INDABA 86
Amadoda Akhokhelwa Yinkanyezi
UYAYIBONA yini inkanyezi leyana ekhanyayo ekhonjelwe ngomunye wamadoda la? Inkanyezi le iqalise ukubonakala lapho esuka eJerusalema. Amadoda la avela eMpumalanga njalo ayizazi zezinkanyezi. Akholwa ukuthi inkanyezi le entsha ibayisa emuntwini oqakathekileyo.
Lapho amadoda la efika eJerusalema ayabuza: ‘Ungaphi umntwana ozakuba yinkosi yamaJuda?’ Ama-Israyeli ayebizwa langokuthi “ngamaJuda.” Amadoda la athi: ‘Siqalise ukubona inkanyezi yomntwana ngesikhathi siseseMpumalanga njalo silande ukuzomkhonza.’
Lapho uHerodi, oyinkosi yaseJerusalema ekuzwa lokhu wazonda kakhulu. Wayengafuni ukuthi enye inkosi ithathe isikhundla sakhe. Ngakho wabiza bonke abaphristi wasebabuza: ‘Inkosi ethenjisiweyo izazalelwa ngaphi?’ Bamphendula bathi: ‘IBhayibhili lithi eBhethilehema.’
Ngakho uHerodi wabiza amadoda ayevela eMpumalanga wathi: ‘Hambani liyomdingisisa umntwana. Lingitshele lingamthola. Lami ngifuna ukuhamba ngiyemkhonza.’ Kodwa uHerodi wayefuna ukumbona umntwana ukuze ambulale!
Yikho-ke inkanyezi ihamba phambi kwamadoda la iqonda eBhethilehema, njalo ima phezu kwalapho umntwana ayekhona. Lapho amadoda la engena endlini, athola uMariya loJesu omncinyane. Akhipha izipho abesenika uJesu. Kodwa uJehova uxwayisa amadoda la ephutsheni ukuthi angabuyeli kuHerodi. Ngakho abuyela elizweni lakibo ngenye indlela.
UHerodi uzonda kakhulu lapho esizwa ukuthi amadoda eMpumalanga asebuyelile elizweni lawo. Ngakho upha umlayo wokuthi kubulawe abantwana bonke abangabafana abaseBhethilehema abaleminyaka emibili kusehla. Kodwa uJehova uxwayisa uJosefa kusaselesikhathi ngephupho ukuthi aye eGibhithe lemuli yakhe. Ngemva kwesikhathi, lapho uJosefa esizwa ukuthi uHerodi ufile, uthatha uMariya loJesu babuyele kibo eNazaretha. Kulapho uJesu akhulela khona.
Ucabanga ukuthi ngubani owenza inkanyezi yabonakala? Khumbula ukuthi amadoda aseMpumalanga aqalisa aya eJerusalema esebone inkanyezi. USathane uDeveli wayefuna ukubulala iNdodana kaNkulunkulu njalo wayesazi ukuthi iNkosi yaseJerusalema uHerodi yayizazama ukuyibulala. Yikho-ke kumele ukuthi uSathane nguye owenza inkanyezi leyo yabonakala.