INkosi yama-Israyeli Yokucina Elungileyo

UJOSIYA uqalisa ukubusa izizwana ezimbili zaseningizimu zama-Israyeli eleminyaka engu-8. Inkosi eleminyaka engu-8 iyabe incane kakhulu. Ngakho, ekuqaliseni abadala bayamncedisa ukuthi abuse isizwe.

UJosiya ubusa okweminyaka eyisikhombisa abeseqalisa ukudinga uJehova. Ulingisela amakhosi amahle anjengoDavida, uJehoshafathi loHezekhiya. UJosiya wenza into etshengisa ukuthi ulesibindi emncane enjalo.

Ama-Israyeli abesenza izinto ezimbi kakhulu okwesikhathi eside. Akhonza onkulunkulu bamanga. Akhothamela izithombe. Yikho uJosiya ehamba lamadoda akhe abeseqalisa ukukhipha ukukhonza kwamanga elizweni. Lo ngumsebenzi onzima ngoba abantu abanengi bakhonza onkulunkulu bamanga. Uyambona yini uJosiya lamadoda akhe bebulala izithombe?

Ngemva kwalokho, uJosiya unika amadoda amathathu umsebenzi wokukhangela ukulungiswa kwethempeli likaJehova. Imali evela ebantwini inikwa amadoda la ukuze abhadalele umsebenzi ozakwenziwa. Baqalisa ukusebenza ethempelini. Kodwa umphristi omkhulu uHilikhiya uthola into eqakatheke kakhulu khonapho. Libhuku lomthetho uJehova athi uMosi alibhale kudaladala. Lalilahlekile okweminyaka eminengi.

Ibhuku leli linikwa uJosiya, abesecela ukuthi bambalele. UJosiya uyalalela abesebona ukuthi abantu bebengalandeli umthetho kaJehova. Lokhu kuyamdanisa kakhulu. Ngakho udabula akugqokileyo, njengoba umbona emfanekisweni. Uthi: ‘UNkulunkulu usizondele, ngoba okhokho bethu abalandelanga imithetho esebhukwini leli.’

UJosiya utshela umphristi omkhulu uHilikhiya ukuthi abuze ukuthi uJehova uzabenzani. UHilikhiya uhamba ayebuza umfazi okuthiwa nguHulida ongumphrofethikazi. UHulida umtshela ukuthi ayetshela uJosiya umbiko lo ovela kuJehova: ‘IJerusalema labantu bonke kuzajeziswa ngoba abantu bakhonze onkulunkulu bamanga njalo ilizwe ligcwele izinto ezimbi. Kodwa wena Josiya wenze okuhle, ngakho isijeziso lesi sizafika wena usufile.’