Inkazana Inceda Indoda Ehloniphekayo

UYAKWAZI yini ukuthi inkazana le encane ithini? Itshela umfazi lo ngomphrofethi kaJehova u-Elisha lezinto ezinhle uJehova enza ukuthi umphrofethi wakhe azenze. Umfazi lo kamazi uJehova ngoba kayisuye umIsrayeli. Ake sibone ukuthi kungani inkazana le isendlini yomfazilo.

Umfazi lo ngumAsiriya. Indoda yakhe nguNamani, umlawuli webutho lase-Asiriya. Ama-Asiriya ayethumbe inkazana le engumIsrayeli njalo yalethwa kumfazi kaNamani ukuze ibe yinceku yakhe.

UNamani ulomkhuhlane omubi okuthiwa yibulephero. Umkhuhlane lo ungenza ukuthi inyama yomuntu ikhithike. Ngakho nanku inkazana le ekutshela umfazi kaNamani: ‘Ngifisa ukuthi ngabe inkosi yami iyahamba iyebona umphrofethi kaJehova e-Israyeli. Angayelapha ubulephero bayo.’ Lokhu kwatshelwa indoda yomfazilo.

UNamani uyafuna kakhulu ukwelatshwa; ngakho uya ko-Israyeli. Lapho efika uya endlini ka-Elisha. U-Elisha uthuma inceku yakhe ukuthi iyetshela uNamani ukuthi ayegeza eMfuleni uJodani kasikhombisa. Lokhu kwenza uNamani azonde kakhulu, uthi: ‘Imifula yakithi ingcono kakhulu kulemifula yako-Israyeli!’ Esetsho lokhu usuka ahambe.

Kodwa izinceku zakhe zithi kuye: ‘Alubana u-Elisha ubekutshele ukuthi wenze into enkulu, ubungayiyenza. Manje kungani ungayigeza njengoba ekutshelile?’ UNamani uyazilalela izinceku zakhe njalo uhamba ayogeza kasikhombisa eMfuleni uJodani. Lapho esenzenjalo, inyama yakhe iyaqina njalo ihlambuluke!

UNamani uyathokoza kakhulu. Ubuyela ku-Elisha abesesithi kuye: ‘Khathesi sengikwazi ukuthi uNkulunkulu ose-Israyeli nguye yedwa uNkulunkulu weqiniso emhlabeni wonke. Ngakho ngicela uthathe isipho lesi.’ Kodwa u-Elisha umphendula athi: ‘Hatshi, kangisoze ngisithathe.’ U-Elisha uyakwazi ukuthi kubi ukuthi athathe isipho lesi ngoba uJehova nguye owelaphe uNamani. Kodwa inceku ka-Elisha uGehazi iyasifuna isipho lesi.

Ngakho nanku uGehazi akwenzayo. UNamani esehambile, uGehazi uyagijima aze amthole. Ufika athi: ‘U-Elisha ungithume ukuthi ngikutshele ukuthi ufuna esinye isipho okade umthembise sona ukuze aphe abangane bakhe abasanda kufika bezovakatsha.’ Lokhu kungamanga. Kodwa uNamani kakwazi ukuthi uGehazi ukhuluma amanga ngakho uyamnika ezinye izinto.

Lapho uGehazi ebuyela ngekhaya, u-Elisha uyakwazi ukuthi wenzeni. uJehova umtshelile. Ngakho uthi: ‘Ngenxa yokuthi wenze into le embi, ubulephero bukaNamani buzanamathela kuwe.’ Njalo lokho kuyenzakala khonapho khonapho!

Sifundani kukho konke lokhu? Okwakuqala, kumele sibe njengenkazana encane, sikhulume ngoJehova ngoba kunganceda abanye. Okwesibili, kakumelanga sizigqaje njengokwenziwa nguNamani ekuqaliseni, kodwa kumele silalele izinceku zikaNkulunkulu. Okwesithathu, akumelanga siqambe amanga njengoGehazi. Kasifundi okunengi yini ngokubala iBhayibhili?