UJesu Uzalelwa Esitebeleni

UYAKWAZI yini ukuthi umntwana lo ngubani? Ye, nguJesu. Usanda kuzalwa esitebeleni lesi. Isitebele yindawo yokugcinela izinyamazana. UMariya ubeke uJesu emkolweni, okuyindawo lapho okudlela khona amadonki lezinye izinyamazana. Kodwa kungani uMariya loJosefa belapha lezinyamazana lezi? Kambe yona le yindawo yokuthi kuzalelwe umntwana?

Hatshi kakusiyo. Kodwa nansi isizathu sokuthi kungani belapha: Umbusi weRoma, uKhesari Agastu wenze umthetho othi wonke umuntu kumele abuyele edolobheni lapho azalelwa khona ukuze ibizo lakhe libhalwe ebhukwini. UJosefa wazalelwa eBhethilehema. Kodwa wathi esefikile loMariya, kwakungasela ndawo yokuthi bahlale. Yikho bebuye lapha okulezinyamazana khona. Ngalelo langa uMariya uzala uJesu! Njengoba ubona,uJesu uziphilele.

Uyababona yini abelusi bezobona uJesu? Bebesegangeni belinde izimvu zabo kwasekuvela ukukhanya okukhulu kibo. Ukukhanya lokhu yingilosi! Abelusi bayesaba kakhulu. Kodwa ingilosi ithi kubo: ‘Lingesabi! Ngililethele izindaba ezimnandi. Lamuhla, eBhethilehema, uKhristu iNkosi uzelwe. Uzasindisa abantu! Lizamthola egoqelwe ngamalembu elele emkolweni.’ Ngemva kwalokhu kuvela izingilosi ezinengi ziqalise ukudumisa uNkulunkulu. Yikho-ke, abelusi laba bahamba ngokuphangisa bayedinga uJesu, khathesi sebemtholile.

Uyakwazi yini ukuthi kungani uJesu eqakatheke kangaka? Uyakwazi ukuthi ungubani sibili? Khumbula ukuthi endabeni yokuqala ebhukwini leli sifunde ngeNdodana kaNkulunkulu yokuqala. INdodana le yasebenza loJehova ekudaleni amazulu lomhlaba lakho konke okunye. Nguye ke uJesu lo!

Ye, uJehova wathatha ukuphila kweNdodana yakhe wakususa ezulwini wakufaka phakathi kukaMariya. Ngokuphangisa kwaqalisa ukukhula umntwana phakathi kwakhe njengoba nje bonke abantwana bekhula phakathi kwabonina. Kodwa umntwana lo yiNdodana kaNkulunkulu. Ekucineni uJesu wazalelwa lapha esitebeleni eBhethilehema. Uyabona yini ukuthi kungani izingilosi zathabela ukutshela abantu ukuthi uJesu usezelwe?