli lihlala isikhatshana linjengoba lalinjalo ngesikhathi lisakhiwa.