UNkulunkulu Unceda INkosi uHezekhiya

UYAKWAZI yini ukuthi kungani indoda le ikhuleka kuJehova? Kungani ifake izincwadi lezi phambi kwe-alithare likaJehova. Indoda le nguHezekhiya. Uyinkosi yezizwana ezimbili zako-Israyeli zaseningizimu njalo usengozini enkulu. Kungani?

Ngoba amabutho ase-Asiriya asebhidlize izizwana ezilitshumi zasenyakatho. UJehova wekela lokhu kwenzakala ngoba abantu labo babesenza okubi. Khathesi amabutho la awase-Asiriya asezokulwa lombuso wezizwana ezimbili.

Inkosi yase-Asiriya isanda kuthumeza izincwadi eNkosini uHezekhiya. Lezi yizo izincwadi uHezekhiya azifake lapha phambi kukaNkulunkulu. Incwadi lezi zeyisa uJehova njalo zitshela uHezekhiya ukuthi angaziyengi ngokuthi alwe lama-Asiriya. Lokhu yikho okwenza uHezekhiya akhuleke athi: ‘O Jehova, sikhulule esandleni senkosi yase-Asiriya ukuze imibuso yonke yazi ukuthi nguwe wedwa uNkulunkulu.’ UJehova uzamlalela yini uHezekhiya?

UHezekhiya uyinkosi enhle. Kafanani lamakhosi amabi ombuso wezizwana ezilitshumi zama-Israyeli, njalo kafanani lobaba wakhe u-Ahazi owayesenza okubi. UHezekhiya wayelalela yonke imithetho kaJehova. Ngakho lapho uHezekhiya eqeda ukukhuleka, umprofethi u-Isaya umthumezela umlayezo lo ovela kuJehova: ‘Inkosi yase-Asiriya kayisoze ibuye eJerusalema. Akula sotsha lakhe elizasondela eJerusalema. Ngeke baze batshoke ngitsho lomtshoko owodwa edolobheni.’

Khangela umfanekiso osekhasini leli. Uyawazi yini wonke amasotsha la afileyo? Ngama-Asiriya. UJehova wathuma ingilosi yakhe yabulala amasotsha ama-Asiriya angu-185 000 ngobusuku obubodwa. Ngakho inkosi yase-Asiriya kayisalwanga leJerusalema kodwa yabuyela kibo.

Umbuso wezizwana ezimbili uyasinda, njalo abantu baba lokuthula okwesikhatshana. Kodwa uHezekhiya esefile, indodana yakhe uManase yiyo eba yinkosi. UManase lendodana yakhe u-Amoni ebusa ngemva kwakhe, bonke bangamakhosi amabi. Ngakho ilizwe liphinda libe lobugebenga lodlakela. Lapho iNkosi u-Amoni ibulawa yizinceku zayo, indodana yayo uJosiya ubekwa ukuthi abe yinkosi yombuso wezizwana ezimbili.