UJesu Omncane Ethempelini

KHANGELA umfana lo omncane okhuluma lamadoda amadala. Bangabafundisi ethempelini likaNkulunkulu eJerusalema. Umfana lo nguJesu. Usekhulakhulile. Khathesi uleminyaka engu-⁠12.

Abafundisi laba bamangele kakhulu ukuthi uJesu wazi izinto ezinengi kangaka ngoNkulunkulu lezinto ezibhalwe eBhayibhilini. Kodwa kungani uJosefa loMariya bengekho lapha? Bangaphi? Ake sibone.

UJosefa ubuya lemuli yakhe eJerusalema minyaka yonke. Bayabe besiza emkhosini oqakathekileyo okuthiwa yiPhasika. Kungumango omude ukusuka eNazaretha usiya eJerusalema. Akulamuntu olemota njalo akula zitimela. Babengelazo ngalesosikhathi. Abantu abanengi bahamba ngenyawo njalo kubathatha amalanga amathathu ukuze bafike eJerusalema.

Khathesi uJosefa uselemuli enkulu. Ngakho kulabanawakhe bakaJesu abangabafana lamankazana okumele babakhangele. Lonyaka, uJosefa loMariya basuke labantwana babo sebebuyela eNazaretha. Bacabanga ukuthi uJesu laye ukhona. Kodwa lapho besima ilanga selitshonile, babona ukuthi uJesu kakho. Bamdinga ezihlotsheni lasebanganini babo kodwa kabamtholi! Ngakho babuyela eJerusalema bayemdinga khona.

Ekucineni bamthola elabafundisi. Ubalalele njalo ubabuza imibuzo. Bonke abantu bamangaliswa yindlela uJesu ahlakaniphe ngayo. Kodwa uMariya uthi: ‘Mntwana, kungani wenze lokhu kithi? Mina lobaba wakho besikhathazeke kakhulu ngawe sizama ukukuthola.’

UJesu uyaphendula: ‘Belingidingelani? Belingakwazi yini ukuthi bekumele ngibe sendlini kaBaba?’

Yebo, uJesu uthanda ukuba lapho angafunda khona ngoNkulunkulu. Kakumelanga lathi sizizwe ngaleyo ndlela yini? Kibo eNazaretha, uJesu wayehamba maviki onke emihlanganweni esiyakhonza. Wafunda okunengi eBhayibhilini ngenxa yokuthi wayelalelisisa zikhathi zonke. Lathi kumele sibe njengoJesu njalo silandele isibonelo sakhe.