UJesu Uvusa Abantu Abafileyo

INKAZANA oyibona lapha ileminyaka engu-12. UJesu ubambe isandla sayo, njalo umama wayo lobaba wayo baseduze khonapho. Uyakwazi ukuthi kungani bethabe kangaka? Ake sibone.

Ubaba wenkazana le uyindoda eqakathekileyo okuthiwa nguJayirosi. Ngelinye ilanga umntanayo uyagula njalo uyalaliswa embhedeni. Kodwa kabi ngcono, ugula kakhulu. UJayirosi lomfazi wakhe bakhathazeke kakhulu ngoba kukhanya angani umntanabo uzakufa. Nguye yedwa umntanabo oyinkazana. Ngakho uJayirosi udinga uJesu. Usezwile ngezimangaliso ezenziwa nguJesu.

UJayirosi uthola uJesu elabantu abanengi. Kodwa uJayirosi uyamlanda abesezilahlela enyaweni zakhe. Uthi: ‘Indodakazi yami iyagula kakhulu.’ Abesencenga esithi: ‘Ngiyacela, buya uzoyisilisa.’ UJesu umtshela ukuthi uzabuya.

Njengoba besuka, abantu abanengi bayafuqana ukuze basondele kuJesu. UJesu uyama abesebuza: ‘Ngubani ongithintileyo?’ UJesu uzwe amandla ephuma kuye yikho uyakwazi ukuthi kulomuntu omthintileyo. Kodwa ngubani? Ngumfazi osegule kakhulu okweminyaka engu-12. Wayebuye wathinta izigqoko zikaJesu wasesiliswa!

Lokhu kuyamduduza uJayirosi ngoba uyakubona ukuthi kulula kangakanani ukuthi uJesu asilise umuntu. Kodwa kufika isithunywa. Sitshela uJayirosi ukuthi: ‘Ungasahluphani loJesu. Umntanakho sefile.’ UJesu uyakuzwa lokhu abesetshela uJayirosi ukuthi: ‘Ungabi lendaba, uzaphiliswa.’

Bafika endlini kaJayirosi besebethola abantu bekhala kabuhlungu. Kodwa uJesu uthi: ‘Lingakhali. Umntwana kafanga. Uzilalele nje.’ Kodwa bayamhleka uJesu ngoba bayakwazi ukuthi ufile.

UJesu uthatha ubaba wenkazana le lomama wayo labaphostoli bakhe abathathu besebengena endlini lapho okulele khona umntwana. Umbamba isandla abesesithi: ‘Vuka!’ Umntwana lo uyavuka njengoba umbona lapha. Uyavuka abeseqalisa ukuhambahamba! Yikho umama wakhe lobaba wakhe bethabe kangaka.

Umntwana lo kayisuye yedwa umuntu uJesu amvusa kwabafileyo. IBhayibhili lisitshela ukuthi owakuqala amvusayo ngumntwana ongumfana womfelokazi ohlala edolobheni laseNayini. Ngemva kwesikhathi, uJesu uvusa uLazaru kwabafileyo. Lo ngumnewabo kaMariya loMatha. Nxa uJesu esebusa njengenkosi kaNkulunkulu uzavusa abantu abafileyo abanengi kakhulu. Akusithabisi yini lokhu?