UJesu Uhlanza Ithempeli

UJESU ukhanya uzonde kakhulu sibili. Uyakwazi yini ukuthi uzondeleni? Uzondele amadoda asethempelini likaNkulunkulu eJerusalema alobuhwaba. Azama ukuthola imali enengi ebantwini ababuye lapha ukuzokhonza uNkulunkulu.

Uyazibona yini inkomo ezincane lezimvu lamajuba? Amadoda la athengisa izinyamazana lezi khonapha ethempelini. Uyakwazi yini ukuthi kungani besenzanjalo? Kungenxa yokuthi ama-Israyeli afuna izinyamazana lenyoni ukuze akunikele kuNkulunkulu.

Umthetho kaNkulunkulu wawusithi nxa umIsrayeli ewonile kumele anikele umhlatshelo kuNkulunkulu. Ngezinye izikhathi ama-Israyeli ayenikela imihlatshelo. Kodwa umIsrayeli wayengazithatha ngaphi inyoni lezinyamazana zokuyanikela kuNkulunkulu?

Amanye ama-Israyeli ayelenyoni lezinyamazana. Ayenganikela ngalokhu. Kodwa ama-Israyeli amanengi ayengela zinyamazana kumbe inyoni. Abanye babehlala khatshana kakhulu leJerusalema, ngakho babengeke benelise ukubuya lezinyamazana zabo ethempelini. Abantu babebuya ethempelini besebethenga izinyamazana lenyoni ababezifuna. Kodwa amadoda la ayethengisela abantu ngemali enkulu kakhulu. Ayeqila abantu. Ngaphandle kwalokho, kwakungamelanga athengisele khonapha ethempelini likaNkulunkulu.

Lokhu yikho okuzondisa uJesu kakhulu. Ngakho uwisa amatafula alemali awamadoda la, amasiliva abo abesechithekela yonke indawo. Wenza umchilo ngentambo abesesusa zonke izinyamazana ethempelini. Utshela amadoda athengisa amajuba: ‘Akhupheni lapha! Yekelani ukwenza indlu kababa indawo yokuthola imali enengi.’

Abanye abalandeli bakaJesu balaye lapha ethempelini eJerusalema. Okwenziwa nguJesu kuyabamangalisa. Basuka bakhumbule amazwi aseBhayibhilini aphathelane leNdodana kaNkulunkulu, athi: ‘Ukuthanda indlu kaNkulunkulu kuzamtshisa ngaphakathi njengomlilo.’

UJesu wenza izimangaliso ezinengi eseJerusalema edilini lePhasika. Ngemva kwalokho uJesu uya eJudiya abesebuyela futhi eGalile. Kodwa ekuhambeni kwakhe udlula esigabeni seSamariya. Ake sibone ukuthi kwenzakalani khonale.