Uthanda Abantwana Abancane

KHANGELA uJesu emfanekisweni egone umfana lo omncane. Lokhu kutshengisa ukuthi uJesu ulendaba labantwana abancane. Amadoda akhangeleyo ngabaphostoli bakhe. UJesu uthini kibo? Ake sibone.

UJesu labaphostoli bakhe bavela khatshana. Endleleni abaphostoli bakhe kade bephikisana. Ngakho sebefikile, uJesu uyababuza esithi: ‘Kade liphikisana ngani endleleni?’ UJesu uyakwazi ukuthi kade bephikisana ngani. Kodwa uyababuza ngoba ufuna ukubona ukuthi abaphostoli bazamtshela yini.

Abaphostoli kabaphenduli ngoba endleleni kade bephikisana ngokuthi ngubani omkhulu phakathi kwabo. Abanye abaphostoli bafuna ukuba ngabaqakathekileyo ukudlula abanye. UJesu uzabatshela njani ukuthi akulunganga ukufuna ukuba mkhulu kulabanye?

Ubiza umfana omncane abesemmisa phambi kwabo. Utshela abafundi bakhe ukuthi: ‘Ngiqinisile ngithi kini, ngaphandle kokuba lintshintshe libe njengabantwana abancane, kalisoze langena embusweni kaNkulunkulu. Oba njengomntwana lo, nguye omkhulu kulabo bonke embusweni.’ Uyakwazi yini ukuthi uJesu wakukhulumelani lokhu?

Kanengi, abantwana abancane kabalandaba lokuthi ngubani omkhulu kumbe oqakatheke ukudlula abanye. Yikho-ke, abaphostoli kumele babe njengabantwana abancane, bangazihluphi ngokuthi ngubani omkhulu kumbe oqakatheke kulabanye.

Kulezinye izikhathi lapho uJesu atshengisa ukuthi uyabathanda kakhulu abantwana abancane. Ngemva kwezinyanga ezilutshwana, abanye abantu baletha abantwana babo kuJesu. Abaphostoli bazama ukubaxotsha. Kodwa uJesu uthi kubo: ‘Yekelani abantwana babuye kimi, lingabaxotshi, ngoba umbuso kaNkulunkulu ungowabantu abanjengabo.’ UJesu uthatha abantwana abagone abesebabusisa. Akukuthabisi yini ukwazi ukuthi uJesu uyabathanda abantwana abancane?