INDABA 78
UMbhalo Emdulini
KUYINI okwenzakalayo lapha? Abantu basedilini elikhulu. Inkosi yaseBhabhiloni imeme abantu abangu-1 000 abaqakathekileyo. Basebenzisa amankomitsho egolide kanye lemiganu yesiliva okwathathwa ethempelini likaJehova eJerusalema. Kodwa besalibele, kuthutsha isandla sendoda emoyeni besesibhala emdulini. Wonke umuntu uqalisa ukwesaba.
UBhelishazari umzukulu kaNebhukhadinezari nguye oseyinkosi khathesi. Uyamemeza esithi kakubizwe amadoda ahlakaniphileyo. Uthi: ‘Loba ngubani ongabala umbhalo lo, angitshele ukuthi utshoni uzanikwa izipho ezinengi abesephiwa isikhundla sesithathu sokuba ngumbusi omkhulu kulelilizwe.’ Kodwa amadoda ahlakaniphileyo ayehluleka ukubala okubhalwe emdulini kumbe ukukhuluma ukuthi kutshoni.
Umama wenkosi uzwa umsindo abesengena endlini enkulu lapho okuledili khona. Utshela inkosi ukuthi: ‘Ungesabi. Embusweni wakho kulendoda eyazi onkulunkulu abangcwele. Ukhulu wakho uNebhukhadinezari eseseyinkosi wenza indoda le yaba yinduna yamadoda ayo wonke ahlakaniphileyo. Ibizo layo nguDanyeli. Wothi abizwe, uzakutshela ukuthi okubhaliweyo kutshoni.’
UDanyeli uyabizwa masinyane. UDanyeli uyala ukuphiwa izipho, abesetshela uBhelishazari ukuthi kungani uJehova wakhipha ukhulu wakhe uNebhukhadinezari ekubeni yinkosi. UDanyeli uthi: ‘UNebhukhadinezari wayezikhukhumeza njalo uJehova wamjezisa.’
UDanyeli utshela uBhelishazari ukuthi: ‘Wena uyakwazi konke okwenzakala kuye kodwa lawe uyazikhukhumeza njengoNebhukhadinezari. Uthethe amankomitsho lemiganu ethempelini likaJehova wakusebenzisa. Udumise onkulunkulu bezigodo labamatshe njalo awumhloniphanga uMdali oMkhulu. Yikho uNkulunkulu ethume isandla ukuthi sibhale amazwi la.’
UDanyeli uthi: ‘Kubhalwe ukuthi, MENE, MENE, THEKHELI, PHARISINI.’
‘UMENE utsho ukuthi uNkulunkulu usezibalile izinsuku zokubusa kwakho, usekuqedile. UTHEKHELI utsho ukuthi usulinganisiwe esikalini kwatholakala ukuthi ulula. UPHARISINI utsho ukuthi umbuso wakho usuphiwe amaMede lamaPhesiya.’
UDanyeli uthi esakhuluma, amaMede lamaPhesiya ahle aqalise ukuhlasela iBhabhiloni. Bayalithatha idolobho besebebulala uBhelishazari. Okubhalwe emdulini kuhle kwenzakale ngalobobusuku! Kodwa kuzakwenzakalani kuma-Israyeli khathesi? Sizabona, kodwa ake siqale sifunde ukuthi kwenzakalani kuDanyeli.