UJesu Unika Abantu Abanengi Ukudla

KWENZAKALE into embi kakhulu. UJohane uMbhaphathizi usanda kubulawa. UHerodiyasi umfazi wenkosi wayengamthandi. Wenza ukuthi inkosi iqume ikhanda likaJohane.

UJesu uyakuzwa lokhu, abesedana kakhulu. Uya lapho okungelabantu. Kodwa abantu bayamlandela. UJesu ubona abantu laba abanengi abesebazwela usizi. Yikho ubatshela ngombuso kaNkulunkulu abesesilisa abagulayo.

Ngalobobusuku abafundi bakhe bazakuye besebesithi: ‘Sekusebusuku, njalo indawo le yindawo engelabantu. Wothi abantu bahambe bayezithengela ukudla emizini eseduze.’

UJesu uyaphendula: ‘Kakudingeki ukuthi bahambe. Bapheni lina ukudla.’ UJesu ubuza uFiliphi: ‘Singakuthenga ngaphi ukudla okungenela abantu bonke laba?’

UFiliphi uyaphendula: ‘Kuzafuna imali enengi ukuthenga ukudla okwenela ukuthi wonke umuntu athole ucezwana.’ U-Andreya uthi: ‘Nangu umfana olezinkwa ezinhlanu lezinhlanzi ezimbili. Kodwa lokhu akusoze kwenele abantu bonke laba.’

UJesu uthi: ‘Tshelani abantu bahlale phansi etshanini.’ Ubonga uNkulunkulu ngokudla kwabo abesekuhlephuna ukuze kwenele. Abafundi bapha abantu bonke isinkwa lenhlanzi. Kulamadoda angu-5 000 labafazi abanengi labantwana. Bayadla bonke baze basuthe nti. Abafundi babutha okuseleyo besekugcwala amabhasikiti angu-12!

UJesu uthatha abafundi bakhe besebegada isikepe ukuze baye ngale koLwandle lwaseGalile. Ebusuku kuvunguza umoya omkhulu. Amagagasi olwandle aphosa isikepe ngapha langapha. Abafundi bayesaba kakhulu. Phakathi kobusuku, babona umuntu esiza kubo ehamba phezu kwamanzi. Bayesaba kakhulu besebekhala ngoba abakwazi ukuthi yikuyini abakubonayo.

UJesu uthi: ‘Lingesabi. Yimi!’ Abakukholwa. Ngakho uPhethro uthi: ‘Nkosi uma kunguwe, tshono ukuba ngize kuwe phezu kwamanzi.’ UJesu uthi: ‘Woza!’ UPhethro uyaphuma esikepeni abesehamba phezu kwamanzi! Uqalisa ukwesaba abeseqalisa ukucwila, kodwa uJesu uyamsindisa.

Ngemva kwesikhathi, uJesu unika izinkulungwane zabantu ukudla. Khathesi ubanika izinkwa eziyisikhombisa lenhlanzi ezincane ezilutshwana. Lokhu kwenela abantu bonke. Indlela uJesu anakekela ngayo abantu iyamangalisa kakhulu. Nxa esebusa njengenkosi kaNkulunkulu asisoze sidutshwe yilutho!